9 oktyabr, 2021-ci il. Türkiyənin Milli Kəşfiyyat Təşkilatı (MİT) Antalya və İstanbul şəhərlərində keçirdiyi əməliyyat nəticəsində 6 rus agentini ələ keçirdi. Onlardan ikisinin Ankarada “Bayraktar TB-2” PUA-larını istehsal edən firmanın ətrafında müşahidələr apardığı iddia edildi.

14 oktyabr, 2021-ci il. MİT Van şəhərində ehtiyata çıxmış bir iranlı zabiti İrana qaçırmaq istəyən casus şəbəkəsinə qarşı əməliyyat keçirdi. 2-si İran vətəndaşı olmaqla ümumilikdə 8 nəfər saxlanıldı.

21 oktyabr, 2021-ci il. MİT bu dəfə Türkiyəyə qarşı casusluq fəaliyyəti göstərən, 3 nəfərlik hücrə sistemi əsasında çalışan 15 nəfərlik Mossad (İsrail kəşfiyyatı) agentura şəbəkəsini zərərsizləşdirdi. 15 nəfərlik Mossad qrupu Türkiyə universitetlərində təhsil alan xarici tələbələri, xüsusilə də fələstinliləri izləyirmiş. Mossad-ın əsas məqsədi yüksək qiymətlər alan savadlı tələbələri əməkdaşlığa cəlb etmək olub.

Qeyd edək ki, MİT Mossad agentlərini 1 ilə yaxın kölgə kimi izləyib, nəhayət ötən gün genişmiqyaslı əməliyyatla onları ələ keçirib.

Bəs MİT-in Türkiyədə Rusiya, İran və İsrail kəşfiyyatına qarşı həyata keçirdiyi əməliyyatlar nə anlama gəlir? Türkiyə MİT vasitəsilə bu ölkələrə siyasi-diplomatik mesajmı ünvanlayır? 
Xüsusilə Mossad-a qarşı keçirilən səs-küylü əməliyyatın əhəmiyyəti nədən ibarət idi?

Bu və digər sualları təhlükəsizlik məsələləri üzrə türkiyəli ekspert, ehtiyatda olan zabit Abdullah Ağar EDNews-a verdiyi eksklüziv açıqlamada cavablandrıb.



“Düşünmürəm ki, sözügedən əməliyyatlar Türkiyənin hansısa bir dövlətə qarşı siyasi ismarıcı və ya reaksiyasıdır. Əksinə, bu əməliyyatlar onu uğurla icra edən MİT-in mesajlarını özündə ifadə edir.
MİT xarici agentura şəbəkələrinə qarşı həyata keçirdiyi uğurlu əməliyyatlarla əvvəlcə öz professionallığını nümayiş etdirir. Eyni zamanda iranlı, rusiyalı və israilli olmasından asılı olmayaraq ölkədə casusluq fəaliyyəti göstərən istənilən agentin ələ keçirilməsi MİT-in casus ovu işində dövlətlər arasında bir fərq qoymadığını da ortaya çıxarır.
MİT bu əməliyyatlarla Türkiyə ilə qonşu dövlətlərə də belə bir mesaj verir ki, kimliyindən, hansı dövlətə işləməsindən asılı olmayaraq istənilən casusu aşkarlayıb, ələ keçirmək bizim vəzifəmizdir və biz bu vəzifəni uğurla həyata keçiririk” – deyə ekspert bildirib.

Abdullah Ağar Mossad-a qarşı keçirilən əməliyyatı isə belə izah edib:
“Yaddaşım məni aldatmırsa, Mossad-a qarşı dünyada heç vaxt belə bir əməliyyat keçirilməyib. Keçirilibsə də, gizli saxlanılıb, ictimaiyyətə elan edilməyib.
Ona görə də, ötən gün MİT-in həyata keçirdiyi bu əməliyyatın hər şeydən əvvəl simvolik bir dəyəri var. Mossad və digər kəşfiyyat təşkilatlarına qarşı keçirilən əməliyyatlar gizli də qala bilərdi.
Çünki məsələnin bir diplomatik tərəfi də var. Lakin MİT uğurlu işini bütün ictimaiyyətə və dünyaya elan etdi ki, bu əməliyyatlar digər dövlətlər üçün görk olsun və heç bir dövlət Türkiyədə bu tipli casusluq fəaliyyətlərinə girişməsin.

Xüsusilə, Mossad əməliyyatı ilə MİT bütün dünyaya açıq mesaj verdi ki, yeri gələndə dünyanın ən güclü kəşfiyyat qrupunu belə çökdürə bilərik.
Mossad Türkiyədə təhsil alan xarici tələbələri izləyir, onları casusluğa cəlb edir və kəşfiyyat dilində desək, onları müxtəlif hücrələrdə “əkir”, yetişdirirdi.
Unutmayaq ki, rəqabətdə və ya müharibədə olduğunuz bir dövləti zəiflətməyin, onun gücünü parçalamağın iki yolu var: Ya öz casuslarınızı dövlətin strateji hücrələrinə sızdıracaqsınız, ya da şəbəkəni özünüz quracaqsız. Bu isə uzunmüddətli işdir və buna illər əvvəldən başlamaq lazımdır.

Məsələn, Mossad 10 il sonra Hamas və ya Hizbullah-ın rəhbər heyətinin yanına agent yerləşdirmək istəyirsə, buna indidən başlamalıdır. Başqa cür ifadə etsək, illər əvvəl toxumu səpir, gülü əkir və yetişib, cücərməsini gözləyir.

Eyni şəkildə Mossad Türkiyədə təhsil alan fələstinli tələbələrin arasında ən savadlı, qiymətləri yüksək olan tələbələri seçirdi. Onlarla başqa ad və məqsədlərlə əməkdaşlıq edirdi. Onlara müxtəlif işlər təklif edirdi. Sonra potensial əməkdaşının yetişdiyini və kəşfiyyata xidmətə hazır olduğunu anladıqda onu Fələstində müxtəlif dövlət qurumlarında və ya hərbi qruplaşmalarda rəhbər vəzifələrə gətirmək üçün əlindən gələni edirdi.

Təbii ki, bu şəbəkə sabah türk tələbələri də öz məqsədlərinə alət edə bilərdi. Bu baxımdan Mossad şəbəkəsinin zərərsizləşdirilməsi dövlət təhlükəsizliyi üçün əlamətdar hadisədir”.