Kürdəmirdə baş vermiş qəzada ölən digər şəxsin kimliyi məlum olub
Ötən gün Kürdəmirdə "Mercedes Sprinter" markalı mikroavtobusun mişar daşı ilə dolu "KamAZ"a çırpılması nəticəsində ölən digər şəxsin kimliyi məlum olub. "Report" xəbər verir ki, bu, mikroavtobusun sərnişini olmuş Nüsrət Əliyevdir. Qeyd edək ki, mayın 3-də Bakı-Ələt-Qazax-Gürcüstan dövlət sərhədi avtomobil yolunun Kürdəmir rayonunun Karar kəndi ərazisindən keçən hissəsində "Mercedes Sprinter" markalı sərnişin daşıyan mikroavtobus qarşısında hərəkət edən mişar daşı ilə dolu "KamAZ" markalı yük maşınına çırpılıb. Qəza zamanı Quliyev Fəxrəddin Məhəmmədhəsən oğlu, Quliyev Elgün Rəhbər oğlu, Məmmədova Zeynəb Mübariz qızı, Quliyeva Zəhra Vüqar qızı, Quliyev Məhəmməd Vüqar oğlu, Quliyeva Qələmnaz Vüqar qızı, Əliyev İlqar Gəray oğlu, Mehdiyev Eldəniz Zahid oğlu xəsarət alıblar, Həmidə Quliyeva isə dünyasını dəyişib. Faktla bağlı Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanılıb, istintaq aparılır.