Azərbaycan tarixində böyük nailiyyətlərə şahidlik edirik. O nailiyyətlər ki son 200 ildə baş verməyib. Xalqımız qələbə ab-havasına həsrət idi. Torpaqlar işğalda, 1 milyondan artıq qaçqın və məcburi köçkün, onların problemləri, cəbhədən gələn şəhid xəbərləri... Bütün bunlar Azərbaycan insanını usandırmışdı, haqq-ədalətin bərpası istənilirdi. Təbii ki, belə böyük arzu və reallıq nadir hallarda üst-üstə düşür. Xalq ümidini itirməmişdi, çünki ölkədə Heydər Əliyev siyasi kursu davam edirdi və edir də. Nə edək ki, düşmənlərimiz çox olub, ölkəmizə daim hücum ediblər, torpaq itirmişik… Prezident İlham Əliyev tarixi missiyanı üzərinə götürürək və məqamında dəqiq addımlar ataraq Azərbaycan xalqını qalib xalqa çevirdi. 30 ilə yaxın müddətdə işğal altında olan torpaqların azad edilməsi, keçmiş məcburi köçkünlərin yurd-yuvalarına köçməsi prosesini yalnız cənab İlham Əliyev kimi şəxsiyyət həyata keçirə bilərdi.

Xalqımızın milli qüruru bərpa edildi. Ali Baş Komandan Qarabağda separatizmin kökünü kəsməklə təkcə Azərbaycan xalqını deyil, region xalqlarını bəladan xilas etdi, bütövlükdə dünyaya sülh bəxş etdi. Baxın, Azərbaycana qarşı qərəzli davranan Fransa və digər dövlətlərin dəstəyi ilə Ermənistan Qarabağda nələr edirdi… Terrora dəstək, narkoticarət və s. Azərbaycan isə təkbaşına nələr edir: Qarabağ dirçəlir, bölgəyə ruh, həyat gəlib, abadlıq-quruculuq işləri həyata keçirilir, təhlükəsizliyə təminat verilərək investorlar dəvət edilir. Xankəndidə futbol oynunun təşkil edilməsi bir daha göstərir ki, Azərbaycan döyüş poliqonuna çevrilən ərazini futbol meydançasına çevirdi, sülh mesajı verdi. Daha bundan artıq nə edilməlidir ki? Cənab Prezident illər əvvəl vəd vermişdi, yerinə yetirdi. Hələ Prezidentin şəhid övladları ilə matçı izləməsi sübut edir ki, dövlət başçısı hər bir şəhid ailəsinin, qazinin yanındadır.

Ali Baş Komandanın təbirincə desək, bəli, biz qayıtmışıq, özü də birdəfəlik. Sülh sazişi də imzalanacaq, daha Qarabağdan atəş səsləri gəlməyəcək, cənab İlham Əliyevin rəhbərliyi ilə bölgədə mərhələli şəkildə həyat tam bərpa olunacaq. Buna əminik. Dünyada cənab İlham Əliyevin adı Azərbaycanın adı ilə asossiasiya olunur. Xalqa elə bir möhtəşəm hislər yaşadıb, qələbələr bəxş edib ki, ölkəni İlham Əliyevsiz təsəvvür etmək çox çətindir. Birmənalı deyə bilərik ki, müasir Azərbaycanın qurucuları ümummilli lider Heydər Əliyev və onun siyasi kursunun davamçısı İlham Əliyevdir. “Nəyi, necə, nə vaxt etmək lazımdır, bunu mən bilirəm. Azərbaycan xalqı mənə inanır”, “Bizim sözümüz imzamız qədər dəyərlidir” ifadələri artıq xalqın dilində əzbərdir, dövlət başçısı doğru deyir, insanlar ona inanır, güvənir, bilir ki, xalqı istənilən təhlükədən xilas edə biləcək gücə və zəkaya sahibdir. Azərbaycan xalqı qədirbilən xalqdır, müşahidələrimiz onu göstərir ki, nə qədər ki cənab İlham Əliyev Prezident seçkilərində namizəd olacaq, xalq öz liderinə heç vaxt “yox” deməyəcək.

Bu, həm də minnətdarlıq jestidir. Dəqiq yanaşmadır ki, İlham Əliyevin ölkədə alternativi yoxdur. Bunu hazırda Prezidentliyə namizədliklərini irəli sürənlər də çox yaxşı bilirlər. Sadəcə, qanunvericiliyə uyğun olaraq, hər bir Azərbaycan vətəndaşının seçkilərdə seçici və namizəd kimi iştirak etmək haqqı var. Özlərini “ana müxalifət” adlandıranların bir çıxış yolları vardı: O da geri çəkilmək. Çünki İlham Əliyev kimi şəxsiyyətin namizəd olduğu seçkilərdə qələbə qazanmaq müşkül məsələdir, əksini təsəvvür etmək qeyri-mümkündür. İşğalda olan torpaqları cəmi 44 günə, o cümlədən Xankəndini azad etməklə separatçıları 2 günə təmizləyən liderin qarşısında dayanmaq, əlbəttə, çətindir. Bu mənada onları da başa düşmək lazımdır. Əliyevin ölkədəki reytinqi pik həddədir. Bir misal ilə bunu əsaslandırım: Əvvəllər müxalifət liderləri tənqid çıxışlarını sosial şəbəkələrdə paylaşardılar, şərhlərdə hakimiyyət xeyli tənqid edilərdi. Amma indi mənzərə fərqlidir, insanlar müxalifət liderlərinin özlərini tənqid edirlər. Bu o deməkdir, cənab Prezident Azərbaycan insanının qəlbini fəth edib, "dəmir yumruq" ətrafında birləşdirib, bütövləşdirib.

Mən uzun müddət prezident seçkilərində, ümumxalq səsverməsində, parlament və bələdiyyə seçkilərində müstəqil müşahidəçi olmuşam, seçki qutuları açılanadək məntəqəni tərk etməmişəm. Seçkilərə qədərki müddətdə də jurnalist kimi bu prosesləri yaxından izləmişəm, işıqlandırmışam. Tam əminliklə deyə bilərəm ki, xalq cənab İlham Əliyev və onun komandasına inanır və etimad göstərir. Seçki prosesini bu qədər yaxından izləsəm də, heç vaxt seçici kimi səsvermədə iştirak etməmişəm. Amma 2024-cü ildə fevralın 7-də keçiriləcək növbədənkənar Prezident seçkilərində iştirakı özümə borc bilirəm. Əminəm ki, Azərbaycanın hər bir vətəndaşının səsi cənab İlham Əliyev üçün önəmlidir. Səsvermədə iştirak etməklə minnətdarlığımı ifadə etmiş olacağam. Cənab Prezident, Ali Baş Komandan İlham Əliyev, Sizi doğum gününüz münasibətilə təbrik edir, uzun ömür, can sağlığı, Sizə və sabit komandanıza fəaliyyətinizdə uğurlar arzulayıram. Nə qədər ki Azərbaycan var, İlham Əliyevin adı tarixin ən dəyərli hissəsində olacaq. Hələ görüləcək işlər çoxdur, yola davam!

İlkin Pirəli