Gəncə Şəhər Təhsil İdarəsi

Məlum olduğu kimi, bir neçə il öncə, yəni 2016-cı ildən təhsil, mədəniyyət, o cümlədən bir neçə nazirlikdə struktur dəyişikləri aparıldı  və regional idarələr yarandı. Məsələn, 2017-ci ildə mədəniyyət nazirliyi tərəfindən regional mədəniyyət idarələri  yarandı.
Təhsil nazirliyi tərəfindən isə regionallaşma 2016-cı ildə başlasa da, proses bu günə qədər tam başa çatmamış qaldı.
Belə ki, 2016-cı ildə regionlarda hesablaşma mərkəzləri, tam olaraq Ərazi Maliyyə Hesablaşma Mərkəzləri yaransa da, təhsil idarələri bu günə qədər fəaliyyətlərinə ayrıca, yəni maliyyə cəhətdən Regional Ərazi Hesablaşma Mərkəzlərinə tabe olsalar da, təhsilə aid təlimatları birbaşa təhsil nazirliyindən alaraq fəaliyyət göstərməkdədirlər.

Özü özünü “rəis” elan edən rəis

Hazırda əldə etdiyimiz məlumata görə artıq 2022-ci ilin yanvar ayından təhsil nazirliyi tərəfindən  Regional Təhsil idarələri yaranması ilə bağlı yerlərdə struktur dəyişikliyi başlayacaq. Tam olaraq regional təhsil və hesablaşma mərkəzləri birləşərək  yeganə quruma -“Regional Təhsil İdarəsi”nə çevrilərək fəaliyyət göstərəcək.
 
 İlginc olan budur ki, bu günə qədər rəsmi olaraq regional təhsil idarələri hələ yaranmasa da, yəni ölkə başçısı, Prezident İlham Əliyev  bu idarələrlin yaranması ilə  bağlı hələ ki, hər hansı  sərəncam imzalamadığı halda, Gəncə şəhərindəki Azərbaycan Kənd Təsərrüfatı Akademiyasını bitirib təhsil idarəsinin rəisi vəzifəsində çalışan Anar Qədiməliyev... artıq özünü Regional Təhsil idarəsinin rəisi elan edib. Bəli, bu gün onu bu qeyri-rəsmi özfəaliyyətinə görə regionda onu hətta “təhsilin mafiya babası” adlandıranlar da var.

Demək olar ki, artıq regionda özünü Təhsil naziri Emin Əmrullayevin və Orxan Abbasovun yaxın dostu kimi tanıdan Anar Qədiməliyev, nətiçə etibarı ilə həqiqətən də bunu bir çox əməlləri ilə təsdiqləyib.
Necə? Bu günTəhsil sahəsində  Anar Qədiməliyevin kiminlə intriqası varsa, onu birbaşa şəxsən təhsil naziri Emin Əmrullayevin adı və ya əli ilə, yəni imzası ilə işdən azad et(dir)ir, kimi istəsə əksinə, vəzifəyə təyin et(dir)məyi bacarır. Onun bu “özfəaliyyəti” və “şəxsi maraq” effekti yaradan iş prinsipi hətta Samux təhsil şöbəsində də öz əksini tapır. 

İşin, yəni loru dillə desək, “yerə su salmanın”- ştat vahidi yaratmağın yolu isə çox asan və sadədir: məşhur təmsildəki kimi “suyu niyə bulandırdın” bəhanəsi ilə hər hansı işçi ilə bağlı nazirliyə istədiyi intonasiyada “şanlı” məktub, daha sonra isə ən azı töhmət və sonra da... auksiona çıxarılan təptəzə köhnə - yeni iş yeri və s. və i.

Bir sözlə, özünün təbiri ilə desək, təyinat aldığı gündən təhsildə  dolanışıq axtaran Anar Qədiməliyev təhsil məsələlərinə “baxır” və görünür dolanışığın da kələfinin ucunu tapıb. Nə qədər absurd olsa da demək zorundayıq: Təbii ki, bu elə belə də olmalıydı. Nədəni də bu ki... 

Bu gün hələlik Gəncə və Samux təhsil idarələrini necə deyərlər, ələkdən keçirən kənd təsərrüfatı mütəxəssisinin təhsildə illərin gərəkən təcrübəsinin olmamasını və bundan dolayı səriştəsizliyini ört-basdır və himayə edənin özünün də kənd təsərrüfatı üzrə mütəxəssis olduğu deyilən... Təhsil Nazirliyinin Ümumi və Məktəbəqədər Təhsil şöbəsinin müdir əvəzi Orxan Abbasovdur.
O Orxan Abbasov ki, onun “yardım əli” ilə Anar Qədiməliyev şəxsi maraq ucbatından “su bulandırmaq” bəhanəsi ilə çoxlarının ştatına qələm çəkib, əmək fəaliyyətinə xitam ver(dir)ib.
Şəkildə nazir Emin Əmrullayev, Anar Qədiməliyev (solda) və nazirliyin əməkdaşı Orxan Abbasov 

Bu gün nazirlikdən Anar Qədiməliyevin qanunsuz əməllərini ört -basdır edəcək olan güclü əlin varlığı regionda açıq-aydın sezilir. Təhsil idarəsində artıq özünə müvafiq qruplaşma yaradıb onunla çalışan Qədiməliyevin zamanında baş verən insidentlər saysız olsa da, bu gün təhsil nazirinin iradları, qanunamüvafiq addımları horizontda belə görünmür.
Bu isə təhsil işçilərinin haqlı narazılığına səbəb olur. Ona görədir ki, regionun təhsil işçilərinin işə (əsasən də “ov”un direktorlar üçün təşkili) davamiyyəti təlim-tədris, tərbiyə baxımından deyil, biyara dəvətini xatırladır.

Yeri gəlmişkən, bu günlərdə təhsil sahəsindəki söz-söhbət ölkədə  o qədər şişib ki, hətta Milli Məclisdə belə reaksiya doğurub. Millət vəkili Etibar Əliyevin  iradları heç də əsassız deyil. Çünki Anar Qədiməliyevin təyinatından sonra Gəncəbasar təhsil sahəsində ardı-arası kəsilməyən narazılıqlar baş qaldırıb, təhsil işçiləri arasında narazılıqlar böyüyüb.
Hansısa çömçə regionu dayanmadan qarışdırır. Artıq şüurlarda, dillərdə  Soros çömçəsinin də sözü gedir. Müəllif olaraq nəzərinizə çatdrmağı, o cümlədən  xatırlatmağı  özümə borc bilirəm ki, hər məktəbin kollektivində 50-100, daha artıq müəllim heyəti fəaliyyət göstərir və hər müəllim də bir ailənin təmsilçisidir. Bir məktəbdə baş verən problemi, haqlı narazılığı  müəllim ailəyə daşıyıb aparırsa nə baş verir?

Yaranmış problemi bu və ya digər nöqteyi-nəzərdən analız edərkən daha qaranlıq dəhlizlərə girilir. Məsələn, bu gün bizim təhsil sahəsində peşəkarlarımız hara yox oldu ki, pedaqogika, psixologiyadan tədris almayanlar təhsil sahəsinə ayaq açdı?

Bəli, işin kökündə duran ilk şərt məhz odur ki, nəinki təhsil naziri, eləcə də nazirin əksəriyyəti  “çörəyi çörəkçiyə” deyil, yaxın ətrafına, o ətraf da öz ətrafına verir. Qeyri peşəkar “çörəkçi”nin də... məlum, hamı bilir ki kündəsi “küt” gedir.

Yəni hər təyinat alan nazir, hər gələn rəhbər işçi “öz adamlarımla işləmək istəyirəm” prinsipini ortaya atır. Özü ilə gələndə bir sürü “kadr” gətirir. Peşəkarlar qalır qıraqda boynu bükük, naşı yaxın çevrə də təhsilimizi (eləcə də digər nazirlikdəkilər) indiki pis halına salır. Soruşmaq ayıb olmasın, sizin yanınızdakı yaxınlarınızsa, bəs onda yerdə qalanlar kimdi? Belə çıxır ki,  kimsəsizlər?..
Yanılırsınız, yerdə qalanlar adi, sıravi vətəndaşlar olsa da, onların güvən yeri bir kəlməsi ilə sizlərə, necə deyərlər, “sarısını udduran” Prezidentdir.
Görünür, hələlik bu gün “məmur” səlahiyyəti, sözü regionda daha keçərlidir ki, Gəncə, Samux təhsil sferasında yaşanan qalmaqallardan edilən şikayətlərə nazirlik tərəfindən, eləcə də digər səlahiyyətli qurumlardan münasibət bildirilmir. Amma yenə də ümid edək ki, təhsil nazirliyi öz problemini özü çözəcək...

İndi isə Təhsil nazirinin və ictimaiyyətin diqqətini Gəncə, eləcə də Anar Qədiməliyevin qurub-quraşdırdığı regional idarənin hələlik bir üzvü olan Samux rayonunda məktəblərin hansı problemlərlə üzləşməsinə yönəldək.

Təhsil naziri Emin Əmrullayevin menyusuna

A.Qədiməliyev Gəncə təhsil idarəsinə təyin olandan bəri bir neçə məktəbə direktor təyinatı olub. Məsələn, öncə 11 saylı tam orta məktəbin direktor əvəzi olan Məmmədova Ülfət Məmməd qızı direktorluq imtahanından 41 balla keçməsinə baxmayaraq, həmin məktəbə uşaq sayının az olmasına görə bağlanan 46 saylı tam orta  məktəbin direktoru İsmayılova Saidə Rəşid qızı təyin olundu.
Yeri gəlmişkən nəzərinizə çatdırım ki, Ülfət Məmmədova hələ imtahan verənə qədər artıq bir neçə il olardı ki, müvəqqəti əmrlə elə 11 saylı tam orta məktəbin direktoru vəzifəsini içra edirdi. 

Haşiyə: Bu   günlərdə mətbuatdan uzun müddət təhsildə bilik və səriştəsi  ilə seçilən kadrlardan olan sabiq təhsil naziri Misir Mərdanovun məktəb direktorları ilə bağlı fikrini oxudum. Bir pedaqoq olaraq Misir müəllim demişkən, nəyə görə məktəb direktorları elə həmin məktəbin kollektivindən olmasın?
Direktorluğa namizəd elə məktəbin öz kollektivindən seçilməsi daha yaxşı olmazmı?  
Daha bir nüans, direktorluğa imtahan keçirildikdən sonra ikinci tur, yəni namizədləri üstəlik müsabiqədən keçirmək əlavə bir iş deyilmi? Bəs müsabiqənin imtahandan sonra bir də keçirilməsinin arxasında hansı mətləb, məram durur?

Görünür, test üsulu ilə keçirilən direktorluq imtahanının aparılması üçün  tərtib olunan suallar direktor təyinatı üçün  yetirincə əhatəli tərtib olunmur. Yox, əgər test imtahanları şəffaf mühitdə keçirilirsə (əldə etdiyimiz məlumata görə həqiqətəndə elə olur),  bəs təkrar namizədləri  müsabiqəyə dəvət etməyin arxasında nə məqsəd durur?
Yəni belə çıxır ki, direktorluq kürsüsünə sahib olmaq üçün test imtahanından keçən hər bir direktor olacaq namizədlə şəxsi tanışlıq vacıb  sayılır. Bu, nazirliyin daxili iş prinsipidir, nəyə görəsini isə təbii ki nazir daha dəqiq bilər.
Bu gün isə gördüyümüz, eşitdiyimiz odur ki, Gəncə məktəblərindəki boş olan direktorluğa təyin olunan kürsülərdə test imtahanından müvəffəqiyyət alanlar deyil, müsabiqədən “keçə bilənlər”oturub. Yəni yuxarı bal toplayanlar qalıb kənarda, aşağı bal toplayanlar təyinat alıb. Görünür, Təhsil nazirlyində Gəncənin ümumtəhsil məktəblərinə direktor təyinatı üçün tutulan siyahını tərsinə tutub oxuyublar.

Bu təyinatın ilgincliyini incələmək üçün qayıdaq 46 saylı tam orta məktəbinin direktor təyinatına... Məsələ ondan ibarətdir ki, hələ illər öncə Saidə İsmayılova 46 saylı tam orta məktəbdə direktor olduqdan sonra burada baş verən dartışmaların daha da böyüməsindən Gəncədə az adam məlumatsız olardı.
Vaxtaşırı valideynlərlə, müəllim kollektivində baş verən qalmaqalın sonucu olaraq məktəbdə şagirdlərin sayı 330-dan 135 nəfərə qədər azalsa da, direktora bununla bağlı yalnız şifahi iradlar tutulardı, ona rəsmi irad tutulması mümkünsüz olurdu, yəqin bunun da bir səbəbi vardı, o da direktorun maddi durumu. 

Burada baş verən çəkişmədən, məktəbin kollektivi ilə, o cümlədən valideynlərlə rəftarında daim münaqişə yaradanın məhz direktor olmasını nəinki təhsil idarəsində, eləcə də Gəncəbasarda bilməyən az adam tapılardı.
Bəs necə oldu ki, 41 balı olan direktor Ülfət Məmmədova kollektivlə yola getməyən, şagird və valideyn kontingentinin nəinki rəğbətini qazana bilməyən, əksinə, onlarla heç cür dil tapa bilməyən, ümumiyyətlə isə pedaqoji prosesdə dəfələrlə xətalara yol verən Saidə İsmayılova kimi bir kadrla əvəz olundu? Hansı səbəbdən? 
Bu təyinatda həlledici amillərin gözardı edilməsi korrupsiya koridorunun qaranlıq keçidindən xəbər vermiş olmasın?

Əgər yanılırıqsa, onda əziz oxucu və təhsil ekspertlərinə üz tutaraq soruşuruq: sizcə belə bir yerdəyişmənin kökündə nə durur? Və ya 41 bal toplamış direktoru işlədiyi məktəbdə daim problem yaradan direktorla əvəzləmək hansı kriteriyalarla ola bilər? Bizə və həm də sizə elə gəlmirmi ki, artıq bu sualın cavabı Gəncə Şəhər Təhsil İdarəsinin müdiri Anar Qədiməliyev və Təhsil nazirliyində ona yaxın olan havadarı Ümumi və Məktəbəqədər Təhsil şöbəsinin müdir əvəzi  Orxan Abbasovdadır...
        
Digər bir fakta diqqət yetirək: Gəncə şəhəri üzrə məktəblərdə direktorluq kürsüsü uğrunda  keçirilən müsabiqə balı 24-dən başladığından, aşağı bal toplayan namizədlər ikinci tura, yəni məlum müsabiqəyə  buraxılmır.
Çifayda. Əlahəzrət fakta görə müsabiqədə iştirak etmək hüququna malik olmasa da, müsabiqədən sonra Mehriban Muradova 20 saylı tam orta məktəbə direktor təyin olunub.
20 saylı  tam  orta məktəbə yeni direktor təyin olunan  Mehriban Muradovanın direktorluğa verdiyi imtahandan topladığı keçid balı... 23-dür. Təəccübləndinizmi? Sizcə Əlahəzrət Faktı-daha doğrusu, QANUNU tapdalayıb üstündən keçməyə adamı nə sövq edə bilər? Düz fikirləşirsiniz: arxalı, dayaqlı olmaq və... əlbəttə ki, istənilən qədər pulu olmaq.

Daha bir fakt. Əldə etdiyimiz məlumatda deyilir ki, müəllimlər MİQ-dən topladığı uyğun bala əsasən ərazi üzrə yerləşdirilsə də, bu il əksər imtahan verənlərin bəzilərinə MİQ-dən kənar “yaşıl işıq” yandırılıb.  Kimlərəsə bu “yaşıl işığı” kim və nə üçün və ya nə müqabilində yandırır?.. Güman edirik ki, sualların cavabı hamıya aydındır.

Bəs Gəncə Şəhərinin Təhsil Şöbəsinin proteksiya səbəbilə ambisiyalı müdirinə belə səlahiyyətləri kim havalə edib?

Həəəə, bunun üçün biz bir az əvvələ, yəni Anar Qədiməliyevin daha öncə çalışdığı dövrə qayıtmalıyıq. Mental məsələdir, təbii ki hər yerdə olduğu kimi, Təhsil nazirliyində də “qruplaşma” var. Təhsil naziri Emin Əmrullayev 2020-ci ildə Təhsil İnstitunun direktoru işləyərkən artıq Anar Qədiməliyev və Orxan Abbasovla yaxından tanış olmuşlar. 

Diqqətinizə çatdıraq ki, Orxan Abbasovun da Anar Qədiməliyev kimi AKTA-da ( indiki ADAU) kənd təsərrüfatı üzrə mühasibat uçotu və audit ixtisası üzrə  ali təhsil aldığı bildirilir. Sual olunur: Əcəba, təhsil sahəsində, yəni orta məktəblərdə kənd təsərrüfatı mütəxəssislərinin nə işi var? Yəni orta məktəb təhsili üzrə hər il alı məktəblərdən mütəxəssis kimi məzun olan minlərlə müəllim, yaxud illərini təhsil sahəsində qoyan təcrübəli kadrlarımız tükəndimi?
Sözegedən şəxslərin məlum kombinasiyasından belə çıxmırmı ki, hər cür məntiqin əksinə olsa da bu gün təhsil sahəsində kadr çatışmazlığı var? Bəlkə ondan yana  məcburən kənd təsərrüfatının kadrlarına müraciət etməli oluruq? Bəs ölkədə fəaliyyət göstərən, təhsil mütəxəssisi istehsal edən universitetlər və onun  məzunları hara getdi?..

Təəssüf hissi ilə olsa da bizə bircə onu demək qalır ki, “atın qabağına ət, itin qabağına ot” siyasətinin arxasında duranlar, o siyasəti yeridənlər bu gün hələ ki, təhsilin onurğasını sındırmaqla məşğuldurlar...

“Təhsili olmayan millətin gələcəyi yoxdur”
Heydər Əliyev

Ulu öndərin təhsillə bağlı dediyi qızıl kəlamlar niyə və nədən unuduldu? Neçə oldu ki, tarixə qızıl hərflərlə yazılan bu kəlamlar digərləri ilə əvəz olunaraq bizim gələcəyimizi təhlükə altına atır. Bir düşünün, hər gün işə gələn müəllim ayağını məktəbin kəndarına atar-atmaz ancaq qalmaqalla rastlaşır, haqsız iradlar, pul yığımları və s.
Bu sistemdə hansı nailiyyətdən bəhs etmək olar? Üzümüzü ictimaiyyətə tutaraq soruşuruq, bu gün nədən bu vəziyyət gələçəyimiz dediyimiz gənc nəslin təlim-tərbiyəsi ilə məşğul olan müəllimin başına gəlir?
Sizcə gərginliklə üzləşən müəllimin tədrisə davamı necə olar? Müəllim bu gün özünü məktəbə nəyə görə  gələcəyimiz olan nəslin təlim tərbiyəsi üçün deyil, biyara gəlmiş kimi hiss etməlidir?

Bu, daha uzun bir açıqlaması olan problemdi, mövzudan uzaqlaşmadan qayıdaq Gəncəbasara.
Azərbaycan təhsilinin bugünkü vəziyyətini arayıb-araşdırmaq üçün  (təbii ki söhbət hal-hazırda orta ümumtəhsil məktəblərindən, model olaraq Gəncəbasardakı çəkişmələrdən, əsasən Gəncə və Samux təhsil idarələrində baş verən özbaşınalıqdan gedir) Qərb regionuna üz tutaq.

Artıq özünü regionun təhsil rəisi elan edən Anar Qədiməliyev bu gün ilk öncə Orxan Abbasova, daha sonra təhsil naziri Emin Əmrullayevə güvənir, nəticə etibarı ilə güvəndə olması da göz qabağındadır.
Əks-təqdirdə bu gün Gəncə və Samux təhsil idarələrindən  əldə olunan faktlardan aydın olur ki, tək Gəncənin təhsil idarəsini deyil, həm də Samux təhsil şöbəsini idarə edən və ya daha dəqiq desək, Samux təhsil şöbəsinin müdir əvəzi olan Nurlana Həsənovanın məsləhət yeri  olan və regionda “təhsilin mafiya babası” hesab olunan Anar Qədiməliyev paytaxtdakı himayədarlarının sayəsində bu gün təhsildə at oynada bilməzdi. Təbii ki, Anar Qədiməliyevin bir müddət öncə Orxan Abbasov və Emin Əmrullayevlə birgə çalışması, iş yoldaşı olması baxımından.

Düşünə bilirsinizmi, bu gün təhsildən səriştəli kadrlar uzaqlaşdırılır, təhsil sahəsindən xəbərsiz, ali təhsil alarkən pedaqoqika, psixologiya fənnlərindən tədris almayan kənd təsərrüfatı və ya digər mütəxəssislərlə əvəz edilir. Bu gün xalqı gələcəkdə təmsil edəcək , əvəzləyəcək nəsli nə gözləyir? Bu gün kadr islahatında bu siyasəti yürüdənlərin fikri cəmiyyət üçün hələ də müəmma olaraq qalır.

Yeri gəlmişkən, bu yaxınlarda mətbuatda diqqətçəkən bir yazıda Anar Qədiməliyevin Soros təşkilatının əli ilə təhsil alması, Sorosun Gəncədə fəaliyyət göstərən təşkilatı ilə bağlılığı vurğulanırdı.
Soros haqqında kifayət qədər olmasa da bəzi məlumatları incələsək, Sorosun bir çox ölkələrdə “siyasi fəaliyyət” göstərməsi və siyasi maraq güddüyü çoxlarına bəlli olduğundan konkret qənaətinə gələ bilərik. O ölkələrdə ki, Sorosun adı var, orada siyasi marağın və qalmaqalın olması aksioma kimi qəbul edilir.

Bir məqama diqqət yetirək. Soros təşkilatları, eləcə də Fətullah Gülən Azərbaycana xeyriyəçi çətiri altında gəldilər. Gənc nəsil üçün xüsusi tədris kursları açdılar və sonu da məlum.
Soros bir çox ölkələrdə  öz filantrop ideyalarını öz vəsaiti ilə reallaşdırır. Sadə bir sual: inkişaf etməkdə olan ölkələrə öz vəsaitinin xərclənməsi missiyası onun alicənablığıdır, ya misssiyanın arxasında məkr var? Əlbəttə məkr. Məhz belə olduğu üçün onun yardımından yararlanan daha fərqli, daha qabiliyyətli, daha mükəmməl şagirdlərin əksəriyyəti sonucda ölkədən kənara getdi. Bununla  ölkənin gələcək kadr potensialı azaldı. Bu, təbii ki, bir ayrı mövzudur...

...İndi isə qayıdaq A. Qədiməliyevin özünəməxsus qurub-quraşdırdığı regional idarəyə, bu quraşdırmada  məktəblərin üzləşdiyi problemlər və onların  çözüm yollarına.

Bu gün regionda, əsasən də Gəncə və Samux təhsil müəssisələrində bir gərginlik, çaxnaşma nəzərə çarpır. Elə təəssürat yaranır ki, “artıq yuxarılar idarəetməni itirib, aşağılar isə belə gərginlik rejimində işə davam edə bilmir”. Gəncə və Samux təhsil idarə müdirlərinin işindəki “innovasiyalar”, əsas iş prinsipi isə yalnız ondan ibarətdir ki, “görək harda boş yer var, ora kimi otuzdura bilərik”.

Müəllimlərin işə qəbulu MİQ-dən keçdiyindən göz əsasən dikilib məktəb direktorluğu vəzifəsinə. Bu, əlbəttə samballı iş sayılır. Daha sonra təhsil idarəsi müdiri üçün direktor müavini, sonra laborant, daha sonra kitabxanaçı, lap bəd ayaqda fəhlə ştatı da işə və cibə yarayır. Müddətli müqavilələr də var.
Üstəlik də nazirlikdə arxa-dayaq olandan sonra kim nəkarədir sənə nə deyə? Və proses beləcə davam edir, ta ki, qarşısına özünə güvənən direktor  və ya məmur çıxana qədər.
Çəkişmə, qara-qışqırıq-falan, sonda sözə baxmayana şər-böhtan xarakterli yoxlamalar, pandemeya davam etdiyi bir dövrdə əlalxüsus davamiyyət yoxlamaları, məcburi dərsə davamiyyət hədələri və sonda bir neçə müəllimin və ya şagirdin sağlamığında şübhə doğuran məqamı nəzərəalmadan tədrisə davam və lap sonda məktəbin karantinə qapanmasına gətirib çıxaran məqamlar.
Bu gərginliklərin yaranması və yaradılması regionda və ya təhsil nazirliyində kimi, kimlərisə narahat etmir və ya kimsə problemin yaranmasının kökünü arayıb araşdırmır. Kimin nəyinə gərək?  
Bunu edənlərin  isə fikrində yalnız bircə şey - yeni iş yeri acılması üçün töhmət və kiminsə işdən azad olması durur. Sözə baxmayan işçinin isə yerli rəhbərin əli ilə nazir səviyyəsində cəzalandırılması və vəzifədən, işdən azad olunması sirr deyil.

Elə bu gün Gəncə və Samux təhsil müəssisələrində idarəetmə itdiyindən təhsil işçiləri necə, hansı qanunlarla idarə olunduqlarını anlamaqda çətinlik çəkirlər. Yeri gəlmişkən, Təhsil naziri Emin Əmrullayevin nəzərinə çatdırmağı bir daha özümüzə borc bilirik: 
Cənab nazir, Samuxda şagirdlərin bilik və bacarıqlarını qiymətləndirmək üçün nəzərdə tutulan, dövlət sənədi olan sinif jurnallarını məktəblərdə təhsil şöbəsinin müdiri Nurlana Həsənovanın hazırda komendaturada olan qardaşı Ramun Həsənov yoxlayır. O qardaşı ki, şəxsi avtomobili ilə Gəncə şəhər 20 saylı tam orta məktəbin müəlliməsini vurub öldürdüyündən məktəbdə yox, komendaturada olmalıdır. 
Emin müəllim, ictimaiyyət hələ də  sizin bu məsələyə münasibətinizi gözləyir. Bir də... maraqlıdır, Orxan Abbasov bu məsələ ilə bağlı sizi məlumatlandırıbmı? İnanmırıq. 
Ona görə ki,  Samux Rayon İcra hakimiyyəti başçısının əmri ilə müvəqqəti olaraq bir illik  Samux təhsil şöbəsinə  müvəqqəti olaraq təyinat alan müdir Nurlana Həsənova ayrı-ayrı məktəblərdə direktorları hədələmək üçün birbaşa Orxan Abbasov və ya Eşqi Bağırova telefon açır.  Biz də məhz buna görə “inanmırıq” dedik.

Daha bir maraqlı nüans: Artıq uzun illərdir ki, nomenklaturaya görə təhsil idarələrinə müdiri təhsil nazirliyi deyil, yerli icra hakimiyyəti təyin edir. Demək belə çıxır ki, təhsil nazirliyinin səlahiyyəti ancaq sıravi müəllimlərə çatır. Fikirləşə bilirsinizmi, icra hakimiyyətinin əmri ilə təyin olunan təhsil idarəsinin müdirinin özbaşınalıqlarını ilk öncə kim görə bilir və münasibət bildirmir? Təbii ki, şəhər və ya rayon icra başçıları.

Ümumiyyətlə  yuxarıdakı fikirlərin məntiqi davamı olaraq deyə bilərik ki, hələ indiyə qədər Gəncənin təhsil idarəsində belə xaos yaşanmayıb, əsasən də direktor təyinatı üzrə. Belə də olmalıydı. Çünki, necə deyərlər, dolanışıq dalınca gələn pedaqoji sahədə yetərincə praktikaya malik olmayan (Anar Qədiməliyev Gəncə şəhər təhsil idarəsinə müdir təyin olunana qədər ümumtəhsil sahəsində, yəni orta məktəbdə hər hansı bir vəzifədə çalışmayıb-red)  Anar Qədiməliyevin bu gün regionda  təhsil sahəsində hər hansı bir  kadrı pedaqoji kriteriyalarına görə yox, şəxsi marağına görə seçməsi açıq-aydın sezilir. Bu isə təbii ki, bəri başdan deyə bilərik, təhsilin tənəzzülü deməkdir. 

Məsələn, onun işə başlar-başlamaz təyin etdiyi direktorlardan biri də uşaqlıq dostu Elnur Qasımovdur. Hazırda 8 saylı tam orta məktəbə  Anar Qədiməliyevin sifarişi ilə təyin olunan Elnur Qasımov bir müddət öncə, yəni bir neçə il əvvəl işində buraxdığı ciddi nöqsanlara, o zaman əsasən də şəhər ictimaiyyətinin və eləcə də sakinlərin  xatirində olan məlum problemlər yaşandığına görə şəhər icra hakimiyyətinin başçına edilən çoxsaylı şikayətlərdən sonra işdən azad olunmuşdu.
Anar Qədiməliyevin təhsil idarəsinə müdir təyin olunmasından sonra, yəni gələr-qəlməz  ilk işi onu, yəni uşaqlıq dostu olan Elnur Qasımovu  təkrar, yenidən  direktor kürsüsünə oturtması oldu. Çünki... Anar Qədiməliyevin gələndən  dediyi və doğrudan da Gəncəbasarda baş verənlərdən göründüyü kimi, əli təhsil nazirliyində-yuxarıda oturanların ətəyində olmasıdır. Əks halda, bu günə qədər məlumatımız olan qədər təhsildən şikayətlər təhsil nazirliyində  ört-basdır oluna bilərdimi? 

Daha bir maraqlı məqam: necə ola bilər ki, əyalətdən gələn külli şikayətləri Orxan Abbasov və ya kadrlar məsələrinə cavabdeh olan Eşqi Bağırov təhsil naziri Emin Əmrullayevdən gizlədib ört-basdır eləsin... Ola bilsin...

Haşiyə: Sizə  və aidiyyatı qurumlara bir nüansı da yazım. Təhsil naziri Emin Əmrullayev mütəmadi olaraq Facebookda vətəndaşlarla onlayn görüşlər keçirən zaman istənilən şəxsin həmin görüşə bağlana bilməsinin qarşısı alınmasa idi, bəlkə də yerlərdəki problemlərdən bu minvalla xəbərdar olardı.
Əfsuslar olsun ki, onun da qarşısı məharətlə alınır, yəni təhsil naziri ilə istənilən vətandaş canlı bağlantıya qoşula bilmir, qoşulanlar isə nazirlik və yerlərdə təhsil idarələrinin istədikləri vətəndaşlar olur. Bu nüansı şəxsən  yoxlamışam.

...Samux Rayon Təhsil şöbəsinə gəlincə, bu barədə bir az əvvəl bəhs etdik, Samux təhsil şöbəsində vəziyyət heç də Gəncədən fərqli deyil. 
Əldə etdiyimiz digər bir məlumatda deyilir ki, təhsil şöbəsindən rayondakı  məktəb direktorlarına təzyiq edilir və göstərilən təpkinin səbəbi isə bir neçə məktəbdə direktor kürsülərinin boşaldılmasıdır.
Hələlik bu müstəvidə qızğın mübarizə getsə də, təhsil şöbəsinin bu istiqamətdə apardığı bir neçə variant sınaqdan keçirilsə də, hələlik səylər boşa çıxmaqdadır.
Hazırda Samux Rayon Təhsil şöbəsində direktorlara qarşı düzənlənən təpkilərin boşa çıxdığını anlayan idarə rəhbərliyi diqqəti orta məktəblərdə çalışan texniki işçilərin üzərinə yönəldib. Səbəb isə.... həmişə olduğu kimi piştaxtaya ştat çıxarmaqdır.
(ardı var)

Mehriban Əzizqızı,
Globall.az
Bakı -Gəncə