GENERALIN QARDAŞI OĞLU DUBAYDAKI MƏNZILLƏRINI SATIŞA ÇIXARDI - Zeynalovlar bahalı şəhərləri “fəth edir” /FOTOLAR
Araşdırmaçı jurnalist Cavanşir Həsənli “Facebook” səhifəsində Respublika Dövlət Yol Polisi İdarəsinin rəisi, general Ramiz Zeynalovun yaxınlarının xarici ölkələrdəki biznes fəaliyyətindən yazıb.
Press-fakt jurnalistin qeydlərini təqdim edir:
“General Ramiz Zeynalovun qardaşı oğlu Aqil Zeynalov Dubayda ümumi dəyəri 620 min manat olan iki mənzilini daşınmaz əmlak satış platformasında satışa çıxarıb.
Dubayın aparıcı əmlak portallarından biri olan "Propertyfinder.ae" saytında yerləşdirilmiş elana görə, mənzillərdən biri Əzizi Rivera yaşayış kompleksində yerləşir və onun satış qiyməti 700 min dirhəm (təxminən 324 min manat) təşkil edir. İkinci mənzil isə Xalianın (Dubay) 18-ci rayonunda yerləşir və 640 min BƏƏ dirhəmi (təxminən 296 min manat) qiymətinə satışa çıxarılıb.
Hər iki mənzil Aqil Zeynalovun Birləşmiş Ərəb Əmirliklərində qeydiyyatdan keçmiş “ZEYNALOVS REAL ESTATE L.L.C.” (“Zeynalovlar Daşınmaz Əmlak” MMC) şirkəti tərəfindən satışa təqdim edilib.

Artıq beş ildir daşınmaz əmlak bazarında fəaliyyət göstərən bu şirkətin rəsmi internet səhifəsində – www.zeynalovsrealestate.com](http://www.zeynalovsr... ünvanında da satış və ya kirayə məqsədilə təklif olunan bir neçə mənzil və ofis mövcuddur.
Məlumata görə, “Zeynalovlar Daşınmaz Əmlak” şirkətinin ofisi Dubayın Bay meydanındakı Bay Business binasında yerləşir.

Aqil Zeynalovun adı Azərbaycanda da müxtəlif biznes sahələri ilə bağlı hallanır. O, “YükTaksisi.az” və “Evakuator.az” şirkətlərinin rəhbəri, həmçinin “Evakuasiya.az” MMC-nin qanuni təmsilçisi kimi qeyd olunur.
Generalın qardaşı oğlu iki il əvvəl İngiltərədə ortaqlıq əsasında qeydiyyatdan keçirdiyi “Versatile Business Ventures LTD” şirkətinin də təsisçilərindən biri olub. Bu şirkət proqram təminatı və informasiya texnologiyaları sahəsində fəaliyyət göstərib, lakin 2025-ci ilin yanvarında fəaliyyətini dayandırıb.
Aqil Zeynalovun həmin şirkətdəki ortağı Cəfər Nəcəfov – Baş Dövlət Yol Polisi İdarəsinin Yol Patrul Xidməti Alayının sabiq rəis müavini Xosrov Nəcəfovun oğludur. Cəfər Nəcəfov 50-dən çox mobil oyun və tətbiqin müəllifidir.

Zeynalovla Nəcəfovun daha bir ortaq fəaliyyəti “Nextool” layihəsi ilə bağlıdır. Bu layihə hazırda 10 mindən çox süni intellekt (AI) alətini təqdim edən geniş kataloqa malikdir. Ortaqlar "NEXTOOL" süni intellekt platformasını genişləndirmək üçün 1 milyon dollar investisiya toplamaq üzərində çalışırlar.
Cəfər Nəcəfov 2010-cu ildə ABŞ-ın San-Fransisko şəhərində “JOOPZY LLC” adlı onlayn ticarət platformasını təsis edib, 2017-ci ildə isə həmin şirkəti Gürcüstanda da qeydiyyatdan keçirib.
Aqil Zeynalovun biznes fəaliyyəti yalnız Azərbaycan və Dubayla məhdudlaşmır. O, Polşanın paytaxtı Varşavada da yükdaşıma xidməti ilə məşğul olan “166 Cargo and Logistics Sp. Z O.O.” adlı şirkətin sahibidir.
Bu şirkət 2023-cü il mayın 11-də qeydiyyatdan keçib və aktiv statusa malikdir. Fəaliyyət sahəsinə yükdaşıma, anbar, lizinq və icarə xidmətləri daxildir. 2023-cü ilin maliyyə hesabatına görə, şirkətin balansında olan nəqliyyat vasitələrinin ümumi dəyəri 457.915,71 Polşa zlotisi (təxminən 124 min dollar) təşkil edir.

Zeynalovun biznes fəaliyyəti bununla da bitmir. O, son illərdə Mərkəzi Asiyada, xüsusilə Özbəkistanda da investor kimi çıxış edir. 2024-cü ildə Aqil Zeynalov Daşkənddə 100 milyon nizamnamə kapitalı ilə “AZ PAK Mas’uliyati Cheklangan Jamiyati” (“AZ-PAK” Məhdud Məsuliyyətli Cəmiyyəti) adlı şirkəti qeydiyyatdan keçirib.
Təbii ki, bu məbləğ Özbəkistan somu ilə göstərilib və ümumilikdə 8 239 dollar təşkil edir.
Rəsmi sənədlərə əsasən, şirkətin 100 faiz pay sahibi Dövlət Yol Polisi İdarəsinin rəisi Ramiz Zeynalovun qardaşı oğlu Aqil Zeynalov, direktoru isə Baş Dövlət Yol Polisi İdarəsinin Yol Patrul Xidməti Alayının keçmiş komandir müavini, polkovnik Xosrov Adil oğlu Nəcəfovdur.
Xosrov Nəcəfov, eyni zamanda, xalq artisti Mələkxanım Əyyubovanın həyat yoldaşıdır".
Rasim