2019-cu il: Dünyada nələr oldu -
“Venesuela baharı”ndan "İran payızı"na qədər - Təhlil
2019-cu ilin əvvəli ABŞ prezidenti Donald Trampın Çin mallarının idxalına əlavə vergi qoyulmasıyla başlayan Vaşinqton-Pekin ticarət müharibəsi ilə yadda qaldı. ABŞ-ın əlavə vergi tətbiq etməsinə cavab olaraq, Çin də Amerikaya qarşı adekvat addımlar atdı. İlin ortalarından etibarən iki ölkə arasında yeni ticari müqavilənin imzalanması ilə bağlı danışıqlar başlansa da, Honkonqdakı kütləvi etirazlara Vaşinqtonun dəstək verməsi və nümayişlərin dağıdılmasına qarşı çıxması Pekinlə münasibətləri yenidən dalana dirədi. Odur ki, yeni Amerika-Çin ticari müqaviləsinin 2019-cu ildə imzalanması mümkün olmadı.
2019-cu ilin avqust ayında “Böyük Yeddiliy”in Fransada keçirilən sammitinə Rusiyanın dəvət olunmaması Qərbin Moskvaya qarşı izolyasiya siyasətini davam etdirdiyini bir daha göstərdi. Dekabr ayında Londonda keçirilən NATO-nun 70 illiyinə həsr olunmuş sammitində qəbul olunan bəyanatda da, Şimali Atlantika Alyansına qarşı ən böyük təhlükənin Rusiya və terrorizm olduğu qeyd edildi. Qərbin Rusiyadan hazırkı məqamda ən böyük tələbi Ukraynadakı münaqişəyə son qoymasıdır. Məhz munaqişənin həllindən sonra ABŞ və Avropa Rusiyaya qarşı sanksiyaları yumşaldacaqlarına söz verirlər.
2019-cu Ukraynada keçirilən prezident seçkilərində qaləbə qazanmış komik aktyor, “Xalqın xidmətçisi” serialında baş rolun ifaçısı olmuş Vladimir Zelenskinin eyniadlı partiyası ölkədə keçirilən növbədənkənar parlament seçkilərində qələbə qazanaraq, Radada üstünlüyü əldə edir. Putin ilə Zelenski Ukraynada mövcud olan münaqişənin həllilə bağlı yenidən Normad Formatının bərpası və Fransa ilə Almaniya liderlərinin vasitəçiliyi ilə kifayət qədər konstruktiv danışıqlar aparmağa nail olurlar. Rusiya ilə Ukrayna prezidentləri arasında münaqişə ilə bağlı əldə olununan əsas nəticə kimi əsirlərin mübadiləsi və atəşkəsin elan olunmasını vurğulamaq olar.
ABŞ prezidenti Donald Trampın Zelenski ilə iyul ayındakı telefon danışığı isə ona impiçment bahasına başa gəldi. Tramp ukraynalı həmkarından tələb edirdi ki, Amerikanın keçmiş vitse-prezidenti Co Baydenin oğlu ilə bağlı təhqiqatın aparılmasına göstəriş versin. Vaxtilə Ukraynanın neft-qaz şirkətlərinin birinin idarə heyətində təmsil olunmuş Co Baydenin oğlu Hanter, Trampın fikrincə, Ukraynadakı korrupsiya sxemlərində iştirak edib. Bu telefon danışığı barədə məlumat yayıldıqdan sonra isə ABŞ konqresi Donald Trampın tutduğu vəzifədən öz məqsədləri üçün istifadə etməsi qərarına gələrək, ona qarşı impiçment qərarını qəbul etdi. Qeyd edək ki, keçmiş vitse-prezident Co Baydenin 2020-ci ildə keçiriləcək prezident seçkilərində Demokrat partiyasından namizədliyini irəli sürəcəyi gözlənilir.
2019-cu ildə Avropa məkanının ən çox müzakirə olunan mövzusu Böyük Britaniyanın Avropa İttifaqını tərk etməsi ətrafında baş verən siyasi proseslər oldu. İlin əvvəlində baş nazir seçilən Boris Conson oktyabr ayına kimi ölkəsini ittifaqdan çıxaracağına söz versə də, parlamentdə müxalifətin ciddi etirazları ilə qarşılaşdı. Baş nazirin təklifi ilə Kraliça II Yelizaveta parlamentin fəaliyyətini müvəqqəti dayandırmaq qərarına gəlsə də, bu addım əhalinin narazılığı ilə nəticələndi. Bu səbəbdən, yenidən parlament seçkilərinin keçirilməsi qərara alındı və Boris Conson növbəti dəfə baş nazir seçildi. Yekunda 2019-cu il ərzində də Britaniya Avropa İttifaqından çıxmağa müvəffəq ola bilmədi.
2019-cu ildə Suriyada baş verən proseslər nəticəsində yaranmış yekun mənzərədən Yaxın Şərqdə gələcəkdə formalaşacaq qüvvələr nisbətini müəyyən etmək mümkündür. Amerikanın Suriyadan öz qoşunlarını çıxarması ilə Türkiyə Suriya ərazisinə hərbi müdaxilə edərək 30 km-lik məsafədə ölkənin daxilinədək irəliləyə bildi. Məhz Türkiyənin Suriyada hərbi əməliyyatlar keçirdiyi dövrdə ABŞ qüvvələri illərdir mübarizə apardıqları İŞID terror qruplaşmasının lideri Əl-Baqdadini məhv etməyə müvəffəq oldular.
Türkiyə paralel olaraq öz sərhədboyu ərazilərində mövqe tutmuş kürd terrorçularını məhv tmə üzrə əməliyyatları uğurla həyata keçirdi. Doğrudur ABŞ Konqresi kürdlərə qarşı əməliyyatı Türkiyəyə bağışlamadı və “erməni soyqırımı” barədə qətnaməni qəbul etdi. Beləliklə? 2019-cu il İŞID terror qruplaşmasının sonu və qondarma “erməni soyqırımı”nın Amerika konqresi tərəfindən tanınması ili kimi tarixə düşdü.Dünyada ilin yekunları: "Venesuela baharı"ndan "İran payızı"na qədər
2019-cu ilin əvvəlində Venesuela müxalifətinin lideri, eyni zamanda parlamentin spikeri Xuan Quaydo ölkədə prezident Maduronun qələbəsi ilə başa çatmış seçkilərin nəticələrini qeyri-qanuni adlandıraraq, özünü prezident elan edir. ABŞ, Avropa Birliyi və bir sıra Latın Amerikası ölkələrinin Quaydonu, Rusiya, Türkiyə, İran və Kuba kimi dövlətlərin isə Maduronu prezident kimi tanıması Venesuelada faktiki ikihakimiyyətlilik yaratdı. Vətəndaş müharibəsi vəziyyətinə gələn ölkədə ilin ortasında prezident Maduronun əmrilə xarici hərbi müdaxiləyə qarşı Kolumbiya ilə sərhəddə hərbi təlimlərə başladıldı.
Rusiyanın Venesuellaya hərbi yardım göstərməsi, ABŞ rəsmilərinin Karakasa qarşı hərbi əməliyyatları istisna etməməsi bu ölkənin növbəti qaynar nöqtəyə çevriləcəyi barədə proqnozların səslənməsinə əsas yaradırdı. “Qırğı” siyasətinin ABŞ-ın qonşuluğunda müharibə ocağının yaranması ilə nəticələnəcəyindən ehtiyatlanan Vaşinqtonun sentyabr ayından etibarən xarici siyasətində “yumşalma” sezilməyə başladı və bunun nəticəsi olaraq prezidentin mili təhlükəsizlik məsələləri üzrə müşaviri Con Bolton Donald Tramp tərəfindən istefaya göndəridi. Con Bolton Amerikanın xarici siyasətdə sərt və qətiyyətli addımların tərəfdarı kimi çıxış edirdi.
2019-cu il Yaxın Şərqdə “Ərəb baharı” yenidən baş qaldırdı. 2011-ci ildən fərqli olaraq, bu dəfə “Ərəb baharı” nın yelləri İran da daxil olmaqla, onun siyasi təsir dairəsində olan İraq və Livanın üzərindən əsməklə, “şiə oxu”nda sabitliyi pozdu. İraq və Livanda sosial şəbəkələr vasitəsilə təşkilatlanan və heç bir liderləri olmayan yüz minlərlə insan mövcud idarəetmə rejiminə qarşı çıxdılar. Nəticədə bu ölkələrin hökumətləri istefays getməli oldu. Ancaq bu, etirazçıları qane etmədi və onlar mövcud siyasi sistemin ləğvini tələb etməyə başladılar.
Bunun ardınca regionun ən qüdrətli dövləti olan İranda benzinin qiymətinin artmasına etiraz olaraq, kütləvi nümayişlər baş qaldırdı. İran hökuməti etirazların xaricdən idarə olunduğunu iddia edərək və təhlükəsizlik məqsədilə ölkə ərazisində interneti kəsmək qərarına gəldi. Məhz bu səbəbdən İranda baş verənlər barədə hələ ki, tam dəqiq məlumat almaq mümkün deyil. Bəzi ekspertlər İranın hazırda SSRİ-nin dağılmaq ərəfəsindəki vəziyyətini xatırlatdığını bildirirlər. Artıq Tehran iqtisadi sanksiyalar və neftin dünya bazarında qiymətinin düşməsi səbəbilə gəlirləri kəskin azaldığı üçün nəinki özündən asılı olan Livan, İraq və Suriya kimi dövlətləri nəzarətdə saxlaya bilmir, eyni zamanda, sosial-iqtisadi problemlərə görə öz əhalisinin kütləvi etirazları ilə qarşılaşıb. Yaxın Şərqdə İranın başçılıq etdiyi şiə blokunun zəifləməsi qüvvələr balansının dəyişməsi və gələcəkdə yeni güc mərkəzlərinin yaranması ilə nəticələnə bilər.
2019-cu ildə dünya ictimaiyyətinin diqqətini Yeni Zelandiyada dini zəmində baş vermiş terror hadisəsi də cəlb etdi. Hadisədə diqqət çəkən əsas məqam, terrorun adət olunduğu kimi müsəlman qruplaşmaları deyil, xristian terrorçu tərəfindən müsəlmanlara qarşı törədilməsi və sosial şəbəkədə canlı yayımlanması idi. Belə ki, martın 15-də Kraystçerç şəhərində avstraliyalı Brenton Tanant Əl-Nur məscidində ibadət edən müsəlmanları güllələyərək, Facebook sosial şəbəkəsi vasitəsilə canlı yayınladı. Brenton Tanant hücumdan əvvəl yazdığı manifestdə öz hərəkətlərini müsəlmanlara qarşı terror aktı kimi qiymətləndirdi. Facebook-da yerləşdirilmiş videoda Tanantın ibadət edən müsəlmanları qətlə yetirməsini hər kəs izləyə bilərdi.
Terror aktı nəticəsində ümumilikdə 50 nəfərin öldüyü, onlarla insanın isə yaralanması barədə məlumat verildi. Bu hadisədən sonra dünyanın müxtəlif yerlərində anoloji hücumların baş verməsi qlobal səviyyədə yeni bir xristian-müsəlman müharibəsinin başlayacağı barədə ehtimallara inamı artırırdı.
Aprelin 21-22-də Şri Lankada keçirilən katoloklərin Pasxa bayramında üç xristian kilsəsində 290 nəfərin ölümü, 500-ə yaxın insanın isə yaralanması ilə nəticələnən partlayışın törədilməsi Kraystçerçdə güllələnən müsəlmanların qisası kimi qələmə verildi. Ancaq sonrakı hücumların qarşısının dərhal alınması və Brenton Tanantın məlum videosunun sosial şəbəkələrdə yayılmasına qadağa qoyulması hadisənin qlobal təsirnin qarşısını aldı.
Xristian aləmini sarsıdan digər bir hadisə isə Parisin mərkəzində Notr-Dam kilsəsində yanğının baş verməsi idi. Bütün dünya canlı yayında Parisin simvollarından birinin alışmasına tamaşa edir, minlərlə Paris sakini dizləri üstə çökərək elə küçələrdəcə dua edirdilər. Yanğın tezliklə söndürüldü və söndürüldükdən sonra məlum oldu ki, kilsənin əsas divarlarına heç bir ziyan dəməyib. Yanğın nəticəsində əsasən kilsənin dam örtüyü zərər görmüşdü. Aparılan araşdırmaya baxmayaraq yanğının baş vermə səbəbi hələ də məlum deyil.