ADAU-da SEMESTR İMTAHANLARI ZAMANI SERVERİN ÇÖKMƏSİ TƏSADÜFDÜRMÜ?
Bir neçə gün öncə dövri mətbuatda Gəncədə yerləşən Azərbaycan Dövlət Aqrar Universitetində (ADAU) kompüter sisteminin (serverin) çökməsi xəbəri yayılmışdı. Yəni qış imtahan sessiyasının sonunda keçirilən test imtahanları zamanı serverdə texniki nasazlıq yaranıb və imtahanlar bir neçə gün sonraya keçirilib.
Həm də söhbət qış imtahan sessiyasında test imtahanlarının aparılması üçün nəzərdə tutulan tək o sistemdən getmir.
Globall.az-a daxil olan məlumatda bildirilir ki, test imtahan mərkəzinin serveri Ruslan Tahirov tərəfindən müdaxilə edildiyinə görə yararsız hala düşmüşdür və imtahanların gedişatı iki-üç gün dayanmışdır. İnformasiyasının qəbulu, emalı və ötürülməsi üçün nəzərdə tutulan mərkəz- server təmir olunduqdan sonra imtahanların aparılması təkrar öz axarına düşmüşdür.
Yeri gəlmişkən xatırladaq ki, (ADAU-da çalışanlar bunu bilir-müəllif) bir neçə il öncə test imtahanları zamanı Səbuhi Məmmədov və onun yardımçısı Tələt işdən uzaqlaşdırılan zaman da belə bir hal yaşanıb. Server sonradan bərpa olunub.
Bu dəfə də imtahan zamanı server çöküb və bunu Universitetin İnformasiya texnologiyaları və Elektron qeydiyyat şöbəsinin müdiri Ruslan Tahirovla əlaqələndirirlər. Yəni bunu onun bilərəkdən etdiyi deyilir. Ehtimalımızı gücləndirən isə bircə sualdır: Niyə məhz imtahan zamanı?..
Bu şöbənin işinin nədən ibarət olmasını incələdikdə aydın olur ki, əgər server dayanır və imtahanların aparılmasına ara verilirsə, məsuliyyəti məhz bu şöbə daşıyır (İnformasiya texnologiyaları və Elektron qeydiyyat şöbəsi- ADAU-da vahid kompüter şəbəkəsinin, internet səhifəsinin təkmilləşdirilməsi, keyfiyyəti, sürətli və fasiləsiz internet bağlantısının təmin edilməsi işlərini təşkil edir, müasir standartlara uyğun informasiya sistemlərinin yaradılması, tətbiqi və inkişafı sahəsində işləri həyata keçirir, universitet üzrə informasiya sistemlərinin qurulmasını, etibarlı və davamlı fəaliyyətini, təhlükəsizliyini, işlək vəziyyətdə saxlanılmasını, dövri yenilənməsini, kompüter, server və şəbəkə avadanlığının əməliyyat sistemlərinin quraşdırılması, konfiqurasiya edilməsi və işlək vəziyyətdə saxlanmasını təmin edir, bu sahədə nəzarəti həyata keçirir, qanunvericilik aktlarında və təşkilati-sərəncam sənədlərində nəzərdə tutulmuş digər vəzifələri yerinə yetirir).
Bu gün isə əsas problem ADAU-da serverin müvəqqəti, universitetdən aldığımız məlumata görə, bir gün dayanması deyil, həm də bütövlükdə elektron idarəetmə sisteminin çökməsidir.
Bir sıra KİV-də öz ünvanına özünə xeyirli xəbərlər dərc etdirib reklam olunan ADAU-da tələbələrin əksər çoxluğu qış imtahan sessiyasında imtahanlarda hələlik müvəffəqiyyət əldə edə bilməyiblər. Yəni loru dildə desək, tələbələrin əksər çoxluğu bu günə qədər olan imtahanlardan kəsilib.
Bəs bu nə ilə əlaqədar ola bilər? Və yaxud əvvəlki illərdə belə hallar yaşanmayıbsa, indi nəyə görə bu hal yaşanır? Ötən illərdə, hətta pandemeya zamanı dərslərin, daha sonra isə imtahanların onlayn keçirilməsi zamanı belə bilik səviyyəsi aşağı olmadığı halda, indi tələbələrin əyani dərs prosesində iştirak etməsinə baxmayaraq kəsilənlərin sayı nədən çoxluq təşkil edir? Yozumlu cavablar doğuran suallardır, deyilmi?
Bəli, bunun bir neçə səbəbi ola bilər. Əvvəla onu da qeyd edək ki, ADAU-da imtahan üç formada - test, yazılı, şifahi keçirilir. Tələbələr təbii ki, test formasını seçir.
Nədəni odur ki, testə yarım ildə keçirilən hər hansı fənn üzrə müəllim 50 sual qoyur, bu sual-cavab tələbənin əlində olur və imtahan zamanı tələbənin qiymətləndirməsinə o qədər də əngəl törətmir.
Digər hallarda isə, yəni yazılı formada qoyulan sualların cavabını tələbə öz dəsti-xətti ilə-yazılı cavablandırır. Qiymətləndirmədən razı qalmayan tələbə apelyasiya şurasına müraciət etdikdə isə yalnız onun əlyazması tələbənin bilik səviyyəsini ortaya qoyur və eyni zamanda tələbənin yazılı cavabı, eləcə də tədris olunan fənnin keyfiyyətinin hansı səviyyədə olduğunu nümayiş etdirir.
Şifahi keçirilən imtahanda isə tələbə kamera qarşısına keçir.
Test imtahanında bu hallar demək olar ki yaşanmır. Serverin yaddaşında olan cavablar ya qənaətbaxş olur, ya da…
Nöqtələrin yerinə yazılmalı sözləri isə, əziz oxucu, sizlərin düşüncəsinə buraxırıq.
Xatırladım ki, yuxarıda səthi də olsa qeyd etdiyimiz kimi, bir neçə il öncə də ADAU-nun test imtahan sistemində artıq belə hal yaşanıb. Elə bu səbəbdən hələ sabiq rektor Mirdamət Sadıqovun zamanında bir deyil, bir neçə vəzifə icra edən Səbuhi Məmmədov imtahan komissiyasından uzaqlaşdırıldı .
…Bu gün ADAU-da tələbələrin imtahanlarda kütləvi şəkildə qeyri-məqbul qiymətləndirilməsi nəticə etibarı ilə tədris prosesinin keyfiyyətinin aşağı olmasından xəbər verir. Tədrisin keyfiyyətinin aşağı düşməsinə səbəb isə bizim fikrimizcə, kadr siyasətinin ADAU-da düzgün aparılmaması, idarəçilikdə olan şəxslərin dövlət tərəfindən təhsil sahəsində qarşıya qoyulmuş tələblərin öhdəsindən gələ bilməməsi də ola bilir.
Bununla bağlı daha ətraflı və dəqiq məlumatı isə imtahan prosesinin sonuna qədər aparacağımız araşdırma zamanı üzə çıxaracağımızı düşünürük. Odur ki, növbəti saylarımızı izləyin.
Mehriban Əzizqızı,
Globall.az