Ukraynanın Rusiyaya qarşı hazırkı müharibədə qalib gəlmək üçün "heç bir şansı yoxdur" və bu ölkəyə Avropa İttifaqının (Aİ) əlavə maliyyə dəstəyi verməsi "sadəcə dəlilikdir".

Bunu Macarıstanın Baş naziri Viktor Orban “Politico”-ya deyib.

Nəşr qeyd edir ki, Orbanın açıqlaması yaxın zamanda atəşkəs elan edilməsinə olan ümidlərin azaldığı və Avropanın gələn ilin büdcə böhranından əvvəl Kiyevə maliyyə dəstəyi göstərməyə çalışdığı bir vaxta təsadüf edir.

Nəşrə verdiyi müsahibədə Macarıstanın Baş naziri Ukraynaya maliyyə dəstəyinin Aİ-ni "iqtisadi və maliyyə cəhətdən öldürdüyünü və sadəcə dəlilik olduğunu” bildirib.

Qeyd olunur ki, Macarıstan əvvəllər Rusiyaya qarşı Aİ sanksiyalarının uzadılmasını, eləcə də Ukraynaya maliyyə dəstəyini bloklamışdı. Bundan əlavə, Budapeşt özünün ABŞ-nin iki böyük Rusiya şirkətinə qarşı tətbiq etdiyi neft sanksiyalarından azad edilməsini istəyib və Donald Tramp bununla bağlı Orbana 1 il möhlət verib.

"Biz artıq 185 milyard avro xərcləmişik və daha çox xərcləmək niyyətindəyik. Beləliklə, müharibədə qalib gəlmək şansı olmayan bir ölkəni maliyyələşdiririk", - deyə Orban bildirib.

Macarıstanın Baş naziri həmçinin, Avropa liderlərini sülh müqaviləsi üzrə danışıqlarda daha yaxşı mövqe qazanmaq məqsədilə Ukraynadakı münaqişəni uzatmaqda ittiham edib: "Onlar müharibəni davam etdirmək istəyirlər. Onlar inanırlar ki, Ukraynaya daha çox dəstək vermək üçün müharibəni davam etdirməliyik".

O, bu mövqenin tamamilə səhv olduğuna inanır: "Vəziyyət və zaman ruslar üçün bizdən daha əlverişlidir. Bunu davam etdirməyin; mümkün qədər tez dayandırın".

Sülh danışıqlarına gəldikdə, Orban nəşrə bildirib ki, "ruslar və amerikalılar arasında müharibə, ticarət, enerji və digər məsələlərdə razılaşma olacağını" gözləyir.

O, avropalıların da Rusiya ilə müstəqil ünsiyyət kanalı açmalı olduğunu hesab edir.

Macarıstanın Baş naziri əlavə edib ki, əgər "möcüzə" baş verməsə, Rusiya müharibədən sonra da Şərqi Ukraynanı, xüsusən də Donetsk vilayətini ələ keçirməyə davam edəcək: "Bu, reallıqdır, istəsəniz də, istəməsəniz də".

Eyni zamanda, Orban Rusiyanın başqa bir Avropa ölkəsinə və ya NATO üzvünə hücum edəcəyinə inanmır: "Rusların sadəcə kifayət qədər gücü olmadığı üçün Avropa Birliyinə və ya NATO-ya hücum edəcəklərini demək cəfəngiyyatdır. Biz daha güclüyük"./azpolitika

Emin Əmrullayev AMEA-nın 80 illik Yubileyində çıxışının bir hissəsində deyir ki, elmi məqalə yazmaq elmdə formal xarakter daşıyır. Çıxışının digər hissəsində isə alimləri təbrik edir ki, Azərbaycan elmi məqalələrin sayına görə postsovet məkanına daxil olan ölkələr içərisində xeyli irəliləyib.

3-4 il bundan əvvəl deyirdi ki, ali məktəblərə tələbə qəbulunun sayını kəskin artırmaq lazımdır. Ali məktəblərdə 150-200 bal toplayan tələbə əlindən tərpənmək mümkün deyil. İndi də deyir ki, tələbə sayını azaldıb keyfiyyəti artırmaq lazımdır.

Bu adam 3 ildən çoxdur ki, Bakı şəhəri üzrə Təhsil İdarəsinə müdir vəzifəsinə kadr tapa bilmir. Bakı məktəblərinin tabe olduğu qurumda xaos hökm sürür.

Bilərəkdən belə vəziyyət yaradıb.

Təhsilin İnkişafı Fondunu da “ağ günə” çıxartdı. Ağsu rayonunda "Azqranata" MMC-də maliyyə departamentinin direktoru vəzifəsində işləmiş İlqar Bayramlını Təhsilin İnkişafı Fondunun İdarə Heyətinə sədr əvəzi təyin etdi.

Əli Həsənovun pul ortağı (Kaspi liseyində) Elnur Əliyev isə böyük ənənəsi olan, vaxtilə professor Zahid Qaralovun, professor Abdulla Mehrabovun direktoru olduğu Təhsil İnstitutunu korrupsiya yuvasına çevirib. Orada tam anarxiya hökm sürür...

Missiya artıqlaması ilə həyata keçirilir./azpolitika

Etibar ƏLİYEV

Prezident İlham Əliyev Azərbaycanın Ukraynadakı səfirliyinin binasının növbəti dəfə raket zərbəsinə məruz qalmasını pisləyib.

Azərbaycan dövlət başçısı bu barədə Ukrayna Prezidenti Volodimir Zelenski ilə telefon danışığı zamanı bildirib.

Prezident İlham Əliyev bununla əlaqədar ciddi narahatlığını ifadə edib, beynəlxalq hüququn norma və prinsiplərinə əsasən diplomatik nümayəndiliklərə qarşı bu cür hücumların qəbuledilməz olduğunu vurğulayıb.

Qeyd edək ki, 14 noyabr tarixində təqribən gecə saat 01:00-da Ukraynanın paytaxtı Kiyev şəhərinə raket və dron hücumları nəticəsində İsgəndər tipli raketlərdən biri Azərbaycan səfirliyinin ərazisinə düşüb. Bununla bağlı Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimov Xarici İşlər Nazirliyinə çağırılıb. Bununla bağlı ona kəskin etiraz bildirilib və müvafiq nota təqdim edilib. Son partlayış nəticəsində Səfirliyin ərazisinin hasarının bir hissəsinin tamamilə dağılıb, konstruksiyaların, xidməti avtomobillərin, inzibati binanın və Səfirliyin konsulluq şöbəsinin zədələnib, həmçinin diplomatik nümayəndəliyin ərazisinə ciddi ziyan vurulub.

Elm və təhsil sahəsi üzrə ekspert, keçmiş deputat Etibar Əliyev ölkədə təhsil sistemində aparılan islahatlarla bağlı tənqidi fikirlərini bölüşüb. O, sosial şəbəkədə yazdığı geniş analizdə deyib ki, təhsil menecerləri məktəbi “repetitorluq institutuna” təhvil veriblər və bunu bilərəkdən ediblər.

E.Əliyev bildirib ki, məqsəd külli miqdarda pul qazanmaq olub və orta təhsilin keyfiyyətinin ilbəil aşağı düşməsi bu şəxsləri narahat etməyib: “Çünki onların tam əksəriyyəti təhsilə yad adamlardır. Tədris proqramı ilə tədris planının fərqini bilməyənlər Elm və Təhsil Nazirliyinə doluşdular. Onları ora gətirən isə nə məktəb təhsilini, nə də ali təhsili bilməyən Emin Əmrullayev oldu”.

Ekspert qeyd edib ki, məktəb idarəetməsi pozulub, məktəb mühiti dağıdılıb, müəllim–şagird, müəllim–direktor, valideyn–direktor münasibətləri zədələnib. Onun sözlərinə görə, belə bir mühitdə islahat aparmaq absurddur: “Orta təhsilin inkişafı üçün əvvəlcə təhsil mühitini sağlamlaşdırmaq lazımdır”.

Etibar Əliyev əlavə edib ki, cəmiyyət artıq bu idarəçilərdən inkişaf gözləmir, çünki onlar səmimi deyillər. O, nazirin son açıqlamalarını da satirik şəkildə şərh edib: “Deyəsən, yadplanetlilər yenə də nazirin qulağına nəsə pıçıldayıb. Dostları ilə yeyib-içməkdən gələndə gecə vaxtı yanından keçdikləri məktəblərin işıqlarını yanan görüblər. Emin müəllim qəflətən qışqırıb: “Aha, islahat!’”

Nazirin Milli Məclisdə dediyi “yeni məktəb modeli”nə də toxunan E.Əliyev vurğulayıb ki, bu yanaşma Azərbaycan reallığına uyğun deyil. Onun sözlərinə görə, model kişi müəllimlərin üstünlük təşkil etdiyi ölkələr üçün yararlıdır: “2024/2025-ci tədris ilində Azərbaycanda 146 381 müəllim var. Onlardan 120 633-ü qadın, 25 748-i kişidir. Yəni kişi müəllimlər cəmi 17,5 faizdir.”

Ekspert ailəli gənc qadın müəllimlərin 8 saatlıq iş rejiminə cəlb olunmasını qeyri-real hesab edib: “Uşaqları kimin öhdəsinə buraxacaqlar? Ev işlərini kim görəcək? Məktəbdə 8 saat qalmaq üçün şərait varmı? Kitabxanalarda neçə kitab var? Müəllim yeməyi evdənmi gətirməlidir?”

Əliyev bildirib ki, əksər valideynlər artıq uşaqlarını məktəbdən yayındırır, onları kurslara və ya evdə dərsə yönləndirirlər. Nazirliyin uşaqları günortadan sonra məktəbə gətirmək planı da qeyri-ciddidir. Onun sözlərinə görə, məktəb hazırda sadəcə “attestat möhürləyən məkana” çevrilib və bu vəziyyət cəmiyyət tərəfindən dəstəklənir. Təhsil menecerləri regionlarda məktəbləri müəllimlə təmin edə bilməyiblər, nəticədə fənn müəllimi olmayan kəndlərdə uşaqlar ya məktəbə getməyib, ya da Bakıya üz tutub: “Bakıdan minlərlə valideyn isə attestat almaq üçün uşaqlarının adlarını boş qalan kənd məktəblərinə yazdırdı. Dünyanın heç bir yerində belə başıpozuq vəziyyət yoxdur”.

Ekspert əlavə edib ki, nazirin ortağı Məhəbbət Vəliyeva və bəzi MMC rəhbərləri illərdir müəllimləri qanunsuz axşam təlimlərinə cəlb edir, dövlət vəsaiti isə mənimsənilir: “Bunun özü də ‘yeni islahat’ üçün təcrübədir. Milyonlar qazanmağın kəsə yolu indi başqa modeldə məktəbə sırınır”.

Etibar Əliyev həmçinin Təhsildə İnkişaf və İnnovasiyalar üzrə qrant müsabiqəsinə toxunub. Bildirib ki, 10 ilə yaxındır keçirilən bu müsabiqəyə hər il milyonlarla manat ayrılır, lakin müəllimlər bu qrantlardan bir manat da görmür: “Təəssüf ki, bu korrupsiyanın sorğu-sualını aparan yoxdur”.

Sonda ekspert xəbərdarlıq edib ki, yeni model tətbiq olunandan sonra məktəblərdə direktor–müəllim alverinin yeni mərhələsi başlayacaq: “Menecerlər pul qazanmağın yolunu çox gözəl bilirlər”./azpolitika

Xəbər verdiyimiz kimi, ötən gün Naxçıvan Muxtar Respublikasında Azərbaycan Prezidentinin səlahiyyətli nümayəndəsi Fuad Nəcəfli vəzifəsindən azad olunub.

Press-fakt xəbər verir ki, Prezidentin sabiq nümayəndəsi “Teleqraf”a açıqlamasında işdən çıxarılmasından danışıb.

“Nəinki Naxçıvan, mən bütöv Azərbaycanımızın vurğunuyam. Bir canım var, o da bu vətənə qurban olsun. Allah cənab Prezidentimizin canını sağ etsin, onu qorusun.

Sizin peşə yolunuz şərəfli yoldur. Araşdırma etmək mümkündür və bu, sizin hüququnuzdur. Mənim nəyləsə bağlı açıqlama verməyim subyektiv olar. Siz isə obyektiv olmalısınız. Bütün peşəkar insanlara salam deyirəm”.

O, Naxçıvandan Bakıya qayıdan zaman təyyarədə çəkilərək sosial şəbəkələrdə yayılan fotosundan da danışıb: “Naxçıvana uçan təyyarələrin “biznes klass”ı olmur. Bir salon olur və fotoda mən gözləmə zalında deyil, təyyarədəyəm”.

Qeyd edək ki, Fuad Nəcəfli sözügedən vəzifəyə 2022-ci ilin dekabrında təyin olunmuşdu.

"Unikal.az"-ın məlumatına görə, Fuad Nəcəfli Naxçıvanda Dövlət Proqramı layihəsini gecikdirdiyinə görə işdən çıxarılıb.

Polşanın Baş nazir müavini və xarici işlər naziri Radoslav Sikorski bildirib ki, əgər Ukrayna müharibəni uduzarsa, Rusiyanın növbəti hədəfi Polşa olacaq. Rusiyanın müstəmləkəsi olmaqdansa, ot yeyərik.

Nazir Sikorski bu fikirləri Böyük Britaniyanın “The Rest is Politics” adlı podkast proqramında səsləndirib.

Onun sözlərinə görə, Rusiya Prezidenti Vladimir Putin Ukraynanı ələ keçirməyə müvəffəq olarsa, bu, Polşa üçün birbaşa təhlükə yaradacaq.

Sikorski vurğulayıb ki, Polşa ictimaiyyətinin Rusiya ekspansiyasından duyduğu narahatlıq, ölkənin müdafiə xərclərinin rekord səviyyədə artırılmasının əsas səbəblərindən biridir. Onun sözlərinə görə, bu səbəbdən Polşa hökuməti digər sahələrdəki maliyyə vəsaitlərindən imtina etməli olur.

Sikorski həmçinin bildirib ki, Ukrayna müharibənin daha üç il davam edə biləcəyinə hazırdır, lakin Rusiyanın bu qədər uzun müddət dözə biləcəyinə inanmadığını deyib.

Press-fakt

Rusiya xarici işlər naziri Sergey Lavrov vəzifəsindən kənarlaşdırılması ilə bağlı yayılan xəbərlərə münasibət bildirib.

Lavrov bu barədə ilk dəfə Rusiya mediasına verdiyi müsahibədə ətraflı danışıb.

Nazirin sözlərinə görə, Qərb mətbuatı onun ABŞ və Rusiya prezidentlərinin sammitinin baş tutmaması səbəbindən vəzifədən uzaqlaşdırıldığını iddia edib. Lavrov bu məlumatları təkzib edərək deyib: “Belə bir zarafat var: bizim vicdanımız təmizdir, çünki ondan nadir hallarda istifadə edirik. Amma konkret halda bu, tamamilə doğrudur.”

Xatırladaq ki, son vaxtlar Sergey Lavrov Təhlükəsizlik Şurasının iclasında iştirak etməmiş və illər ərzində ilk dəfə G20 sammitində Rusiya nümayəndə heyətinə rəhbərlik etməmişdi. Kreml isə onun işdən uzaqlaşdırılması ilə bağlı iddiaları təkzib edərək, Lavrovun “fəal şəkildə işini davam etdirdiyini” bəyan etmişdi.

Lavrov müsahibəsində həmçinin “Financial Times” qəzetinin yazdıqlarını da təkzib edib. Qəzetin iddiasına görə, Putin və Tramp arasında planlaşdırılan sammit Lavrovun ABŞ dövlət katibi Marko Rubio ilə telefon danışığı zamanı Moskvadan gələn sərt tələblər siyahısını ötürməsi səbəbindən pozulub. Nazir isə bildirib ki, həmin memorandum sammitdən əvvəl göndərilib və bu, iki lider arasında əvvəlki danışıqlarda əldə olunmuş razılaşmaların təsdiqi məqsədi daşıyıb.

Lavrovun sözlərinə görə, sənədin məqsədi iki ölkənin xarici siyasət və hərbi strukturları, eləcə də xüsusi xidmət orqanları arasında görüşlərin təşkili idi. O, həmçinin Marko Rubio ilə söhbətin “Financial Times”ın yazdığı kimi “gərgin” keçdiyi barədə məlumatları da təkzib edib.

Nazir sonda vurğulayıb: “Rusiya sammitin baş tutmamasına görə məsuliyyət daşımır. Bizim vicdanımız təmizdir və bu dəfə, həqiqətən belədir.”/azpolitika

Dünən ABŞ-də Veteranlar Günü münasibətilə Vaşinqton yaxınlığındakı Arlinqton qəbiristanlığında çıxış edən prezident Donald Tramp, amerikalı veteranların şərəfinə keçirilən mərasimdə önəmli açıqlama verib.

Tramp, İranın nüvə potensialının məhv edilməsini yüksək qiymətləndirib və bunu “heyrətamiz əməliyyat” olaraq xarakterizə edib.

Prezident çıxışında, “Pilotlarımız 37 saat uçdu və İranın nüvə obyektlərini tamamilə məhv edə bildilər. Bu, heyrətamiz bir əməliyyat idi”,- deyə bildirib.

Press-fakt

Müğənni Nura Suri sosial şəbəkədə Mədəniyyət Nazirliyinin fəaliyyəti ilə bağlı sərt ittihamlar səsləndirib. O bildirib ki, illərlə dövlət tədbirlərində pulsuz çıxış edib, lakin bu tədbirlər üçün ayrılan vəsaitlərin mənimsənildiyini sonradan öyrəniblər.

“Mədəniyyət Nazirliyinin keçirdiyi bütün tədbirlərdə biz müğənnilər, dövlət tədbiridir deyə pulsuz oxumuşuq. Əvəzində isə heç kəsə lazım olmayan diplomlar veriblər - 2004-2022-ci illər ərzində. Sonradan xəbər tutduq ki, dövlət bu tədbirlər üçün vəsait ayırırmış, lakin həmin pulları Mədəniyyət Nazirliyində çalışanlar mənimsəyirmiş,”- deyə müğənni qeyd edib.

Sənətçi həmçinin nazirlikdən icazə almağın çətin olduğunu, bəzi şəxsi münasibətlərin buna təsir etdiyini iddia edib: “Bir dəfə ərizə yazıb klip çəkilişinə icazə istəmişdim. Akademik Musiqili Teatrda həm də Əliqismət bəylə bu barədə danışılmışdı. Çəkiliş qrupu artıq çəkiliş üçün yerləri müəyyən etmişdi və biz ödənişi də etməyə hazır idik, amma nazirlikdən icazə ala bilmədik (Mənzərin məndən xoşu gəlmir deyə).”

Nura Suri əlavə edib ki, teatr, muzey və digər mədəniyyət ocaqlarında çəkiliş yalnız ödənişlə mümkündür, lakin “bəy-gəlin” çəkilişlərinə heç bir maneə yoxdur:

“Nazirliyə rəsmi məktub göndərib aylarla cavab gözləməli oluruq. Biz müğənnilər üçün bu, çox çətin və ədalətsiz vəziyyətdir. Amma ‘bəy-gəlin’ çəkilişləri üçün heç bir problem yoxdur - pulunu ödə, çəkilişini et".

Müğənni iddia edib ki, bəzi ifaçılar və hətta Xalq artistləri belə, nazirlikdə çalışan Mənzər adlı şəxsə hədiyyə və pul verməklə tədbirlərə dəvət alır: “Sonradan öyrəndik ki, bir çox tədbirlərə düşmək üçün, hətta Xalq artistləri belə, Mənzər xanıma bahalı hədiyyələr və pul verirlər. Nazirlər dəyişir, amma Mənzər xanım hələ də yerindədir.”

Nura Suri bildirib ki, bir neçə sənətçi birlikdə nazirliyə rəsmi müraciət də edib, amma nəticə əldə olunmayıb: “Nazirliyə bir neçə yaltaq olmayan, doğrunu deməyə cəsarəti çatan məşhurlar birlikdə rəsmi məktub da yazdıq, amma heç bir nəticə olmadı.”

Press-fakt