Hesablama Palatasının 2026-cı ilin dövlət büdcəsi zərfinə verdiyi rəydə kənd təsərrüfatı sektoruna aid bir sıra ciddi problemlər və gecikmələr diqqət çəkir.

Sənədin təhlili göstərir ki, 2022–2026-cı illər üçün müəyyən edilən inkişaf hədəfləri kənd təsərrüfatında tam icra olunmur, sektor üzrə real göstəricilər gözləntilərin xeyli gerisində qalır.

Press-fakt modern.az-a istinadla xəbər verir ki, Hesablama Palatasının rəyində kənd təsərrüfatı üzrə orta illik artım proqnozların Strategiyanın hədəflərinə uyğun gəlmədiyi bildirilib.

"Digər sahələrin gözlənilən və proqnoz göstəriciləri kənd təsərrüfatı və qeyri neft-qaz sənayesində orta illik artım, turizm üzrə isə 5 illik artım hədəfinə tam nail olunmayacağını deməyə əsas verir”, - rəydə qeyd edilib.

Palatanın qənaətinə görə, kənd təsərrüfatı və qeyri-neft sənayesinin zəif artımı qeyri-neft ixracı üzrə hədəflərin də icrasını çətinləşdirir.

Sektorla bağlı diqqətçəkən digər məqam isə büdcədənkənar vəsaitlərin bölgüsüdür. Hesablama Palatasının rəyində bildirilib ki, gələn il büdcədənkənar xərclər bütün funksional sahələr üzrə artımla nəzərdə tutulsa da, kənd təsərrüfatı bu siyahıya daxil deyil. Yəni digər sektorlar əlavə resurs alır, kənd təsərrüfatının isə büdcədənkənar maliyyələşməsi artmır.

Hesabata görə, kənd təsərrüfatı ilə bağlı ən kəskin məqam isə işğaldan azad olunmuş ərazilərdəki vəziyyətdir. Palatanın təqdim etdiyi cədvələ əsasən, 2025-ci ilin ilk 8 ayında Qarabağ regionunda Kənd Təsərrüfatı Nazirliyi tərəfindən həyata keçirilməli olan layihələrin heç biri icra olunmayıb. Rəsmi rəqəmlərə görə, Nazirliyə bu məqsədlə ayrılmış 850 min manat vəsaitdən 0 manat xərclənib.