Bakı Ağır Cinayətlər Məhkəməsində ləğv edilmiş KİVDF-nin sabiq icraçı direktoru Vüqar Səfərlinin cinayət işi üzrə növbəti məhkəmə prosesi keçirilib.

Prosesdə təqsirləndirilən şəxslərin dindirilməsi davam edib. Əvvəlcə "Altun" şadlıq sarayında inzibatçı işləmiş Şahin İbrahimov ifadə verib. O, ifadəsində deyib ki, 2018-ci ildə KİVDF-nin tədbiri keçirilən ərəfədə "Altun" sarayında inzibatçı olub. Tədbirlərin biri Novruz, biri isə Mətbuat günündə keçirilib.

"Dövlət tədbiri olduğundan Vüqar Səfərli tədbirdən iki-üç saat əvvəl gəlir, özü nəzarət edir, gələn qonaqların sayını deyirdi.
350 nəfərlik tədbirdə Vüqar müəllim 270 nəfər stul sifariş edirdi. Tədbir bitəndən sonra isə şou proqram üçün 15-20 nəfərlik yer sifariş verirdi. Rəsmi tədbirdən sonra 15-20 nəfərlik şou proqram keçirilirdi", - keçmiş inzibatçı bildirib.



Dövlət ittihamçısının suallarını cavablandıran Ş.İbrahimov deyib ki, rəsmi tədbirlərdən təxminən yarım ay öncə onlara sifariş daxil olurdu.

Prokurorun "tədbirlərin keçirilməsi ilə bağlı hansı razılaşdırmalar olurdu?" sualına Ş.İbrahimov belə cavab verib:
"KİVDF nümayəndəsi gəlirdi, sənədlər imzalanırdı.
Tender olurdu, lakin biz iştirak etmirdik. Faktiki olaraq menyunu təqdim edirdik, razılaşırdıq. Bəzən gəlməyənlər olurdu.
Vüqar müəllim deyirdi ki, stolu rezerv saxlayın.  Müğənniləri, şou proqramı biz təşkil etmirdik. Pulu bizim hesaba köçürürdülər. Şou proqramın pullu hissəsini bizdən götürür, onlar ödəyirdilər. Tədbirdən sonra isə pulu kassadan ya Vüqar müəllim, ya da nümayəndəsi götürürdü".



Prosesdə ifadə verən "Xəmsə" restoranının inzibatçısı Bəxtiyar Fətullayev isə ifadəsində  tədbirlərin keçirilməsi ilə bağlı tenderdə iştirak etdiyini deyib:
"Tenderlə bağlı internetdə elan vermişdilər. Biz də sənədlərimizi hazırlayıb göndərdik, tenderdə qalib gəldik. Bundan sonra müqaviə imzalandı.
Müqavilədəki bütün öhdəlikləri yerinə yetirmişik.  Tədbirin keçirilməsi üçün  400 nəfərlik stol hazırlanırıdı. Tədbirinin sonunda akt tərtib olunurdu. Ertəsi gün  ödənişlər edilirdi".

Təqsirləndirilən şəxs ona elan olunmuş ittihamla özünü təqsirli bilmədiyini deyib.

Dövlət ittihamçısının "siz müqaviləni kiminlə bağlamısınız, razıalaşdırma necə olub?" sualına restoran inzibatçısı "internetdə elan verilib, mən də elektron qaydada 420 manat pul ödəmişəm" deyib.



B.Fətullayev əlavə olaraq bildirib ki, 400 nəfərlik stol açılsa da, tədbirə daha çox adam gəlib: 
"Çünki elə qonaqlar var idi, gəlib yarım saat oturub gedirdi.
Orda elə qonaqlar var idi ki, redaksiyalarına belə yemək göndərirdilər, menyuda olmayan içkilər istəyirdilər.
Tanınmış adamlar çox olduğu üçün, biz çalışırdıq ki, bütün dediklərini edək. Çünki reklam olunurduq. KİV bizi reklam edirdi, bundan sonra çoxlu toylar tuturduq. Mənim Vüqar Səfərli ilə heç bir söhbətim olmayıb, Təhminə Yaqubovanı isə burada görmüşəm".

Məhkəmə prosesi noyabrın 23-də davam etdiriləcək.

I.Rafiqqızı