Güman ki, Canavarla Ceyranın təmsilini çoxları bilir. Qısası, Canavar bir bəhanə ilə Ceyranı yemək istəyir və arxın qırağında özündən aşağıda su içən Ceyrana “suyu niyə bulandırdın” deyir... Xatırladınızmı? Bax bu olay da ona bənzəyir.
Redaksiyamıza şikayət məktubu göndərən Coşqun Əliyevin yazdıqlarından və ən başlıcası da Gəncə Lokomotiv Deposunda yanacaq üzrə mühəndis işləyən İntiqam Həsənovu az-çox tanıdığımızdan, onun şəxsiyyətinə və əməllərinə bələd olduğumuzdan məhz bu qənaət yaranır. Diqqəti yalnız bir detala-aktın yazılma proseduruna yönəldib qalanını hörmətli oxucunun öhdəsinə buraxırıq, qoy oxucular C.Əliyevin yazdıqlarını oxuyub özləri üçün qənaət hasil etsinlər: kim kimdir?
Akta qalınca, məgər akt iki nəfərin arasında olan mübahisədən yazılır? Həm də şahidsiz, dəlilsiz, sübutsuz və bir nəfər vəzifəlinin hikkəsi ilə? Yəqin ki, bir nəfərin yazdığını və iki nəfərin imzaladığını akt adlandırmaq Azərbaycan Dəmir Yolları (ADY) QSC-nin rəhbərliyinin kitabında yazılıb – 21-ci əsrdə orta əsr təfəkkürü ilə yaşayıb işləyən hörmətli Cavid Qurbanovun.
İntiqama da bir atalar sözü xatırlatmaq istərdik ki, bədgüman olmasın, “buynuzsuz qoçun qisası (İntiqama “intiqamı” da demək olar) buynuzsuz qoçda qalası deyil.” 
İndi isə redaksiyamıza göndərilən şikayət məktubunun məzmununu və İntiqam Həsənovun vaxtilə işdən “qovulma” səbəblərini təqdim edirik.  

“Globall.az” qəzetinin redaksiyasına
İmişli rayon Tofiq İsmayılov küçəsi ev 51-də yaşayan Əliyev Coşqun Süleyman oğlu tərəfindən
                                          ƏRİZƏ
  Bu ərizəmlə yazıb Sizə bildirirəm ki, 11.02.2021-ci il tarixdə Gəncə Lokomotiv Deposunda yanacaq üzrə mühəndis Həsənov İntiqam Novruz oğlu Gəncə SH Q 333A 0292 nömrəli teplovoza daxil oldu.Teplovoza baxış keçirərkən dizel yanacağının ətrafında əsgi parçası olduğu üçün mənə irad tutdu və “bu əsgi nədir” dedi. Mən də dedim ki, əsgi parçasından xəbərim yoxdu və məndən akt yazdı. Bu aktı İmişli lokomotiv deposuna göndərməmək üçün məndən 100 manat pul istədi, mənim isə həmin zaman pulum olmadı.
    15.02.2021-ci il tarixdə ezamiyyətim bitdi, gəldim evə və 16.02.2021-ci il tarixdə marşrutları İmişli lokomotiv deposuna təhvil verməyə getdim. Sənədləri təhvil verən zaman maşinist təlimatçısına Həsənov İntiqam Novruz oğlunun məndən 100 manat pul istəməsi barədə şifahi məlumat verdim və mənə heç bir reaksiya verilmədi.
         

28.02.2021-ci il tarixdə Gəncə-Böyük-kəsik istiqamətində işləmək üçün ezamiyyətə getdim. Həsənov İntiqam mənə yaxınlaşaraq 100 manatı bir də istədi .Mən də ona dedim ki, pulum yoxdu. Məni yanacaq satmağa  məcbur etdi . Mənim də yanacaq satmağa razılaşmağımın səbəbi o oldu ki, yanacağı satıb  Həsənov İntiqamın pulun verim. 
Sonra isə özü 13.03.2021-ci il tarixdə yenidən məni yanacaq satmağa məcbur etdi. Sonra isə özü gəldi və məni tutdu, polislə hədələdi. Mən də dedim ki, yanacaq satırdım ki, sənin 100 manatını verim. Məni qorxudaraq yazdığı akta qol çəkdirdi.
         Öhdəmdə iki azyaşlı uşağım var, yoldaşım işləmir, evdardır. Atam, anam işləmir, pensiya yaşları çatmadığı üçün pensiya da almırlar. Bir sözlə, evdə tək işləyən mənəm. Globall.az qəzetinin redaksiyası, məni belə şantajla işdən çıxardıblar, Xahiş edirəm mənə kömək edəsiniz.
         İmza :             Əliyev Coşqun 
         15.03.2021.

Redaksiyadan zəruri açıqlama 

Ərizəçinin haqqında bəhs etdiyi Həsənov İntiqam Novruz oğlu barədə bir müddət öncə də redaksiyaya şikayət daxil olmuşdu. Bəzi araşdırma və dəqiqləşdirmələrə ehtiyac yarandığından biz həmin şikayəti həmən oxucuya çatdıra bilmədik.
Sonra məlumat aldıq ki, İntiqam Həsənov Gəncə Lokomotiv Deposunun sabiq rəisi İslam Əsgərov tərəfindən işdən azad edilib. Daha doğrusu, kadrlar şöbəsindən əldə etdiyimiz məlumatda onun öz xahişi ilə işdən azad olunduğu deyilirdi.
Sonra öyrəndik ki, yanacaq və sürtgü yağları üzrə regional müfəttiş vəzifəsində işləyən İntiqam Həsənovun işində yeyinti faktları aşkarlanmış və bunu da ADY QSC-nin yanacaq və sürtgü yağları idarəsinin rəisi Anar Əsgərov Gəncəyə ezam olunan zaman təsbit etmişdi. 

Konkret fakta gəlincə, məlum olmuşdu ki, Gəncə lokomotiv deposunda teplovozlara dizel yanacağı doldurulan kəmərə İntiqam Həsənov tərəfindən divar altından gizlin üçtərəfli ayırıcı qoşulmuş, hər teplovoza gündəlik ayrılan yanacağın bir hissəsi üçtərəfli ayırıcıdan yaxınlıqdakı çənə axıdılır, oradan isə şəxsi mənfəətini təmin edəcək sərfəli qiymətə satılırdı. 

İntiqam Həsənov gizli xətti divarın içi ilə bu dizel çəninə çəkmişdi

Bundan xəbər tutan Gəncə Lokomotiv Deposunun rəisi İslam Əsgərov dərhal Anar Əsgərovu məlumatlandırıb, sonradan isə bu maxinasiya hüquqi müstəvidən yayındırılıb və İntiqam Həsənov etdiyi cinayətdən canını yalnızca işdən öz ərizəsi ilə azad edilməklə qurtarmışdır. 

Bir müddət sonra, neçə deyərlər, “qar yağıb cattaqlar örtüldükdən” sonra o bütün instansiyalara müraciət edərək ona qarşı haqsızlıq olduğunu və qəsdən işdən azad olunduğu haqqında yazmadığı yer buraxmamışdı. 

Və... İndi İntiqam Həsənov Gəncə lokomotiv deposundakı dəmiryolçulara dediyinə görə, onu şəxsən ADY QSC-nin sədri Cavid Qurbanov əvəzolunmaz kadr kimi yenidən işə dəvət etmişdir. 

Görünən bu ki, adam işə qayıdıb qovulmazdan qabaqkı əməllərini bir başqa entuziazmla davam etdirir. Həm də doğruların bağrını yararaq. Nə vaxta qədər?.. 

Mehriban ƏZİZQIZI,
Globall.az