Redaksiyamızın – Globall.az-ın elektron poçtuna Binəqədi rayonunun Biləcəri qəsəbə sakinlərinin bir qrupu tərəfindən şikayət ərizəsi daxil olmuşdur. Sakinlər şikayət ərizəsində yaşadıqları ərazinin yollarının ilin bütün fəsillərində olduqca bərbad, qış aylarında isə ümumiyyətlə keçilməz olduğundan yazırlar. Onlar bu barədə əlaqədar qurumlara – Azərbaycan Respublikası “Azəryol” ASC-nin sədri Saleh Məmmədova, Binəqədi Rayon İcra Hakimiyyətinə, Biləcəri bələdiyyəsinin sədrinə dəfələrlə müraciət etsələr də bunun heç bir faydası olmayıb. Sakinlər gileylənir ki, yolların əsaslı təmiri və ya yenidən qurulması üçün “Azəryol” dövlət agentliyinə etdikləri müraciətə cavab olaraq bildirilib ki, haqqında bəhs edilən yola, yəni Biləcəri qəsəbəsi Binəqədi şossesi ətrafında məskunlaşan əhalinin yaşadığı ərazidə yol çəkilişi və ya təmiri bizlik deyil. Agentliyin rəhbəri sözügedən yolun Binəqədi Rayon İcra Hakimiyyətinin və Biləcəri bələdiyyəsinin balansında olduğunu və həmin yolların çəkiliş və ya təmirinin də onların işi olduğunu bildirir. 

Verilən cavaba uyğun olaraq sakinlər bu dəfə Binəqədi Rayon İcra Hakimiyyətinin qaynar xəttinə-1646-ya müraciət edirlər. “Ötür-ötür” oyununu indi də icra hakimiyyəti əməkdaşı davam etdirir. O, sakinləri Biləcəri bələdiyyəsinin sədri İlham Xəlilovun üstünə yönəldir. Maraqlıdır ki, ərazidə yaşayan sakinlər daha öncə əvvəlki bələdiyyə sədrinə yol problemi barədə müraciət etsələr də, bir nəticə hasil olmamışdı. Amma onlar inamsızlıqdan çarəsiz olsalar da, yenidən, həm də yeni seçilmiş bələdiyyə sədrinə müraciət etmək zorunda qalırlar. Onlar yeni seçilmiş bələdiyyə sədrinə - İlham Xəlilova həm rəsmi - 30-40 nəfərin imzası ilə məktub göndərərək yollarının bərbad olduğunu, bataqlığa çevridiyini yazırlar, həm də əyani şəkildə bu problemin həll olunmalı olduğunu çatdırırlar. Çifayda. Ərazi sakinləri keçib gəldikləri yollara həsəd hissi ilə baxdıqlarını və kimsənin maraqlanmadığı xaraba yollara, öz yaşadıqları əraziyə çatanda “buranı sanki Allahın da unutduğunu” qeyd edirlər. Minik maşınları bir yana, marşrut avtobusunun belə sel-su altında qalan çala-çuxurlardan güc-bəla ilə, ləngərlənib-dartınıb keçdiyini yazan qəsəbə sakinlərini təəccübləndirən və onlarda haqlı narazılıq və sual doğuran bir başqa, həm də ən ümdə məqam isə odur ki,  “ölkə Prezidenti İlham Əliyevin Binəqədi rayonunun qəsəbə yollarına ayırdığı maliyyə vəsaiti kimin əlindədir ki, bizim yollar ağzı yağışa, qara qalıb?..”

Sakinlərin müraciətində qırmızı xətlə keçən bir ümdə nüansı da qeyd etmək istərdik: “Ölkə Prezidenti İlham Əliyev öz publik çıxışlarında dəfələrlə vurğulayıb ki, məmurlar xalqın xidmətçiləridir.” Redaksiyamıza göndərilən və yazdıqlarının ictimailəşdirilərək daha yuxarı instansiyalara çatdırılmasını istəyən sakinlər,  üzləşdikləri problemi qulaqardına vuran bu məmurlara rəğmən “deyəsən bu məmurlara xidmətçi olduqlarını reaksiya ilə xatırlatmalı olacağıq” yazırlar. 
Zənn edirik ki, Binəqədi rayon rəhbərliyi, bələdiyyə sədri və digərləri öz süründürməçiliyi, insanlara biganəliyi və laqeydliyi ilə gündəm yaratmaq istəməzlər. Əksinə, ümid edirik ki, xəstələri, qocaları, məktəbliləri, körpələri olan bir qəsəbə haqqında, onun harayı eşidilməyən sakinləri haqqında düşünən, onların səsinə səs verən və problemə müdaxilə edən səlahiyyətli, məsul şəxslər özünü çox gözlətməyəcək... 

Dürdanə Cəlal,
Globall.az