Suriyanın şimalında Türkiyə ordusunun YPG/PKK terrorçularına qarşı yeni irimiqyaslı hərbi əməliyyatlara hazırlaşdığı haqda xəbərlərin daxil olduğu bir vaxtda Rusiya da regionda öz hərbi iştirakını sürətlə genişləndirir. virtualaz.org xəbər verir ki, Rusiya ötən bir neçə sutka ərzində Suriyaya əlavə olaraq daha 20 qırıcı göndərib.

Rusiya mənbələrinin bildirdiyinə görə, Türkiyə ilə sərhədin cəmi 4 kilometrliyində yerləşən Qamışlı aviabazasına 4 MiQ-29, 5 Su-35 qırıcıları və 12 ədəd Su-34 qırıcı-bombardmançıları göndərilib. Bundan əvvəl isə həmin bazada Rusiyanın 4 ədəd ən yeni Su-35 qırıcıları yerləşdirilmişdi.



Habelə Qamışlı aviabazasında ən azı iki Ka-52 zərbə vertolyotunun göründüyü bildirilir. Hava döyüş vasitələrinin hamısı Rusiya ərazisindəki bazalardan İran və İraqın hava məkanından keçməklə göndərilib. Rusiya Hava Kosmik Qüvvələrinin komandanlığı Suriyaya əlavə döyüş təyyarələrinin göndərilməsini şərh etmir.

Digər məlumata görə, Türkiyə ilə sərhədə yaxın Ayn İssa qəsəbəsindəki Rusiya bazası da gücləndirilib. Bundan əvvəl rusların müxalif suriyalı yaraqlıların - “Suriya Milli Ordusu”nun zərbələrindən sonra həmin bazanı tərk etdikləri bildirilmişdi.
Lakin yeni əldə edilmiş görüntülərə əsasən bazada rusların iştirakı qalır və orada əlavə möhkəmləndirmə işləri aparılıb.



Habelə Rusiya aviasiyası Suriyanın şimalında, o cümlədən Türkiyə ilə sərhədə yaxın nöqtələrdə “Suriya Milli Ordusu”nun mövqelərinə dalbadal hava zərbələri endirir. Ötən şənbə günü azı 25 hava zərbəsi endirilib.

Xatırladaq ki, Türkiyə mənbələri Ankaranın Suriyanın şimalında 35 minlik canlı qüvvənin, o cümlədən “Suriya Milli Ordusu”nun qüvvələrinin iştirakı ilə irimiqyaslı hərbi əməliyyatların hər an başlaya biləcəyi haqda xəbərlər yayır.
Bu əməliyyatlara hazırlıq məqsədi ilə Türkiyə ordusunun hərbi texnika kalonları Suriyanın şimalına daxil olur.



Ötən gün Türkiyənin xarici işlər naziri Mövlud Çavuşoğlu CNN Türk kanalına müsahibəsində bildirib ki, ABŞ və Rusiya üzərlərinə götürdükləri öhdəliklərə zidd olaraq kürd silahlı birləşmələrini sərhəddən 30 kilometr içəri çəkməyiblər.

“ABŞ və Rusiya PKK terrorçularının nəzarətlərində olan ərazilərdən 30 kilometr içəri çəkməli idilər. Amma indiyə qədər onlar vədlərinə əməl etməyiblər.
Biz vəd veririksə buna əməl edirik. Razılaşmaya imza atanda onu yerinə yetirmək üçün nə lazımsa edirik. Lakin nə Rusiya, nə ABŞ, - bunu açıq desək, - sözlərinin üstündə durmadılar”, - Çavuşoğlu bildirib.

Nazir qeyd edib ki, Türkiyə belə vəziyyətdə öz problemini özü müstəqil həll edəcək.