Rusiya sülhməramlıları Qarabağda yenə də qanunauyğun olmayan hərəkətlər edir.
Belə ki, Azərbaycanın yük maşınları Kəlbəcərə buraxılmır. Bu barədə sosial şəbəkələrdə məlumat yayılıb.

Bildirilir ki, Azərbaycana məxsus yük maşınları Suqovuşandan o tərəfə, yəni Kəlbəcərə istiqamətinə buraxılmır. Rusiya sülhməramlıları öz yük maşınlarını Suqovuşana gətirib Azərbaycan maşınlarındakı yükü bu nəqliyyat vasitələrinə yüklənməsini və Kəlbəcərə daşınacağını deyiblər. Sülhməramlıların “Kəlbəcərə Azərbaycan bayrağı və dövlət nömrə nişanı ilə girmək olmaz” dediyi bildirilir.

Rusiya Müdafiə Nazirliyi bununla bağlı açıqlamasında yüklərin sülhməramlılara məxsus nəqliyyat vasitəsilə Kəlbəcərə daşındığını təsdiqləyib.
Məlumatda Suqovuşanın “Madagiz” olaraq qeyd edilməsi də diqqətdən yayınmayıb. Qeyd edək ki, artıq Türkiyə-Rusiya Birgə Monitorinq Mərkəzində yer alacaq türkiyəli heyət Azərbaycandadır.

Məsələ ilə bağlı politoloq Fikrət Sadıqov Cebhe.info-ya açıqlamasında deyib ki, rus sülhməramlılarının Azərbaycan maşınlarını Kəlbəcərə buraxmaması birmənalı şəkildə özbaşınalıqdır:

“Özbaşınalıqları da ondan irəli gəlir ki, biz onların maraqlarına cavab verməyən addımlar atırıq. Lakin biz öz torpaqlarımızda hərəkət üçün heç kəsdən icazə almamalıyıq. Sülhməramlıların bununla bağlı bütün şərhi, fikirləri boş ifadələr və bəhanələrdir. Ona görə də sülhməramlıların Azərbaycan maşınlarını Kəlbəcərə buraxmaması yolverilməz bir haldır. Mətbuatın bu məsələyə diqqət yetirməsi çox yaxşı haldır. 
Ümumiyyətlə, bu məsələyə Azərbaycanın bütün təbəqələri diqqət yetirməlidir. Azərbaycanın hansısa rayonuna yük göndərmək bizim özəl işimizdir. Biz öz torpaqlarımızda bütün istiqamətlərdə hərəkət edə bilərik. Ona görə də sülhməramlıların bu özbaşınalığına çox sərt reaksiya verməli və etirazımızı bildirməliyik. 
Sülhməramlılarla danışıqlar aparılmalı və bu problemlər gələcəkdə də yaranmasın deyə, Azərbaycan hökuməti onların qarşısında şərt qoymalıdır. Əks təqdirdə bizim müxtəlif yollara əl atmağa tam hüququmuz var. Çünki biz öz torpaqlarımızdayıq”.

Ekspert bu gün Türkiyə-Rusiya Birgə Monitorinq Mərkəzində yer alacaq türkiyəli heyətin Azərbaycana gəlişinə də münasibət bildirib:

“Türkiyə-Rusiya Birgə Monitorinq Mərkəzinin yaradılması hələ 10 noyabr Bəyannaməsində də öz əksini tapmışdı. Heç də şübhə etmirəm ki, bu bizim ərazimizdə Türkiyə və Rusiya qüvvələrinin balanslaşmasına gətirib çıxaracaq. Türkiyə sülhməramlılarının torpaqlarımızda olması birmənalı şəkildə bizim maraqlarımıza tam şəkildə cavab verir. 
Türkiyənin Dağlıq Qarabağda bizim maraqlarımıza hansısa zidd hərəkət edə biləcəyini düşünmürəm. Əminəm ki, gələcəkdə Qarabağda belə xoşagəlməz halların yaranmaması üçün Türkiyə əlindən gələni edəcək. 
Türkiyə sülhməramlılarının Birgə Monitorinq Mərkəzindəki varlığı rus sülhməramlılarının və erməni silahı dəstələrinin xoşagəlməz fəaliyyətlərini tam mənada dayandıracaq”.

F.Sadıqov Rusiya Müdafiə Nazirliyinin Suqovuşanı “Madagiz” kimi təqdim etməsinə də aydınlıq gətirib:

“Rusiya mətbuatında jurnalistlər keçmişlə yaşayır. Hətta onlar çox zaman Xankəndini də “Stepanakert” adlandırırlar. Hətta bəzən Rusiya mətbuatında Azərbaycanın mərkəzi rayonları belə keçmiş adlarla adlandırılır. 
Hesab edirəm ki, bu müvəqqəti prosesdir. 
Amma biz buna da diqqət yetirməliyik. Bizdən də çox şey asılıdır. Yəni kimsə bunu eləyirsə, dərhal reaksiya olmalıdır. Yazmalıyıq, etiraz etməliyik, ünvanlı bəyanatlar verilməlidir. Hətta yeri gələrsə, redaksiyalara bu mövzunu qabartmaları üçün məktublar da göndərilməlidir. 
Çünki bu Vətən məsələsidir və burada hamının birliyi şərtdir. Biz nə qədər sussaq, onlar bu yalanları yayacaq. Ona görə də bu yalanların qarşısını almalı və buna son qoymalıyıq”.