Redaksiyamızın poştuna Gəncə şəhərindən məktub daxil olub. Şikayət məktubudur. "Globall.az" olaraq yazıya bəzi yazarlar və saytlar kimi "sensasion iddia" yarlığı yapışdıra bilərdik. Etmədik. Ölkə Prezidentinin dövlət məmurlarına "mən sizi xalqa xidmət üçün bu vəzifəyə təyin edirəm" tövsiyəsinin elə həmin məmurlar tərəfindən qulaqardı edilməsi adi hal aldığından və bu məktubda yazılanlar da bu reallığı əks etdirdiyindən "sensasion" yazmadıq.

Bu məktubu oxuyub da "Azərbaycan üçün adi haldır, Azərbaycan gerçəkliyidir" deyənlər nə qədər haqlı isə, sanırıq ki, əksini düşünənlər də bir o qədər haqlı ola bilər. Çünki son illər ölkəmizdə korrupsiyaya qarşı mübarizə gerçəkliyini də inkar etmək olmaz. Və inanmaq istərdik ki,  rayonlardakı "balaca padşahlar" tez, ya gec, necə deyərlər, qandallanan "gözü çıxmış qardaşlarının" aqibətindən ibrət alacaqlar.

İndi isə "Globall.az"-a ünvanlanmış həmin məktubu cüzi redaktə və korrektə ilə olduğu kimi dərc edirik. Ki, hörmətli oxucu kimin kim, hansı əməlin sahibi olduğunu, səlahiyyət sahiblərinin vəzifələrindən sui-istifadə edərək yerlərdə insanlarla necə rəftar etdiklərini, şəxsi mənfəətləri naminə adamlarla fırıldaqçı və talançı kimi davrandıqlarını bilsin.
Yox, bizcə... çoxları çox şeyi bilir, çifayda, xalqın dili ilə desək, lap YUXARIDAN birilərinin müdaxiləsi gərək. Beləliklə oxuyaq:
 
 Baki şəhəri, Globall.az ictimai-siyasi onlayn qazetin redaksiyasına
 Gəncə şəhəri, Ozan küçəsi, 2-ci dalan, ev 23 də yaşayan
 Əliyeva Lütfiyyə Həmzə qızı tərəfindən    

Hörmətli redaksiya!
Sizə müraciət edən Samux rayonu Qarayeri qəsəbəsi, 2 №-li tam orta məktəbdə direktor vəzifəsində çalışan, 43 il müəllim stajlı xanımdır.
Onu da deyim ki, mən 2011 -ci ilin dekabr ayından yuxarıda qeyd olunan məktəbdə işləyirəm, ondan qabaq  Gəncə şəhəri İ.Qayıbov adina 1 nömrəli tam orta məktəbdə rus bölməsində təlim-tərbiyə işləri uzrə direktor müavini kimi fəaliyyət göstərmişəm. Ümumi olaraq bu məktəbdə 1978-2011-ci illərdə çalışmışam.

Mənim həyat yoldaşım Əliyev Akif Qəmbər oğlu da 2010-cu ildən Samux rayonunun Qarayeri uşaq musiqi məktəbində direktor vəzifəsini yerinə yetirib.

2012-ci ilin  fevral ayında Samux rayonuna icra başçısı təyin olunan Ali Qocayev gələr-gəlməz biz cütlüklə “təmizlik” işi görməyi qərara alıb.
Mən çalışdığım məktəbdə icra hakimiyətinin təyin etdiyi komissiya tərəfindən dəfələrlə ayrı-ayrı yoxlamalar aparıldı, yerli-yersiz  sənədləşməyə aid yoxlamalardan sonra, keçdilər yoldaşımın rəhbər olduğu musiqi məktəbinin canına.


Əsl müsibət bundan sonra başladı. Hər dəfə H.Əliyev parkının və mərkəzinin tikintisi bahanəsi ilə butun rayonun rəhbər işcilərindən - idarə rəhbərlərindən pul tələb etdi, biz də məcbur olub verdik.

Yoldaşımı lap çox “yükləyən” başçı sonunda Qarayeri qəsəbə sakini, keçmiş bələdiyyə sədri Rasimin əli ilə ayrı-ayrı idarələrə böhtan xarakterli yazılar göndərmək sayəsində işinə əngəl yaratdı. Respublika Prokurorluğunun korrupsiya idarəsinə, Mədəniyyət Nazirliyinə, rayonun ayrı-ayrı hüquq-mühafizə və s. organlarına böhtan xarakterli məktublar yazdırdı.

Samux rayonunun sabiq MT şöbəsinin rəisi Əhməd müəllim (soyadını unutmuşam) ”işə girişərək” başçı Ali Qocayevi “yola gətirərək” bizdən 29 (iyirmi doqquz) min manat pul tələb etdi. Güya tikintiyə vəsait çatmır və bizim işdə qalmağımız üçün bu pulu 2 gün ərzində icra başçısına çatdırmalıyıq. Əks halda mənim yoldaşımı, sonra da məni işdən azad edəcək.

2013-cü ilin noyabr ayının əvvəllərində (tarix dəqiq yadımda deyil) Əhməd müəllim Akif müəllimə  055-211-30-80 nömrəli mobil telefonu ilə zəng vuraraq bildirdi ki, sabah axşam 21:00-a kimi pulu çatdırmasaq, Akifi işdən çıxaracaq.

Min bir bəla ilə biz bu pulu tapib, Samux yolunda, Gəncə şəhərində körpünün altında görüşüb 29 min manatı qara maşınla gələn Əhməd müəllimə verdik.

Yüz qapıya müracət edərək pul tapmışıq. Yaşadığımız evi ”Xalq banka“ dollarla girov qoyduq və 20 min dollar pul götürdük. 2013-cü 1 dollarr 78 qəpik dəyərində idi, sonra iki dəfə devalvasiya oldu, 1 dollar -1.70 manat oldu. Bizim bankdan pul almağımızı yoxlaya bilərsiniz.
Bu gunə kimi Yeni Gəncə, 54 nomrəli binanin 22 nömreli evi biz girovdan çıxara bimirik. Evimiz iki dəfə hərraca qoyulub, satışa çıxarılıb. Bu yaşda biz evsiz-eşiksiz qalmışıq.


Sonda, yəni 8 aydan sonra Ali Qocayev verdiyi sözə əməl etmədi və həyat yoldaşım Akif Əliyevi işdən azad etdirdi.

Mən dəfələrlə Ali Qocayevin qəbuluna gedib pulu tələb etmişəm. Lakin Ali Qocayev  bildirdi ki, “Əhmədə vermisən, get Əhmədi tap, ondan al, ərin işdən çıxıb, sən ki işləyirsən“. Bundan sonra mənə qarşı təzyiqlər başladı, işimə problemlər yaradıldı.

Hörmətli redaksiya! 
Bu müraciəti sizə göndərməyimin əsas səbəbi odur ki, mənim pulumu alan Ali Qocayev sözünə əməl etmədi və mənim yoldaşımı işdən azad etdi.
İndi biz evsiz qalmışıq. Ev problemimiz həll olunmalıdır, pulumuz qaytarılmalıdır. Bu müraciətimi ictimailəşdirin ki, bəlkə sözümüzü yuxarılarda eşidən ola və Alı Qocayevi rəhmə gətirə ki, 29 min manatımızı qaytarsın.

Hörmətlə: Əliyeva Lütfiyyə Həmzə qızı
23.07.2021 - ci il

GLOBALL.AZ-dan: Şikayət məktubu ilə bağlı Samux Rayon İcra Hakimiyyətinin başçısı Alı Qocayevə müraciət edib münasibət öyrənmək istəyimiz tam olaraq baş tutmadı. Belə ki, Alı Qocayev münasibət öyrənmək üçün icra hakimiyyətinin sosial iqtisadi inkişafın təhlili və proqnozlaşdırması şöbəsinin müdiri Arif Ağayevə müracit etməyimizi dedi. O da öz növbəsində ərizənin nüsxəsini alıb başçıya çatdıracağını dedikdən sonra "cəfəngiyyatları dərc etməmənizi məsləhət görürəm, yoxsa Alı Qocayev özü sizi məhkəməyə verər" dedi. Yəni ki... "oğru doğrunun bağrını yarar"a bənzər bir şey.

P.S. Şikayətçi xanım qeyd edir ki, əslində icra başçısı onlardan 30 min manat istəyib. O qədər pulu tapıb düzəldə bilmədiklərinə, yəni yalnızca 29 mini güc-bəla düzəldə bidiklərinə görə də 29 min verməli olublar.