Region - Press-fakt.az ictimai-siyasi onlayn qəzet

Azərbaycanın məşhur gölündə “əməliyyat” başladı -

admin — Sun, 16 Nov 2025 17:30:11 +0400

İranda son 50 ilin ən quraq payızı yaşanır.

Bu barədə İran Meteorologiya İdarəsi məlumat yayıb.

Bildirilib ki, ölkə üzrə yağışlar uzun illərin orta göstəricisinə nisbətən 89% azalıb.

“Paytaxt Tehranda yağış miqdarı son yüz ilin ən aşağı səviyyəsinə düşüb, bir çox vilayətdə isə aylarla yağış olmayıb” – deyə, qeyd edilib.

Son illərin ən ciddi quraqlıq dövrünü yaşayan İranda yağış yaratmaq məqsədilə buludlara “toxum səpməklə” süni yağış yaradılır.

İsrail və Birləşmiş Ərəb Əmirliklərini “Buludlarımızı oğurlayırlar” deyə ittiham edən İran, ilk buludlara toxum səpmə əməliyyatını Urmiya Gölü ərazisində həyata keçirib.

Urmiya üçün su səviyyəsini artırmaq məqsədilə digər vilayətlərdə də oxşar işlərin davam etdiriləcəyi bildirilib.

Qeyd edək ki, bundan əvvəl İran Prezidenti Məsud Pezeşkian ölkədə davam edən quraqlıq və su çatışmazlığına görə narahatlığını vurğulayıb, kritik su böhranı haqqında ciddi xəbərdarlıq edib.

Press-fakt

Ermənilər Moskvada ayağa qalxdı:

admin — Sun, 16 Nov 2025 00:00:16 +0400

Moskvadakı Ermənistan səfirliyinin qarşısında Erməni Apostol Kilsəsinə hücumlara qarşı etiraz aksiyası keçirilib.

Press-fakt xəbər verir ki, nümayişçilər Ermənistan hakimiyyətini xaos yaratmaqda və cəmiyyətdə nifaq salmaqda ittiham edirlər.

Etirazçılar Paşinyandan Ermənistan Apostol Kilsəsinin həbs olunmuş keşişlərini və kilsəni müdafiə edən iş adamı Samvel Karapetyanın azadlığa buraxılmasını tələb ediblər.

Nümayişçilər hesab edirlər ki, Ermənistan rəhbərliyinin hərəkətləri xaos yaradır və ictimai şüuru zəhərləyir, xalq arasında nifaq salır. Etirazda təxminən 250 nəfər iştirak edib.

Qeyd edək ki, hakimiyyət orqanları ilə Erməni Apostol Kilsəsi arasında baş verən qarşıdurmadan sonra arxiyepiskoplar Baqrat Qalstanyan və Mikael Ajapaxyan, yepiskop Mkrtiç Proşyan və Muğni kəndindəki Surb Gevork monastırının rahibi Qaregin Arsenyan müxtəlif ittihamlarla həbs ediliblər.

İyun ayında kilsəni dəstəkləyən bəyanat verən Taşir Qrupunun sahibi Samvel Karapetyan da məhkəməyə qədər həbsdədir.

Azərbaycanda 9 ay ərzində 77,7 min yeni iş yeri açılıb -

admin — Sat, 15 Nov 2025 11:15:23 +0400

Cari ilin 9 ayı ərzində ölkədə 77,7 min yeni iş yeri açılıb.

Ötən ilin müvafiq dövründə isə ölkədə 69,6 min yeni iş yeri açılıb.

Nəticədə Azərbaycanda yeni açılan iş yerlərinin sayında artım 8,1 min və ya 11,63% artım olub

Press-fakt valyuta.az-a istinadla xəbər verir ki, ən çox iş yeri 91,4% olmaqla qeyri-dövlət sektorunda açılıb.

Yeni açılmış iş yerlərinin regionlar üzrə faizlə payı

Zəngəzur dəhlizi (TRİPP) hansı ərazilərdən keçəcək? -

admin — Sat, 15 Nov 2025 00:30:07 +0400

Ermənistanın Baş naziri Nikol Paşinyan "Tramp marşrutu" (Zəngəzur dəhlizi) barədə bir sıra detalları açıqlayıb.

Paşinyan bildirib ki, adətən “Tramp dəhlizi” adlandırılan marşrut Azərbaycan ərazisindən Mehri vasitəsilə Naxçıvana, oradan isə Yerarsx qəsəbəsinə və daha sonra Türkiyə sərhədində yerləşən Axurik kəndinə doğru uzanmalıdır.

Paşinyan mətbuat konfransında qeyd edib ki, Ermənistan bu istiqamətdə işlərin bir hissəsini artıq başlayıb:

“Bizim bərpa etməli olduğumuz çox kiçik bir sahə qalıb və artıq bu işlərə başlamışıq”, - deyə o vurğulayıb.

Baş nazir, həmçinin Azərbaycanın Qars–Dilucu (Qars–Naxçıvan) dəmir yolunun tikintisinə başladığını diqqətə çatdırıb.

Paşinyanın sözlərinə görə, Vaşinqton Sülh Sammiti layihənin xərcini kəskin şəkildə azaltmağa imkan verir, çünki eyni marşrut Axurik–Yerarsx xətti üzrə də təmin edilə bilər:

“Təbii ki, biz bu istiqamətdə də işləyirik”, – deyə o bildirib.

O, bir daha ABŞ Prezidenti Donald Trampın prosesdəki rolunu xüsusi olaraq qeyd edib:

“Bəli, əvvəlki dövrdə Ermənistan–Azərbaycan sülh prosesi müsbət dinamika göstərirdi, amma ciddi çətinliklər də var idi. Razılığın əldə olunmasında prezident Trampın şəxsi iştirakı həlledici rol oynadı”.

Paşinyan prosesin vaxt cədvəlini də açıqlayıb:

İlin sonuna qədər – hüquqi məsələlərin tamamlanması və mətnin yekunlaşdırılması;

2026-cı ilin ilk yarısı – sazişdən irəli gələn qərarların qəbulu;

2026-cı ilin ikinci yarısı – tikinti işlərinə başlamaq.

Baş nazir bildirib ki, layihənin həyata keçirilməsinə heç bir maneə yoxdur, çünki bütün mübahisəli məqamlar Vaşinqton Bəyannaməsində öz əksini tapıb:

“Bizə yalnız əldə olunmuş razılaşmaları icra etmək qalır”, – Paşinyan belə deyib.

Press-fakt

Xankəndidə mənzillər tikilib satışa çıxarılacaq

admin — Fri, 14 Nov 2025 13:40:43 +0400

Xankəndi şəhərində sahibkarlar çoxmənzilli yaşayış binalarının tikintisinə start verib və tikinti başa çatdıqdan sonra mənzillər satışa çıxarılacaq.

Xankəndi şəhərində, Ağdərə və Xocalı rayonlarında Bərpa Tikinti və İdarəetmə Xidmətinin məlumatına görə, bunu Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov deyib.

Onun sözlərinə görə, şəhərdə sahibkarlar tərəfindən hündürmərtəbəli çoxmənzilli yaşayış binalarının tikintisi başa çatdıqdan sonra mənzillər satışa çıxarılacaq:

"Artıq Xankəndidən mənzil almaq istəyən vətəndaşlardan xeyli müraciət daxil olub. Mənzillərin satışı həm nağd şəkildə, həm də kreditlə mümkün olacaq. Sahibkarların banklarla imzaladığı müqavilələr əsasında vətəndaşlara kreditlə mənzil almaq imkanı yaradılacaq. Bu prosesin şəffaf və rahat həyata keçirilməsi üçün sahibkarlara zəruri dövlət dəstəyi göstəriləcək"./axar.az

Azərbaycan -Türkiyə qardaşlığına qarşı təxribatlar -

admin — Fri, 14 Nov 2025 12:20:13 +0400

“Qarabağ zəfərində Türkiyənin rolunu kiçiltməyə, Azərbaycanı Fələstinin düşməni kimi təqdim etməyə çalışırlar”

Tarixçi alim, professor Xaləddin İbrahimli Azərbaycan–Türkiyə münasibətlərinə yönəlik təxribatlarla bağlı fikirlərini bölüşüb. O bildirib ki, iki ölkə arasındakı əməkdaşlığı və qardaşlığı pozmaq üçün uzun illərdir müxtəlif cəhdlər edilib və bu cəhdlərin davam edəcəyi də istisna deyil. Professorun sözlərinə görə, belə fəaliyyətlər əsasən həssas mövzular üzərindən qurulur.

X.İbrahimli birinci növbədə Ermənistan məsələsindən istifadə edildiyini qeyd edib: “Uzun zamandır Ermənistan mövzusu üzərindən təxribatlar törədilir və iki ölkə arasında münasibətləri soyutmağa çalışırlar. İndi bu kart əldən çıxmaq üzrədir”.

İkinci həssas istiqamət kimi Azərbaycan-İsrail münasibətlərini göstərən İbrahimli deyib ki, bu məsələ hazırda ən aktual mövzulardan biridir və iki ölkə arasında soyuqluq yaratmaq üçün ən əlverişli sahə kimi qiymətləndirilir: “Bu mövzunu istismar edənlərin başında İran, sonra isə Rusiya gəlir. İran Azərbaycan-Türkiyə münasibətlərini pozmaq üçün Türkiyə cəmiyyətində qara təbliğat aparır. Rusiya da bu sahəni boş buraxmır. Ona görə də Türkiyə toplumunun bu mövzuya xüsusi diqqət yetirməsi gərəkir”.

Professor üçüncü mühüm istiqamət kimi Qarabağ zəfərini göstərib. O bildirib ki, Azərbaycanın daxilində Rusiya və İran agenturası bu qələbədə Türkiyənin rolunu kiçiltməyə çalışır: “Bu qüvvələr iki dövlət və iki millət arasında soyuqluq yaratmaq niyyətindədirlər. Halbuki gerçəklik budur ki, Türkiyə heç nə etməsə belə, İran və Rusiya kimi Ermənistana hər cür yardım etmədi, onun yanında dayanmadı. Həmişə Azərbaycanın yanında oldu. Qarabağ zəfərində Türk siyasəti, diplomatiyası və hərbi ağılı ortada idi və kifayət qədər dəyişdirici gücə malik idi”.

Dördüncü həssas mövzu kimi Azərbaycan–Fələstin münasibətlərini qeyd edən İbrahimli deyib ki, bu istiqamətdə də Türkiyə ictimaiyyəti yanlış yönləndirilir. Onun sözlərinə görə, İran agentləri Azərbaycanı Fələstin düşməni kimi təqdim etməyə çalışırlar.

“Halbuki Qarabağ məsələsində Fələstinin hər zaman Ermənistanı dəstəkləməsinə baxmayaraq, Türkiyənin Fələstin siyasəti nədirsə, Azərbaycanın da siyasəti aşağı-yuxarı odur. Fələstinlilərin özləri də bunu artıq hiss edir və təbii ki, xəcalət çəkirlər”, - deyə, o, bildirib.

Professor vurğulayıb ki, bu cür təxribatların təsirinə düşməmək üçün media xüsusi rol oynamalıdır:“İnsanların tamamı siyasətlə məşğul olmur. Təbliğat onları aldada və yanlış fəaliyyətə itələyə bilər. Ona görə belə həssas mövzular ilk növbədə medianın diqqətində olmalıdır. Media feyk xəbər yaymamalı və yayılan feykləri ifşa etməlidir. Bu halda siyasətlə məşğul olmayan böyük çoxluq aldanmayacaq və yanlış qərar qəbul etməyəcək. Siyasi idarəetmələr də bu məsələlərdə media ilə əməkdaşlıq etməlidir”.

Press-fakt

İcra başçısı rayon sakinlərini məhkəməyə verdi

admin — Fri, 14 Nov 2025 11:15:16 +0400

Şabran rayon İcra Hakimiyyətinin başçısı Asif Hüseynovun 2 sakin haqda rayon məhkəməsinə xüsusi ittiham qaydasında şikayət edib.

Press-fakt xəbər verir ki, icra başçısı rayonun Uzunboyad kənd sakinləri Səbirə Vəliyeva və oğlu Vüsal Muradov barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə iddia qaldırıb.

Başçını narazı salan isə kənd sakinlərinin mətbuat üzərindən ondan pullarını tələb etmələridir.

Şabran rayon Uzunboyad kənd sakini Vüsal Muradov mətbuata müraciət edərək Şabran rayon İcra Hakimiyyətinin rəhbəri Asif Hüseynovun onlara olan borcu ödəməməsindən şikayətləniblər.

Kənd sakini iddia edir ki, anası Səbirə Vəliyeva 2022-ci ildə ümumi dəyəri 10 min 500 manat olan 15 ton toxumluq arpanı icra başçısına nisyə satsa da, pulunu ala bilməyib.

Arpa satılan zaman icra başçısı özü qapıya gəldiyi üçün, ona inanıblar və alış-verişlə bağlı hər hansı sənəd imzalamayıblar.

“Sənəd yoxdur. Elə-belə inandıq da. Dedik daha bu boyda rayonun başçısıdır. Mən onunla sənəd imzalayım, notariusa aparım, qol çəkdirim ki, nisyə verirəm? Elə olmur axı... Ayıbdır. Dedi, verdim. Mən də inandım ki, daha bu boyda rayonun başçısıdır da, yalan danışmaz”, - Vüsal Muradov bildirib.

Oktyabrın 20-də ailə deyib ki, şikayətdən sonra onlara Şabran rayon İcra Hakimiyyətinin rəhbəri Asif Hüseynovun Səbirə Vəliyeva və oğlu Vüsal Muradovla görüşmək istədiyi bildirilib.

Bundan bir neçə gün sonra isə Şabran Rayon Məhkəməsinə icra başçısı Asif Hüseynovun xüsusi ittiham qaydasında şikayəti daxil olub.

Artıq şikayət üzrə hazırlıq iclası keçirilib və xüsusi ittiham üzrə noyabrın 19-na baxış iclası təyin olunub./mənbə:müsavat

Azad edilmiş rayonlarda tikintiyə bu il 3.2 mlrd. manata yaxın vəsait xərclənib -

admin — Thu, 13 Nov 2025 14:20:05 +0400

İşğaldan azad edilmiş rayonlarda tikinti-quraşdırma işlərinə 2025-ci ilin yanvar-sentyabr ayları ərzində bütün maliyyə mənbələri hesabına 3 milyard 150 milyon 268 min manat vəsait sərf edilib.

Bu barədə “APA-Economics” Dövlət Statistika Komitəsinin hesabatı əsasında apardığı hesablamalara istinadən xəbər verir.

Qeyd edək ki, hesabat dövründə ən çox vəsait Kəlbəcər (781 mln. 429 min manat), Ağdam (432 mln. 668 min manat), Zəngilan (345 mln. 685 min manat) və Laçın ( 323 mln. 961 min manat) rayonlarına ayrılıb.

Xatırladaq ki, cari ilin yanvar-sentyabr ayları ərzində Azərbaycanda bütün maliyyə mənbələrindən əsas kapitala 13 milyard 48,1 milyon manat vəsait yönəldilib ki, bunun da 10 milyard 281.9 milyon manatı tikinti quraşdırma işlərinə sərf edilib.

Beləliklə, hesabat dövründə azad olunmuş ərazilər üzrə tikinti-quraşdırma işlərinə sərf olunan vəsait respublika üzrə tikinti-quraşdırma işlərinə sərf olunan vəsaitin 30.6%-ni təşkil edib.

Aşağıdakı diaqramda cari ilin yanvar-sentyabr ayları ərzində azad edilmiş ərazilərdə rayonlar üzrə tikinti-quraşdırma işlərinə yönəldilən vəsaitin həcmi verilib:

Əlavə edək ki, azad olunmuş ərazilərin yenidən qurulması və bərpası məqsədilə bu ilin 9 ayında dövlət büdcəsindən 2.9 milyard manat vəsait xərclənib.

Ermənistanda kəndlər boşalır, məktəblər bağlanır -

admin — Thu, 13 Nov 2025 10:55:04 +0400

Ermənistanda hər ötən gün insanların sosial rifahı ağırlaşır. Bu əhali kəndlərdən paytaxt İrəvana üz tutur. Məsələn Karmraşen kəndi günü-gündən boşalır. Məhz bu demoqrafik tənəzzül fonunda kənd məktəbinin bağlanması barədə qərar qəbul edilib.

Press-fakt fransızdilli erməni saytı “armenews.com”a istinadən xəbər verir ki, "Bizim yol" hərəkatının gənclər mərkəzinin koordinatoru Narek Sukiasyan bu barədə “Facebook” səhifəsində yazıb: "Şəkildə gündən-günə boşalmaqda olan Vayots Dzor bölgəsindəki Karmraşen kəndi əks olunub. Məhz demoqrafik tənəzzül fonunda kənddəki yeganə, eləcə də illərlə nəsillərə təhsil verən məktəbin bağlanmasına artıq qərar verilib. Hazırkı məlumatlara görə, 2013-cü illə müqayisədə oradakı şagirdlərin sayı 92% azalaraq 12 ildə 28-dən cəmi 2-yə düşüb. Qeyd edək ki, bu kəskin azalma 2018-ci ildən başlayıb. 2013-cü ildən 2018-ci ilə kimi şagirdlərin sayı 35% azalaraq, 28-dən 18-ə, 2018-2015-ci illərdə isə 88% azalaraq 18-dən 2-yə düşüb. Bu gün biri “C”-1, digəri 3-cü sinifdə olmaqla cəmi iki şagird qalıb”.

N. Sukiasyanın yazdığına görə, kənd camaatı ilə söhbət etdikdə məlum olur ki, onların getmələrinin əsas, hətta tək səbəbi işsizlikdir:

“Gənclər daha yaxşı, firavan həyat dalınca şəhərə üz tuturlar, kənd həyatı günü-gündən ölür. Həmin məktəbdəki iki şagird görünür, qonşu Herher kəndinə getmək və təhsillərini davam etdirmək üçün gündə 200 dram xərcləməli olacaqlar. Onların təhsili risk altındadır. Bununla belə, Herher təxminən 8 km məsafədədir və qışda yollar çox vaxt keçilməz olur. Bu şərtlər altında uşaqlar sadəcə olaraq qanunla təmin olunmuş təhsil hüququndan məhrum olacaqlar. O zaman belə bir sual yaranır: məktəbi bağlamaqla, kəndin son ümidini məhv etməkdənsə, kənddə zavodlar tikmək, iş yerləri yaratmaq, sakinlərə qalıb onun inkişafına töhfə vermək daha məntiqli olmazdımı?!”.

Naftalanın icra başçısı VƏZİFƏSİNDƏN AZAD EDİLİB

admin — Wed, 12 Nov 2025 15:00:06 +0400

Vüqar Vahid oğlu Novruzov Naftalan Şəhər İcra Hakimiyyətinin başçısı vəzifəsindən azad edilib.

Press-fakt President.az-a istinadla xəbər verir ki, bununla bağlı Prezident İlham Əliyev sərəncam imzalayıb.

Dövlət başçısının digər sərəncamı ilə Vüqar Vahid oğlu Novruzov Göygöl Rayon İcra Hakimiyyətinin başçısı təyin edilib.