Bir zamanlar Ukrayna müharibəsini 24 saata bitirəcəyini deyən ABŞ Prezidenti Donald Tramp indi bunun olduqca çətin olmasından gileylənir. Əvvəlcə Ukraynanı və Avropanı günahlandırıb, Putini tərifləyən Tramp indi bunun əksini etməyə, müharibənin əsas günahkarını öz adı ilə çağırmağa məcburdur…

Ötən gün Tramp artıq səkkizinci dəfə (!) Vladimir Putinin hərəkətindən məyus olduğunu bəyan etdi.

Ağ Evdə Kanadanın Baş naziri Mark Karni ilə görüşü zamanı Amerika lideri bəyan edib ki, Rusiyanın Ukraynaya qarşı müharibəsinə son qoymaq Yaxın Şərqdə sülhə nail olmaqdan daha çətindir: "Bu, ağılsızlıqdır, tamamilə dəlilikdir. Düşündüm ki, bu, asan işlərdən biri olacaq. Mənim Putinlə yaxşı münasibətim var və bunun həll oluna biləcəyini düşünürdüm. Mən ondan çox məyus oldum, çünki bunun asan olacağını düşünürdüm, lakin məlum oldu ki, bu, Yaxın Şərqdən də çətindir".

O əlavə edib ki, onun məlumatlarına görə, təkcə ötən həftə Ukraynada gedən döyüşlərdə 7812 nəfər həlak olub.

Beləliklə, Amerika Prezidenti səkkizinci dəfədir ki, ictimai çıxışlarında Putindən məyus olduğunu bildirir. O, bunu ilk dəfə iyulun 1-də Kreml rəhbəri ilə telefon danışığından sonra demişdi. İyulun 8-də Tramp “məyusluğunu” təkrarlayıb və Ukraynanı əlavə silahlarla təchiz etmək planlarını açıqlayıb.

İyulun 15-də o, yenə "məyus olduğunu, amma hələ də onunla əlaqə saxladığını" qeyd edib.

İyulun 28-də Tramp "Prezident Putindən çox məyus oldum. İşlərin necə inkişaf edəcəyini görəcəyik" sözlərini təkrarlayaraq, Ukraynadakı müharibəni dayandırmaq üçün Putinə daha əvvəl verdiyi 50 günlük müddəti qısaltmaqla hədələdi.

Sentyabrın 2-də Amerika lideri eyni ifadəni təkrarladı: "Mən ondan çox məyus oldum. Bizim hər zaman əla münasibətimiz olub, amma məyus oldum".

Sentyabrın 25-də Tramp Türkiyə Prezidenti Rəcəb Tayyib Ərdoğanla görüşündə yenidən Putindən məyus olduğunu xatırladıb və Rusiya neftinin alınmasını dayandırmağa çağırıb.

Sentyabrın 30-da jurnalistlərə açıqlamasında Tramp bir daha deyib: "Mən Vladimir Putindən çox məyus oldum. Düşündüm ki, o, bunun öhdəsindən gələcək".

Ümumiyyətlə, Donald Tramp ikinci prezidentlik müddətinin əvvəlindən Rusiyanın Ukraynaya qarşı müharibəsinə son qoymağa çalışdığını göstərir. O, Kremli yeni sanksiyalarla hədələyir və sülh sazişi üçün son tarixlər qoyur. Lakin bu müddətlər bitdikdən sonra heç bir addım atılmır, sanksiyalar tətbiq olunmur.

Tramp Putinlə bir neçə dəfə telefonla danışıb və avqustda onlar hətta Alyaskada şəxsən görüşüblər. Ancaq bu da nəticə verməyib. Rusiya tərəfi dəfələrlə atəşkəs təkliflərini rədd edərək, bilərəkdən qeyri-mümkün şərtlər qoyub və üzbəüz yüksək səviyyəli danışıqlardan sonra hətta Ukraynanın mülki infrastrukturuna hücumları daha da gücləndirib.

Bütün bunlardan sonra Trampın 8-ci yox, 88-ci dəfə də şikayət etməsi faydasız görünür. Çünki müasir reallıq gücdən başqa heç bir dil tanımayan işğalçı Rusiyaya qarşı şikayət, söz, bəyanat yox, konkret, sərt və cəsarətli hərəkətlər tələb edir…

C.Məmmədli