Ötən gün Dohada Kabil və Vaşinqton nümayəndələri arasında ilk birbaşa danışıqlar baş tutub. “Taliban” Amerika nümayəndə heyətindən hökumətlərini tanımalarını və Əfqanıstanın bir neçə milyard dollarlıq xarici aktivlərinin blokdan çıxarılmasını tələb etsə də, bunun heç bir xeyri olmayıb.
Bu barədə “The Times” qəzeti yazır.
 
Amerika qoşunlarının Əfqanıstandan çıxarılmasından sonra ABŞ və “Taliban” nümayəndələri ilk dəfə olaraq birbaşa danışıqlar apardılar. Qəzet yazır ki, tərəflər islamçıların iqtisadi çöküşün qarşısını almaq üçün ehtiyac duyduqları dondurulmuş aktivlərlə bağlı razılıq əldə edə bilməyiblər.
 
MKİ-nın direktor müavini Devid Koenin rəhbərlik etdiyi Amerika nümayəndə heyəti həftə sonu Qətərin paytaxtı Dohada “Taliban” liderləri ilə görüşüb. Nəşr bildirir ki, tərəflər Əfqanıstanda qalan ABŞ vətəndaşlarının təxliyəsi üçün aparılan səylərin davam etdirilməsi, terrorizmlə mübarizə və ölkədə artan humanitar böhran da daxil olmaqla, bir çox məsələləri müzakirə ediblər.
 
Vaşinqton yeni Əfqanıstan hökumətinin xaricdəki milyardlarla dollara çıxışını əngəlləməyə davam edir, eyni zamanda onlardan inklüziv nazirlər kabineti qurmağı və qadın hüquqlarına hörmət etməyi tələb edir. Eyni zamanda Dövlət Departamentinin nümayəndələri israr edirlər ki, danışıqlar ABŞ-ın “Taliban” hökumətini tanıması demək deyil.
 
Yüksək vəzifəli “Taliban” nümayəndəsi “The Times”a Əfqanıstan rəsmilərinin ABŞ-ın mövqeyindən məyus olduqlarını söyləyib. Ancaq fikir ayrılığına baxmayaraq, Kabilin Vaşinqtonla qarşılıqlı əlaqəyə davam edəcəyini bildirib: “Taliblər hökumətlərini tanımağı və Əfqanıstan İslam Əmirliyinin aktivlərinin açılmasını tələb etdi. Problem həllini tapmadı. Hər iki tərəf bu məsələlərdə çıxılmaz vəziyyətdədir. Ölkəni idarə etmək üçün beynəlxalq yardıma ehtiyacımız var. Dünyanın önəmli ölkəsi olan Amerika Birləşmiş Ştatları ilə qarşılıqlı əlaqə bizim qalan ölkələr tərəfindən qlobal tanınmağımıza yol açacaq”.
 
Əfqanıstan nümayəndə heyətinə xarici işlər nazirinin səlahiyyətlərini icra edən Əmirxan Müttəki başçılıq edib. Bu heyətin tərkibinə 12 il Quantanamo həbsxanasında saxlanılmış keçmiş komandir Əbdül Haq Vasik də daxil idi. “The Times” yazır ki, hazırda o, yeni hökumətin kəşfiyyatına rəhbərlik edir və böyük ehtimalla “Əl-Qaidə” ilə əlaqələri hələ də davam edir.
 
Qəzetin yazdığına görə, iqtisadi çöküş fonunda “əfqan rejimi” xarici yardımların bərpasından ciddi narahatdır. Taliblər Kabili ələ keçirdikdən sonra xaricdən maliyyələşmə və böyük hissəsi ABŞ-da yerləşən təxminən 7 milyardlıq dondurulmuş aktivlərin ölkəyə daxil olması dayandırıldı.
 
Eyni zamanda hər iki tərəf terrorla mübarizə mövzusunda bir-birindən ehtiyat edir. Dohadakı danışıqlardan əvvəl “Taliban” İŞİD və ölkədə fəaliyyət göstərən digər ekstremist qruplara qarşı ABŞ-la əməkdaşlığı istisna edirdi.
 
İŞİD Əfqanıstanda avqust ayında Kabil hava limanında 13 Amerika əsgəri və onlarla mülki vətəndaşın ölümünə səbəb olan bir sıra terror aktlarının məsuliyyətini öz üzərinə götürdü. Qəzet xatırladır ki, ötən həftə Kunduz şəhərindəki məscidə edilən hücum ən azı 50 şiə müsəlmanın həyatına son qoydu.
 
“Taliban” nümayəndəsi Suhail Şahin israr edir ki, Kabilin İŞİD-lə mübarizədə Vaşinqtonun köməyinə ehtiyacı yoxdur: “Biz İŞİD-lə təkbaşına mübarizə apara bilərik. Hökumətimiz Əfqanıstanın daxili problemlərini həll etməyə qadirdir və İŞİD kimi qruplaşmalarla mübarizədə yenidən başqa xarici müdaxiləyə icazə vermirik. Vətəndaşlarımızı qorumaq üçün onlarla mübarizə aparacağıq”.