Venesuelada təhlükəli hərbi hərəkətlilik davam edir. Ölkənin Müdafiə naziri Vladimir Padrino Lopez ABŞ-nin Kariblər bölgəsində artan hərbi fəaliyyətini əsas gətirərək, 200 min əsgərin səfərbər edildiyini açıqlayıb.

Nazir sosial media hesabında paylaşdığı bəyanatda bildirib ki, bu səfərbərlik Venesuelanın üzləşdiyi təhdidlərə qarşı hazırlığın bir hissəsidir və yeni hərbi təlimlərin tərkibində həyata keçirilir.

Lopez ABŞ-nin Kariblərdəki addımlarını hədəf alaraq deyib:“Karib dənizində sülh, ABŞ Dövlət Departamenti tərəfindən uydurulmuş bir yalan üzündən təhlükə altındadır. Bu yalanın məqsədi, ABŞ-də yaşanan ciddi daxili problemlərdən diqqəti yayındırmaqdır. Onlar Venesuelaya qarşı yalanlarını, ziddiyyətlərini və nifrət dolu hücumlarını davam etdirəcəklər. Bizim tərəfimizdə isə daha çox iş, daha çox birlik və vətən sevgisi olacaq”.

Venesuela mediasının məlumatına görə, ölkə üzrə başlanılan səfərbərlik iki gün davam edəcək və bu müddətdən sonra vəziyyətə uyğun olaraq yeni qiymətləndirmə aparılacaq.

Press-fakt

Namiq Bilal

Başda ABŞ olmaqla Qərb sivilizasiyası böyük çöküşün astanasındadır. Əhali sürətlə azalır və qocalır, Qərb iqtisadiyyatı Asiyanın nəhəng texnoloji sıçrayışı önündə duruş gətirə bilmir. Qərb hegemoniyası bitir. Lakin yenidən toparlanmaq və üstünlüyü saxlamaq üçün var gücü ilə çarpışacaqlar. Cəmiyyətlərin toparlanması və yüksəlişi üçün çox möhtəşəm yeni ideoloji qalxınmaya ehtiyac var.

Qərbin yeni ideologiyası-unutdurulmuş xristian dəyərlərini yenidən aparıcı ideologiya halına gətirməkdir. Bu istiqamətdə ciddi addımlar atılır. Həmin addımlara sırası ilə nəzər salaq.

Birinci addım. ABŞ-nin vitse-prezidenti C.D.Vens geniş auditoriya qarşısında çıxış edərək həm yəhudiliyə, həm də islam dünyasına qarşı çağırış kimi görünən bəyanatlar verib.
O deyib: “Xristianlıqla yəhudilik arasında çox böyük teoloji konflikt var. Fələstində və Orta Şərqdə iki dövlətli çözüm deyil, üç dövlətli çözüm olmalıdır. Yerusəlimdə və Orta Şərqdə müsəlman və yəhudi dövlətləri ilə yanaşı, xristian dövləti də qurulmalıdır.”

Həm Fələstində, həm Livanda, həm də Misirdə çoxmilyonlu xristian kütləsi yaşayır. Siyasi qərar verilərsə, hər üç dinin təmsilçilərini biri-birinə qarşı qaldıraraq Orta Şərqi yenidən və daha güclü şəkildə alovlandırmaq xüsusi xidmətlər üçün o qədər də çətin məsələ olmazdı.

İkinci addım. Bir neçə gün öncə Donald Tramp belə bir bəyanat verdi: “Nigeriyada müsəlmanlar xristianları kütləvi şəkildə qətlə yetirir. Nigeriya xristiyanlarını müdafiə etmək üçün bu ölkəyə qoşun yeritməliyik.”

Nigeriyada çox böyük neft-qaz yataqları var. Heç şübhəsiz, Trampın əsas məqsədi bu təbii qaynaqlara çökməkdir. Lakin həmin qaynaqlara çökmək üçün istifadə olunan siyasi instrument xristian–müsəlman qarşıdurmasıdır.

Üçüncü addım. Roma Papası XIV Leo və ABŞ-nin vitse-prezidenti Cey Di Vens Türkiyənin İznik əyalətindəki qədim kilsəni ziyarət edəcəklər. Bu kilsədə eramızın 325-ci ilində xristian teologiyasının ana sütunlarını müəyyən edən və xristianlığın birinci ümumdünya şurası sayılan Nikea Məclisi keçirilib. Nikea Məclisi xristian dinini erkən xristianlıqdan rəsmi din statusuna daşıyan ən əhəmiyyətli tədbirdir.

Roma Papasının bu kilsəyə səfəri son bir neçə yüz ildə ilk dəfədir ki, baş tutacaq. Roma Papasının və ABŞ vitse-prezidentinin İznik səfəri xristianlığa ikinci nəfəs vermək amacı daşıyır.
Yada salaq ki, Roma Papası aylar öncə İsraili “uşaq qatili olan dövlət” adlandırmışdı. Eyni zamanda Almaniya, Fransa, İspaniya, İngiltərə, Slovakiya, Macarıstan kimi dövlətlərdəki ulusçu siyasi qurumlar xristian dəyərlərinə qayıtmağı Avropanın xilası olaraq görürlər. Belə görünür ki, Qərb sivilizasiyası yeni ideoloji tutalğaç kimi xristianlığa sarılır.

Bu “yenidən xristianlıq” ideyasının Qərb üçün əhəmiyyətli məqamlarına baxaq.

Xristianlığın yenidən ana ideologiyaya çevrilməsi ilk öncə ailə dəyərlərini bərpa etməklə cəmiyyətləri demoqrafik fəlakətdən xilas etmək cəhdidir. Üstəlik, xristianlığı dozalı şəkildə radikallaşdıraraq Qərbə müsəlman axınını dayandırmaq da görünən hədəflər arasındadır.
ABŞ, Çin, Rusiya, Almaniya, İngiltərə kimi ən böyük 40-a yaxın dövlətin mərkəzi bankları qlobalçı yəhudi ailələrinin nəzarətindədir. Xristianlığı yenidən alovlandırmaq və paralel şəkildə anti-İsrail, anti-yəhudi ovqatını körükləməklə Qərbin ulusçu liderləri qlobalçı ailələrin maliyyə buxovlarından qurtulmağa çalışırlar.

Xristianlığın yenidən alovlandırılması və anti-yəhudi, anti-müsəlman təbliğatının genişləndirilməsi başqa aspektdən də olduqca önəmlidir. XX əsrdə dünyanın ən böyük neft-qaz hövzəsi olan Böyük Orta Şərqi nəzarətdə saxlamaq üçün Qərb iki böyük konfliktdən — İran–İsrail və sünni–şiə konfliktlərindən yararlanıb. Bu gün hər iki konfliktin potensialı tükənib.

“Orta Şərqdə xristian dövləti qurulmalıdır” bəyanatını vermək, bölgədə daha böyük konfliktin fitilini yandırmaq deməkdir. Deməli, yeni formatda yeni konflikt alovlandıra bilsələr, qərblilər bölgəyə nəzarəti hələ uzun müddət öz əlində saxlaya bilərlər.

“Orta Şərqdə xristian dövləti qurulmalıdır” ideyası və “Xristianları müdafiə etmək üçün Nigeriyaya qoşun yeritməliyik” bəyanatı XXI əsrin yeni formatlı səlib yürüşüdür. Orta əsrlərdəki səlib yürüşlərinin qarşısını hər zaman türklər kəsib.

Maraqlıdır ki, bu günümüzün “yeni səlib yürüşünün” mayakı ola biləcək ikinci Nikea Məclisi məhz Türkiyədə toplanır. Böyük Orta Şərqin daha böyük qan gölünə çevrilməsi, başda Türkiyə olmaqla Misirin, İsrailin və Livanın milli maraqlarına ziddir. XXI əsrin yeni formatlı səlib yürüşü başlanacaqsa, bu yeni hərəkat da orta əsrlərdə olduğu kimi türklərin bölgədə qurduğu dəmir divara çırpılacaq. Türkiyə buna hazırlanır.

Şimali Atlantika Alyansı Ukraynaya görə Rusiya ilə üçüncü dünya müharibəsinə başlamayacaq.

Bunu NATO-nun sabiq baş katibi, Norveçin maliyyə naziri Yens Stoltenberq The Sunday Times qəzetinə verdiyi müsahibədə bildirib.

Onun sözlərinə görə, 2022-ci ildə Volodimir Zelenski Ukraynanın hava məkanının bağlanmasını xahiş etdikdə, Stoltenberq bu tələbi rədd edib, çünki bu addım münaqişənin qlobal müharibəyə çevrilməsi riskini artırardı.

“O vaxt ABŞ prezidenti olan Baydenin də dediyi kimi, biz Ukraynaya görə üçüncü dünya müharibəsi riskinə getməyəcəyik. Məqsədimiz Perl-Harbor kimi hadisə ilə üzləşmək və bütün alyansın birbaşa müharibəyə cəlb olunması deyil. Buna görə biz Ukraynaya dəstək verməyə davam edirik ki, onlar döyüşə bilsinlər, lakin NATO qüvvələrini göndərmək və Rusiyayla birbaşa hərbi qarşıdurmaya girmək niyyətində deyilik,” – deyə Stoltenberq vurğulayıb./apa

NATO ölkələri uzun fasilədən sonra ilk dəfə Rusiyanı sursat istehsal tempi baxımından geridə qoyub.

Bu barədə alyansın baş katibi Mark Rütte Buxarestdə keçirilən hərbi-sənaye forumunda çıxışı zamanı bildirib.

Rüttenin sözlərinə görə, bir müddət Rusiya NATO ölkələrinin ümumi istehsalını qabaqlayırdı, lakin artıq vəziyyət dəyişib. Alyans çərçivəsində onlarla yeni istehsal xətti açılıb, mövcud müəssisələr genişləndirilib.

“Son onilliklərdə bu qədər genişmiqyaslı istehsal görməmişik”, – deyə NATO rəhbəri vurğulayıb.

Baş katib istehsalın artırılmasını “real və uzunmüddətli təhlükələr”lə əlaqələndirərək əsas təhdid mənbəyi kimi Rusiyanı göstərib: “Moskvanın yaratdığı təhlükə Ukraynaya qarşı müharibənin bitməsi ilə aradan qalxmayacaq. Rusiya yaxın gələcəkdə də Avropa və dünya üçün destabilizasiya edən qüvvə olaraq qalacaq.”

Rütte həmçinin Rusiyanın Çin, Şimali Koreya və İranla hərbi-sənaye əməkdaşlığını “misilsiz səviyyəyə” qədər genişləndirdiyini və bu ölkələrin uzunmüddətli qarşıdurmaya hazırlaşdıqlarını qeyd edib.

O, NATO-nun müdafiə sektorunda innovasiyaları dəstəkləyəcəyini, sursat təchizatını artırmaq üçün satınalmaların sürətləndirilməsinə hazır olduqlarını da bildirib.

Xatırladaq ki, Rusiya Prezidenti Vladimir Putin oktyabrda keçirilən Valday forumunda Avropada “hərbiləşmənin sürətləndiyini” qeyd edərək, “əgər Avropadan real hərbi təhlükə yaranarsa, Moskvanın cavabı çox tez və inandırıcı olacaq” bəyanatını vermişdi.

Press-fakt

ABŞ-nin dünyanı 150 dəfə məhv etməyə yetəcək qədər nüvə silahı ehtiyatı var.

APA xəbər verir ki, ABŞ Prezidenti Donald Tramp bu barədə "CBS News" telekanalına verdiyi müsahibəsində bildirib.

O deyib ki, ABŞ nüvə potensialına görə dünyanın digər dövlətlərini geridə qoyur, lakin bu gücün məsuliyyətli şəkildə idarə olunması zəruridir.

“Bizim digər ölkələrdən daha çox nüvə silahımız var. Denuklearizasiya istiqamətində ciddi addımlar atmaq lazımdır. Amma eyni zamanda, ABŞ nüvə sınaqları keçirməyən yeganə dövlət kimi qalmamalıdır”, – Tramp vurğulayıb.

O, bu məsələni Çin lideri Si Cinpin və Rusiya Prezidenti Vladimir Putinlə də müzakirə etdiyini qeyd edib.

“Bizim dünyanı 150 dəfə partlatmağa kifayət edəcək qədər nüvə silahımız var. Rusiyanın da çoxlu silahı mövcuddur, Çin isə yaxın illərdə bu potensiala çatacaq”, – Tramp əlavə edib.

Tramp onu da qeyd edib ki, ABŞ-ın təhlükəsizlik maraqları baxımından nüvə sınaqlarının tam dayandırılması məqsədəuyğun deyil. Onun sözlərinə görə, əgər digər ölkələr bu sahədə fəaliyyət göstərirsə, Vaşinqton da öz texnoloji üstünlüyünü qorumaq üçün adekvat addımlar atmalıdır.