Rusiyanın Ukraynaya hücum etmək təhlükəsi üçün əsaslı səbəblərin olmasına baxmayaraq, 
Kremlin rəhbəri Vladimir Putinin indi belə bir addım atacağı ehtimalı yoxdur. 
Rusiya prezidentinin prioriteti Sovet imperiyasının bərpası deyil, onun üçün heç də az əhəmiyyət 
kəsb etməyən qaz layihəsinin həyata keçirilməsidir. 
“Şimal axını-2” boru kəməri artıq tamamlanaraq sertifikatlaşdırmanı gözləyir və istənilən hərbi 
əməliyyat onun işə salınmasının ləğvinə səbəb ola bilər.
 
Bu sətirlər jurnalist Leonid Berşidskinin Amerikanın “Bloomberg” nəşrindəki yazısındandır.
 
Onun fikrincə, Ukrayna yaxınlığında Rusiya qoşunlarının yüksək konsentrasiyası və Belarus-Polşa 
sərhədində 
davam edən miqrasiya böhranı səbəbindən Qərb yenidən “əbədi sual” qarşısındadır: “Prezident 
Vladimir Putin nə fikirləşir? 
Rusiyadan hansısa güclü və sürətli addım gözləməyə ehtiyac varmı?” Bununla belə, Rusiyada 
baş verən proseslərin qeyri-şəffaflığını, habelə Kreml rəhbərinin əlində cəmləşən hakimiyyəti 
nəzərə alsaq, bu suallara istənilən cavab cəhdi çox vaxt “fikirləri oxumaq məşqinə 
bənzəyir”.
 
Buna baxmayaraq, ABŞ Rusiyanın Ukraynaya hücumu ehtimalından ciddi şəkildə narahatdır. 
Və bu narahatlıq inandırıcı analizlərlə əsaslandırılır. Karnegi Beynəlxalq Sülh Fondunun ekspertləri
əmindirlər ki, Putin Sovet imperiyasını dirçəltməyə çalışır və bu planın əsas elementi Moskvanın
Ukrayna üzərində təsirini bərpa etməkdir.
Bundan əlavə, onlar hesab edirlər ki, çoxları Kreml rəhbərinin atacağı addımları əvvəlcədən 
proqnozlaşdırmaqla səhv edirlər. Əslində o, emosiyalara 
qapılaraq hərəkət edə bilər, çünki Putin Rusiyanın gücünü bərpa edəcək şəxs kimi öz irsini
əbədiləşdirmək istəyir, ona görə də Ukraynaya hücum ehtimalları da gözləniləndir.
 
Berşidski etiraf edir ki, bunlar tutarlı arqumentlərdir, çünki Putin həqiqətən də Krımın ilhaqını 
özünün ən böyük nailiyyətlərindən biri hesab edir və Ukrayna və Belarusla bağlı siyasəti 
və bəyanatları onun slavyan xalqlarının birləşməsinə çalışdığına heç bir şübhə yeri qoymur. 
Yaşlandıqca bunu həyata keçirmək üçün vaxtının azaldığını başa düşür.
Eyni zamanda, Rusiya həmişə “strateji səbri” ilə seçilib. Kreml Ukraynanın anti-Rusiya əhval-ruhiyyəli hökumətinin ABŞ-la yanaşı Avropa Birliyindən də məyus olaraq Rusiyanın qanadı altına qayıtmasını
gözləməyə hazırdır. 
Belarus prezidenti Aleksandr Lukaşenkonun öz ölkəsində qurduğu unikal diktaturaya dözməyə də
razıdır. Bununla yanaşı, Moskva oradakı hakimiyyətin qərbyönlü müxalifətin əlinə keçməməsinə
diqqət yetirir və ümid edir ki, hazırkı dövlət başçısı gedəndən sonra iqtisadi və hərbi təzyiqlərdən
ehtiyatlı istifadə sayəsində İttifaq dövləti çərçivəsində ölkəni de-fakto olaraq Rusiyanın bir hissəsinə
çevirmək mümkün olacaq.
 
Hələlik Putin özünün ən yaxın müttəfiqləri arasında layiqli davamçı görmür və tamamilə inanır ki, 
Dmitri Medvedevlə 2008-2012-ci illərdə keçirilən eksperiment uğursuzluqla nəticələnib. 
Bu o deməkdir ki, Rusiyanın strateji səbri Putinin öz fiziki imkanları haqqında 
təsəvvürləri ilə məhdudlaşır: o, özü üçün çox gec olmadan hərəkətə keçmə ehtiyacını 
hiss edə bilər. Bu cür emosional təzyiq Putinin öz hərəkətlərinə görə ödəməli olacağı 
bədəl qavrayışını təhrif edə bilər, - deyə Berşidski xəbərdarlıq edir.
 
Bununla belə, müəllif əmindir ki, indi Putin heç nəyə qərar verməyəcək, çünki Kreml rəhbəri
diqqətini onun üçün heç də az əhəmiyyət kəb etməyən başqa bir xarici siyasət layihəsinə, yəni
qaz layihəsinin həyata keçirilməsinə yönəldib. 
Putinin dövründə Türkiyə, Çin və Almaniyaya aparan yeni boru kəmərləri şəbəkəsi regional ittifaqları 
gücləndirməli və Rusiya üçün Avropaya “alman pəncərəsi”ni açıq saxlamalıdır. 
Bu, həm də slavyan xalqlarını birləşdirən əsas elementdir: axı, Ukrayna və Belarusun 
hazırkı hökumət dairələri Rusiyanın mavi yanacağının Aİ-yə tranzitinin qarantı olmaqla 
Moskvaya həddən artıq çox təsir gücünə malikdirlər  və bu, onları Kremldən asılı olmamaq 
yolunda həmişə şirnikdirəcək.
 

 
İndi qaz layihəsi Putin üçün əsas prioritetdir və onun əsas elementlərindən biri - “Şimal axını-2” artıq 
tamamlanıb və yalnız sertifikatlaşdırmanı gözləyir. Rusiya Ukraynaya qarşı genişmiqyaslı hücuma başlasa, onun buraxılması prosesi dayandırılacaq. 
Ola bilsin  kiçik miqyaslı hərbi əməliyyat belə nəticəyə gətirib çıxarmasın,  lakin kəmərin işə salınmasının vaxtı yenidən dəyişəcək, səylə qurulan əlaqələr zəifləyəcək və ABŞ “Şimal axını-2” ilə mübarizə və inandırıcı arqumentlər üçün vaxt qazanacaq.
 
Gələn il Baltik dənizinin dibində qaz kəmərinin işə salınması və onu nə iləsə əvəzləməyin mümkün
olmaması üçün Putin təzyiq və təhdidləri konstruktiv mövqe ilə birləşdirərək mürəkkəb oyun oynamalıdır. 
Kreml rəhbəri Avropadakı enerji böhranına və onun həllində kömək istəyənlərə sərt şəkildə soyuqqanlı 
reaksiya verib. O, həmçinin Rusiyanın mavi yanacağının Polşaya tranzitini dayandırmaqla hədələdiyinə görə Lukaşenkonun əllərindən vurmağa tələsməyib. 

Rusiya prezidenti üçün Belarus-Polşa sərhədindəki miqrasiya böhranı və onun nəticələri, 
Avropanın qaz bazarındakı problemlər və hətta Ukrayna ilə gərgin münasibətlər yalnız 
“Şimal axını-2”-nin xeyrinə olan arqumentlərdir. 
Onun “belə arqumentlərin yaranmasına” nə dərəcədə töhfə verdiyini dəqiq söyləmək mümkün 
deyil, lakin onlardan maksimum yararlanacağına şübhə yoxdur, - deyə Berşidski fikrini yekunlaşdırıb.
 
Miraslan