Globall.az ictimai-siyasi onlayn qəzetinin baş redaktoru Mehriban Ələsgərova mətbu fəaliyyətinə görə təhdid edilib və o, bu səbəbdən 1-ci vitse-prezident Mehriban xanım Əliyevaya müraciət edib. Həmin müraciəti olduğu kimi dərc edirik.

"Azərbaycan Respublikasının 1-ci vitse prezidenti Mehriban xanım Əliyevaya
Baş redaktor Mehriban Əziz qızı Ələsgərova tərəfindən müraciət:
         
Hörmətli Mehriban xanım, ilk öncə Sizi və ailənizi Novruz bayramı münasibəti ilə təbrik edirəm. Sizlərə can sağlığı, bütöv Azərbaycan uğruna verdiyiniz mücadilədə tam qələbə, gördüyünüz nəhəng miqyaslı işlərdə uğurlar arzulayıram.
        
Müraciətimin səbəbinə gəlincə, qısa bir açıqlama vermək istəyirəm.
         
Bir neçə gün öncə redaksiyamıza İmişli sakini Əliyev Coşqun Süleyman oğlu tərəfindən şikayət ərizəsi daxil olmuşdu. Şikayətçinin ərizəsini dərc etdik. Əldə etdiyimiz ərizədən, o cümlədən jurnalist araşdırması zamanı məlum oldu ki, Azərbaycan Dəmir Yolları QSC-nin Gəncə Lokomotiv Deposunda yanacaq üzrə mühəndis vəzifəsində çalışan Həsənov İntiqam Novruz oğlu indiki işinə təkrar qayıdandan sonra Coşqun Əliyevi, o cümlədən adının hallanmasını istəməyən digər dəmiryolçuları şantaj və hədə - qorxu gəlməklə cinayətə sövq edir-yanacaq satdırmağa sürükləyir.

Məlumat üçün bildirim ki, İntiqam Həsənov əvvəllər  uzun müddət yanacaq üzrə müfəttiş vəzifəsində çalışıb və illər ərzində bu sahədə vəzifə səlahiyyətlərindən sui-istifadə edərək şəxsi maraq və mənfəəti üçün işləməsi hamıya məlum olsa da, tədbir görən olmamışdı. 
Nəhayət ki, 2017-ci ilin may ayında Gəncə Lokomototiv Deposunun rəisi İntiqam Həsənovun dövlət əmlakını talama faktlarını yerindəcə aşkarlamış (dizel yanacağının saxlandığı çənə gizlin xətt çəkərək oğurluq etməsi de-fakto təsdiq edilmişdir), amma məsələ hüquqi müstəviyə çıxarılmamış, müəyyən səbəbdən yalnızca öz xahişi ilə işdən uzaqlaşdırılmışdır. 

Amma bir müddət keçəndən, yəni İ.Həsənovun əməlləri ört-basdır edildikdən sonra... o, ADY QSC-nin rəhbərliyinə köhnə işinə qayıtmaq üçün müraciət edir.

Maraqlı və həm də təəccübüdür ki, nəhayət İntiqam Həsənov bir neçə ay öncə Gəncə Lokomotiv Deposuna – yarımçıq qoyub getdiyi vəzifəsinə qayıda bilir. Və hazırda o Gəncə Lokomotiv Deposunda yanacaq üzrə mühəndis vəzifəsində çalışır. 

Bunu Sizə yazmaqda sözümün mabədi odur ki, bu adam soyub-taladığı işindən biabırçı şəkildə “qovulduqdan” sonra həmin iç yerinə məhz Sizin tapşırığınızla yenidən qayıtdığını, məhz Sizin ADY QSC sədri Cavid Qurbanova tapşırığınız əsasında həmin işə bərpa olunduğunu deyir. Və indən sonra heç kimi vecinə almadığını və heç kimin onun işinə müdaxilə edə bilməyəcəyini söyləyir. Adam konkret deyir ki, Cavid Qurbanov depoda bütün işləri şəxsən ona həvalə edib.
İ.Həsənovun özbaşınalığı o həddə çtıb ki, o, Sizin adınızdan sui-istifadə edərək özünə aid olmayan hüquq-mühafizə orqanlarının işinə də müdaxilə edir. Dəmiryolu işçilərini də, polis işçilərini də Sizin adınızla təhdid edir və hələ ki, kimsə cürət edib ona “dur” deyə bimir. O, iş yerində özünü mühəndis kimi yox, müfəttiş kimi aparır. 
         
Hörmətli Mehriban xanım, təsisçisi və baş redaktoru olduğum “Globall.az” onlayn ictimai-siyasi qəzetinin səhifəsində Gəncə Lokomotiv Deposuna bir neçə il öncə, yəni 2017-ci il may ayında korrupsiya faktları ilə yaxalansa da, sonradan neçə olubsa öz xahişi ilə işdən azad olunan, hazırda ADY QSC-də ixtisarlar getməsinə baxmayaraq, hətta ali təhsili belə şübhə altında olan, hazırda mühəndis vəzifəsində çalışan  İntiqam Həsənov haqqında dərc olunan “Cavid Qurbanovun “ əvəzolunmaz kadrı” Oğru doğrunun bağrını belə yarır“ sərlövhəli yazısından (yayım tarixi: 16 mart 2021 16.57) sonra həyat yoldaşıma zəng edərək məni təhdid edir. 

Onun dedikləri: “Mən şəxsən Mehriban xanımın qəbulunda olub onun tapşırığı ilə işə qayıtmışam, xanımına de ki, mənim haqqımda olan yazı-pozusunu yığışdırsın, yoxsa axırı yaxşı olmayacaq. Mən şəxsən xanımın himayəsindəyəm”. 

O bu sözləri, yəni Sizin göstərişinizlə onu şəxsən Cavid Qurbanovun qəbul etməsini, ona şəxsi mobil telefonunu verərək hər dəqiqə müraciət edə biləcəyini depolarda hər kəsə bildirərək inandırmağı bacarıb.

İşin ağıla batan hissəsi isə İntiqam Həsənovun  “Qayıdış”ından sonra lokomotiv deposundakı səlahiyyətlilərin ondan çəkinərək hər hansı iradını belə bildirməməsidir.

Hazırda iş o yerə çatıb ki, ali təhsili olmasına baxmayaraq, nəinki KİV haqqında qanundan, habelə Azərbaycan Respublikasının qanunlarından xəbərsiz olan İntiqam Həsənov məni Sizlə, Cavid Qurbanovla hədələyir, təhdid edir. Başqa sözlə, oğru doğrunun bağrını yarmağa çalışır.

Möhtərəm Mehriban xanım, Sizə müraciət edirəm: Mənə məsləhət verin, mən neyləməliyəm?
Qorxub dala durum, media sahəsindən uzaqlaşım, ya qalıb korrupsionerlərlə, konkret halda İntiqam kimi dövlətin dəmiryolu üçün ayırdığı yanacağı dədə malı kimi satıb-sömürən talançılarla mübarizəmi davam etdirim?
İnanın, Siz necə desəniz, elə də edəcəm. 
         
Hörmətlə: “Globall.az” onlayn ictimai-siyasi qəzetinin təsisçisi və baş redaktoru Mehriban Əziz qızı Ələsgərova"