Lisey direktorunun müavini 35 minə direktor təyin edilmək istəyirmiş, dələduzluqla üzləşib
Bakı Ağır Cinayətlər Məhkəməsində dələduzluq və rüşvətə təhrik etməkdə təqsirləndirilən Vasif Əliyevin (şərti) cinayət işi üzrə məhkəmə prosesi başa çatıb. Globall.az Pravda.az-a istinadən bildirir ki, hakim Şəlalə Həsənovanın sədrliyi ilə keçirilən prosesdə hökm oxunub. Məhkəmənin hökmü ilə dövlət ittihamçısının ittihamdan hissəvi imtina barədə vəsatəti təmin edilib. Təqsirləndirilən şəxsə qarşı Cinayət Məcəlləsinin 29, 178.2.4 və 32.4, 312.2-ci maddələri ilə aparılan cinayət təqibinə xitam verilib. Vasif Əliyevin Cinayət Məcəlləsinin 73-1.2-ci maddəsinə uyğun olaraq həmin Məcəllənin 178.2.2 və 178.2.4-cü maddələri ilə cinayət məsuliyyətindən azad edilib və bu hissədə onun barəsində cinayət təqibinə xitam verilib. Təqsirləndirilən şəxs barəsində seçilmiş polisin nəzarəti altına vermə qətimkan tədbiri ləğv edilib. İttihama görə, Vasif Əliyev Bakı şəhəri, Binəqədi rayonu, 83 saylı məktəb-liseyin direktor müavini vəzifəsində işləyən zərərçəkmiş Lalə Quliyevaya (şərti) Elm və Təhsil Nazirliyində yüksək vəzifələrdə işləyən qohumunun olduğunu bildirərək 2022-ci ilin oktyabr ayının əvvəllərində onu paytaxtın Nizami rayonunda yerləşən 251 saylı orta məktəbinə direktor təyin etdirəcəyi vədini verib. O, bu yolla zərərçəkmişdən 35 min manat pul alıb. Bundan başqa, Vasif Əliyev Mərdəkan qəsəbəsində yerləşən uşaq bağçasının müdiri vəzifəsində işləmiş Samirə Əsədovanı (şərti) yenidən həmin bağçaya işə bərpa olunması üçün ondan dələduzluq yolu ilə 9 min manat pul alıb. Məhkəmə istintaqı zamanı Vasif Əliyev ona elan edilmiş ittiham üzrə özünü təqsirli bilib. O qeyd edib ki, 2019-2021-ci illərdə Bakı Şəhəri üzrə Təhsil İdarəsində təsərrüfat qrupunun rəisi vəzifəsində çalışıb. Təqsirləndirilən şəxs dəymiş ziyanı qaytardığını, zərərçəkmişlərlə barışdığını deyib. Zərərçəkmişlər də məhkəmədə Vasif Əliyevə pul verdiklərini, zərərin ödənildiyini və onu bağışladıqlarını söyləyiblər.