İran Azərbaycanla sərhədini bağladı?
- RƏSMİ AÇIQLAMA (YENİLƏNDİ)
Azərbaycan-Türkiyə və Azərbaycan-İran arasında quru sərhədlərinin bağlanması ilə bağlı məlumat yayılıb. Vətəndaşların ötən gündən etibarən Naxçıvan Muxtar Respublikası ərazisində Sədərək və Culfa gömrük-sərhəd buraxılış məntəqələrində qaldığı bildirilir.
İran İslam Respublikasının Azərbaycandakı səfirliyinin Mətbuat şöbəsindən Modern.az-ın sorğusuna cavab olaraq bildirib ki, quru sərhədlərinin iki ay müddətinə bağlanması haqda xəbər həqiqəti əks etdirmir.
Rəsmi açıqlamada qeyd olunub ki, ötən ilin noyabr ayından etibarən İranın bütün quru, hava və dəniz sərhədləri beynəlxalq turistlər və qonşu dövlətlər, xüsusən İran və Azərbaycan sərhədləri, eləcə də İran və Naxçıvan Muxtar Respublikasının sərhədləri üçün açıqdır:
"İran İslam Respublikasından beynəlxalq turistlərin və qonşu ölkələrin vətəndaşlarının ölkəyə giriş-çıxışı üçün heç bir məhdudiyyət yoxdur".
Bundan əlavə, Azərbaycan Dövlət Sərhəd Xidmətinin İctimaiyyətlə əlaqələr şöbəsindən Modern.az-ın sorğusuna cavab olaraq bildirilib ki, Nazirlər Kabineti yanında Operativ Qərargahın qərarına əsasən, quru sərhədləri 1 sentyabra qədər bağlıdır:
“Dövlət Sərhədi Xidməti tərəfindən hazırda vətəndaşların dövlət sərhədindən buraxılışı Nazirlər Kabinetinin 20 iyun 2022-ci il tarixində 232 nömrəli qərara müvafiq olaraq müəyyən etdiyi qaydalara uyğun olaraq həyata keçirilir".
Xatırladaq ki, Azərbaycanın pandemiya səbəbindən quru sərhədləri indiyədək bağlı olsa da, Naxçıvan ərazisindən Türkiyəyə keçid açıq idi. İran da xeyli müddətdir ki, qonşu ölkələrlə quru sərhədlərini açıb. Bundan sonra Azərbaycan vətəndaşları xüsusi icazə ilə quru sərhədini keçərək İrana səfər edə bilirdi. Həmçinin Bakıdan Naxçıvana gedən avtobuslar da İrandan keçməklə hərəkət edirdi.
xxx
İyulun 1-dən etibarən İran Azərbaycanla quru sərhədlərini iki ay müddətinə bağlamaq qərarı verib.
Globall.az xəbər verir ki, bu barədə məlumat sosial şəbəkələrdə yayılıb.
İyulun 1-dən nə İran vətəndaşları Azərbaycana, nə də Azərbaycan vətəndaşları İrana səfər edə biləcəklər. Naxçıvan istiqamətində də sərhədlər bağlı olacaq.
İranın quru sərhədlərini bağlamasının konkret səbəbi bilinmir.
Xatırlaq ki, Azərbaycan pandemiya səbəbindən quru sərhədərini açmayıb. İran isə xeyli müddətdir ki, qonşu ölkələrlə quru səhədini açıb. Azərbaycan vətəndaşları xüsusi icazə ilə quru sərhədini keçərək İrana səfər edə bilirdi. Bundan başqa, Bakıdan Naxçıvana gedən avtbuslar da İrandan keçməklə hərəkət edirdi.
Bir neçə gün əvvəl yayılan məlumata görə, Azərbaycan quru sərhədini keçmək üçün tələb olunan xüsusi icazələr ləğv edilib. (cebhe.info)