Bakı Nəqliyyat Agentliyi (BNA) bəyan edir ki, bir neçə ildir Bakıda qanunsuz parkinq xidməti göstərilir, milyonlarla gəlir əldə edilir və aidiyyatı dövlət qurumları ona qarşı heç bir tədbir görmürlər.

İki gün əvvəl adıçəkilən qurumun İdarə Heyətinin sədri Vüsal Kərimov növbəti dəfə bildirib ki, paytaxtda parklama xidmətinin tarifləri Nazirlər Kabineti tərəfindən təsdiq edilmir. Bu xidmətin göstərilməsi və qazanc əldə edilməsi qanunsuzdur. BNA rəhbəri vurğulayıb "parkovşik" adlanan şəxslərin onlara yaxından-uzaqdan aidiyyatı yoxdur.

"Bu gün Bakı şəhərində kim 1 manatı elə belə yığa bilər? Onların arxasında müəyyən himayədarları var”,- deyə V. Kərimov deyib.



Xatırladaq ki, 4 il əvvələ qədər Bakıda parklama xidməti ilə Bakı Şəhər İcra Hakimiyyəti məşğul olub. Xidmətin təşkili üçün şəhərin müxtəlif yerlərində müasir ödəniş aparatları da quraşdırılmışdı.

Amma BNA yaradıldıqdan sonra bu xidmətin göstərilməsi Agentliyə həvalə edildi. Agentlik isə tariflərin müəyyənləşdirilməsi üçün Nazirlər Kabinetinə müraciət edib. Amma 4 il keçməsinə baxmayaraq, heç bir addım atılmayıb.

Bu müddət ərzində şəhərdə avtoparkinq xidməti dayanmayıb. Xidmət üzərlərində "Çinar Avtoparkinq" MMC-nin vəsiqəsinin daşıyan şəxslər tərəfindən həyata keçirilir.

Onlardan biri Azpolitika-nın əməkdaşı ilə söhbətində bildirib ki, adıçəkilən MMC-nin işçisidir, ayda 400 manat əməkhaqqı alır: "Bakının bütün rayonlarında xidmət göstəririk, biz ərazi üzrə rəisə tabeyik, o da rəhbərliyə. Hər gün topladığımız pulu təhvil veririk. Səhər saat 8-dən, 18:30-a qədər fəaliyyətdəyik. Topladığımız puldan yemək pulu da çıxılır".



"Çinar Avtoparkinq" MMC-nin əməkdaşı daha sonra bildirib ki, konkret tarif yoxdur, kim nə versə götürürlər: "Əvvəllər saathesabı xidmət haqqı istəyirdik, amma narazılıq yarandı. Müdriyyət tapşırıb ki, sürücülərlə konfliktə gedilməsin, kim nə versə, qəbul edin. Biz də 20 qəpikdən 1 manata qədər pul alırıq. Bəzən səxavətli adamlar daha artıq verirlər".

Maraqlıdır, Bakı Nəqliyyat Agentliyinin "bata bilmədiyi", 4 ildir, şəhərdə qanunsuz avtoparkinq xidməti göstərdiyi idia olunan "Çinar Avtoparkinq" MMC-nin sahibi kimdir?

Vergilər Nazirliyin informasiya bazasında apardığımız araşdırma zamanı MMC haqqında maraqlı məlumatlar əldə etdik. Belə ki, "Çinar Avtoparkinq" MMC-nin (VÖEN 1306356451) qanuni təmsilçisi Qocayev Nizamı Mehralı oğludur. Nizamnamə kapitalı cəmi 10 manat təşkil edir, hüquqi ünvanı Bakı şəhəri, Yasamal rayonu, İnşaatçılar prospekti ev 5, mənzil 0 göstərilir. MMC 17.10. 2019-cu ildə dövlət qeydiyyatına alınıb.

MMC-nin təsisçisi haqqında internet resurslarında aparığımız araşdırma zamanı əksər mənbələr onun Daxili İşlər Nazirliyinin İstintaq İdarəsinin sabiq rəisi Nizami Qocayev olduğunu göstərir. 



O, 2000-ci ildə məhkəmənin hökmü ilə azadlıqdan məhrum edilib, 2002-ci ildə isə Prezident tərəfindən əvf olunub və daxili işlər orqanlarına bərpa edilib. Bundan sonra İsmayılı rayon Polis İdarəsinin rəisi vəzifəsinə təyin edilib. 2016-cı ildən 2020-ci ilə qədər Gəncə şəhəri Ədliyyə Nazirliyi Regional İcra xidmətinin rəisi olub. Hazırda təqaüddədir.

Nizami Qocayev Azpolitika-ya açıqlamasında adıçəkilən MMC-nin rəhbəri olduğunu təsdiqləyib. O bildirib ki, tamamilə qanun çərçivəsində fəaliyyət göstərirlər: "Bizim MMC-nin Bakıda 151 parklama yeri var. Yerli bələdiyyələrlə müqavilə bağlamışıq, hər ay yerlədən asılı olaraq 4000, 3850, 2000 manat və s. onlara vəsait ödəyirik. Dövlətin vergisini, DSF ödənişlərini vaxtlı-vaxtında veririk".

Avtomobil sahiblərindən ödəniş haqlarının hansı tariflə alınmasına gəlincə, Nizami Qocayev bildirib ki, bunu bələdiyyələrlə öz aralarında müəyyən edirlər: "Burada hər hansı qanunsuzluqdan söhbət gedə bilməz. Bələdiyyələrlə müqavilələr bağlamışıq və onların bir surətlərini də yerli polis idarələrinə təqdim etmişik. Problem yaranan hallarda qanun çərçivəsində polisə müraciət edilir".

Nizami Qocayev həmçinin paytaxtda qanunsuz parklama yerlərinin olduğunu da vurğuladı. O, BNA rəhbəri Vüsal Kərimovun qanunsuz parklama ilə bağlı dediklərini şərh etməyib.

Azərbaycan İnternet Forumunun prezidenti Osman Gündüz isə Vüsal Kərimovun yuxarıda qeyd olunan açıqlamasını şərh edərkən bildirib ki, artıq neçənci dəfədir, səlahiyyətli dövlət qurumu öz səlahiyyətlərini icra edə bilmədiyini açıqlayır.



Ekspert qeyd edir ki, qanunla BNA-ya verilən səlahiyyəti hansısa bir "X" şirkəti icra edir və pullar onun kassasına gedir: "Anlamıram ki, dövlət nəzarətinə cavabdeh şəxslər üçün Prezidentin fərman və sərəncamlarının icrasına nəzarət edənlər üçün daha hansı mesajlar verilməlidir. Təsəvvür edin ki, real fəaliyyət göstərən parklama infrastrukturu var, xidmət göstərilir və bununla bağlı pullar yığılır. Ən qəribəsi odur ki, bununla bağlı, bu məsələləri tənzimləyən hüquqi-normativ baza da var. Yalnız bir şey yoxdur. Nazirlər Kabineti parklama ilə bağlı tarifləri müəyyən etmir.

Güman ki, kimlərsə "ağır çəkililər" Nazirlər Kabinetinə təsir edə bilirlər ki, nə qədər imkan varsa, Prezidentin fərmanının bu hissəsi icra edilməsin, qanuni parklama tarifləri müəyyən olunmasın. BNA deyir ki, məhz bu səbəbdən də parklama ilə bağlı innovasiyalara əsaslanan normal bir sistem qura bilmirlər".

O. Gündüzün sözlərinə görə, əgər Prezident Administrasiyası, Nazirlər Kabineti bu məsələni həll elətdirə bilmirsə, onda düşünürəm ki, Prezidentin 2018-ci il 6 iyul tarixli fərmanına dəyişiklik edilsin və tariflərlə bağlı səlahiyyət elə BNA-nın özünə verilsin: "Bununla da ümid edirəm ki, 4 il davam edən problem həllini tapar".

Elçin