- “Erməni malları üzərində inşa edilən bir dövlətimiz var”.
- “Dövlətə qatil deməyin deyirlər, olar, biz də “seriyalı qatil” deyərik!” (qondarma erməni soyqırımı haqqında)
- “100000 ermənini lazım gəlsə qovarıq deyən Baş nazir 100 il əvvəl atalarının bunu etmədiyini necə iddia edə bilər?”
- “Soyqırım olub-olmamasından çox, dövlətin haqlı göstərilməsinə qarşıyam.
1915-ci ildə dövlətin cinayət törətdiyi gün kimi aydındır” (“erməni soyqırımını” nəzərdə tutur).
- “Erməni soyqırımı ilə ilk tanışlığım universitetdə olub. 19 yaşındakı bir qızın hicabıyla bu qədər mübarizə aparan dövlət kim bilir başqalarının başına nələr gətirir deyə düşündüm”.

Bu fikirlərin müəllifi 2012-ci ildə erməni lobbisi tərəfindən “Türkiyə və Ermənistan arasında dialoqun inkişaf etdirilməsi”nə görə mükafatlandırılan, türk jurnalist (sözdə) Hilal Kaplandır.

Kaplan eyni illərdə Türkiyədə erməni lobbisinin dəstəyi ilə keçirilən bir çox konfranslarda və tədbirlərdə də iştirak edərək “erməni soyqırımını” müdafiə edib.
Eyni ildə yenə erməni lobbisinin dəstəyi ilə Ermənistana səfər edən Kaplan buradan qayıdan kimi Azərbaycanı sərt tənqid edən “Agos” qəzetində bir məqalə yazıb (Qeyd edək ki, “Agos” erməni lobbisinin dəstəyi ilə Türkiyədə fəaliyyət göstərən və ermənipərəst, anti-Azərbaycan mövqeyi ilə seçilən bir mətbuat qurumudur).

Baxaq, sözügedən məqalədə Kaplan nə yazır:
“Türkiyə Ermənistanla münasibətlərini normallaşdırması erməni soyqırımı məsələsinin həllini tapmasında zəmin yaradacaq. Ancaq bunun üçün Azərbaycanının təbii qaz təhdidini aşa biləcək qədər müstəqil və güclü bir ölkə olmalıyıq. “Mavi Marmara” şəhidlərinin ardınca İsraillə münasibətlərini artıran və müqavilələr imzalayan Azərbaycan deyilmi?
Bursada Türkiyə-Ermənistan futbol matçına Azərbaycan bayraqlarının buraxılmamasına cavab olaraq Bakıdakı Türk şəhidliyindəki bayraqları dirəklərinə qədər söküb çıxaran Azərbaycan iqtidarı deyilmi?
Bunları edən bir hökumətlə əməkdaşlığımız sadəcə “dost və qardaş” ölkə olmağımızdan qaynaqlanır iddiası mənə heç də konkret və inandırcı gəlmir. Qarabağda zülm edilənlər bizim qardaşımız, amma “Mavi Marmara”da zülm edilənlər Azərbaycanın qardaşı deyilmi?”

Açıq şəkildə Türkiyə və Azərbaycan münasibətlərinin dostluq və qardaşlıq münasibətləri olduğuna inanmadığını bildirən, Azərbaycana qarşı əsassız iddialar səsləndirib, Türkiyəni Ermənistanla diplomatik əlaqələri bərpa etməyə çağıran Kaplan hazırda Türkiyə Prezidenti Rəcəb Tayyip Ərdoğanın ən çox etibar etdiyi jurnalistlərdən biridir.
Hətta o səviyyədə ki, bu ilin iyul ayında Ərdoğanın qərarıyla Türkiyənin dövlət televiziyası olan TRT-nin idarə heyətinin üzvü təyin edilib.

Sabiq “fetoçu” (“Gülən Türkiyənin başına gələn ən gözəl şeydir” demişdi) hazırda isə “Ərdoğançı” olan Kaplan Türkiyənin Azərbaycanı dəstəkləməsindən “ruhlanaraq”, vaxtilə ən azından dost və qardaş olmadığını iddia etdiyi Azərbaycanın lehinə onlarla məqalələr yazıb, müsahibələr verib.
Hətta ötən il Azərbaycan prezidentinin xarici siyasət məsələləri üzrə köməkçisi Hikmət Hacıyevlə də görüşə bilib.

Ərdoğanın xarici səfərlərində tez-tez özüylə apardığı Kaplan sabah onunla birlikdə Azərbaycana gələ bilər. Erməni lobbisinin dəstəyi ilə Azərbaycan əleyhinə yazılar yazmış, öz dövlətini ermənilərə qarşı soyqırım törətməkdə ittiham etmiş Kaplanın bu gün heç nə olmamış kimi Azərbaycana gəlib-getməsi, dövlət rəsmiləri ilə görüşməsi bir vətəndaş kimi bizləri narahat etməyə bilməz.

Bu gün dəstəklədiyi iqtidarın sifarişi ilə ölkəmizə qarşı mövqeyini 180 dərəcə dəyişən Kaplanın gələcəkdə Türkiyədə iqtidar dəyişər-dəyişməz yenə ermənipərəst təfəkkürlə öz qələmini dövlətimizə və millətimizə çevirəcəyi bizdə şübhə doğurmur.
O baxımdan keçmişi ləkəli, gələcəyi naməlum olan belə bir jurnalistin 2012-də türk bayraqlarını sökməkdə ittiham etdiyi dövlətə səfər etməsinin qarşısı alınmalı, bu şəxs ümumiyyətlə Azərbaycanda “persona-non qrata” elan edilməlidir.

Nicat İsmayılov