Əsasən münaqişələrdən dolayı 35-dən artıq ölkədə onmilyonlarla insan aclıqla üzləşib. BMT-nin Baş katibi Antonio Quterres martın 11-də ölkələri fəlakətin qarşısını almaq üçün 5.5 milyard dollar yığmağa çağırıb.

“Dərhal tədbir görülməsə, milyonlarla insan aclıq və ölüm həddinə çatacaq”, – Qurerres BMT-nin Təhlükəsizlik Şurasının yüksək səviyyəli iclasında bildirib.

Onun sözlərinə görə, 35-dən çox ölkədə 30 milyondan artıq adam aclığın bəyan edilməsinin bircə addımlığındadır. “Aclığa daha çox münaqişələr səbəb olsa da, iqlim şokları və COVID-19 pandemiyası alovu daha da gücləndirir”, – o vurğulayıb.

2020-ci ilin sonunda münaqişə və sabitsizlikdən dolayı 88 milyondan çox insan kəskin aclıqdan əziyyət çəkirdi. Bu isə bir il öncəylə müqayisədə 20 faizlik artım deməkdir. Sahel, Afrika buynuzu, Cənubi Sudan, Yəmən və Əfqanıstan ən çox zərbə yemiş ölkələr və regionlardır.

Dünya Ərzaq Proqramının İcraçı Direktoru Deyvid Bisli deyib ki, COVID-19 və aclıq pandemiyası aclıq həddinə sürüklənən insanların sayını 135 milyondan 270 milyona qaldıra bilər.

“Bu gün xəbərdarlıq etməliyəm ki, biz bir daha uçuruma yuvarlanırıq. Hazırda 270 milyon nəfər aclıq böhranıyla üzləşib”, – o deyib.
Dünyada yeni növ koronavirusa 118 milyondan çox yoluxma aşkarlanıb, 2 milyon 600 mindən çox insan vəfat edib./azadliq.org