Xəbər verdiyimiz kimi, ötən gün Azərbaycan Milli Məclisinin plenar iclasında “Azərbaycan Respublikası ilə Türkiyə Respublikası arasında müttəfiqlik münasibətləri haqqında” Şuşa Bəyannaməsinin təsdiq edilməsi barədə” qanun layihəsi müzakirəyə çıxarılıb. Müzakirələrdən sonra qanun layihəsi səsə qoyularaq bir oxunuşda qəbul edilib.

 Beləliklə, Milli Məclis “Azərbaycan Respublikası ilə Türkiyə Respublikası arasında müttəfiqlik münasibətləri haqqında” 2021-ci il iyunun 15-də Şuşa şəhərində imzalanmış Şuşa Bəyannaməsini təsdiqləyib. Eyni zamanda Türkiyə Böyük Millət Məclisi (TBMM) də Şuşa Bəyannaməsini təsdiq edəcək. 

 “Azərbaycanla Türkiyə arasında müttəfiqlik münasibətləri haqqında Şuşa Bəyannaməsinin təsdiq edilməsi barədə” qanun layihəsi qardaş ölkənin parlamentinə daxil olub. TBMM sədri Mustafa Şentopun imzası ilə parlamentə təqdim olunan qanun layihəsi təklifinin işlənilməsi Xarici İşlər Komissiyasına həvalə edilib. 
 
TBMM-nin Xarici İşlər Komissiyası qanun layihəsi təklifini fevralın 3-də müzakirəyə çıxaracaq. Bəyannamənin daha sonra plenar iclasa çıxarılması planlaşdırılır.
Globall.az xəbər verir ki, Şuşa bəyannaməsinin tarixi əhəmiyyəti barədə Modern.az-a danışan Türkiyənin ehtiyatda olan ordu generalı Ərdoğan Karakuş bildirib ki, Türkiyə hər zaman qardaş Azərbaycanın yanında olduğu kimi, bundan sonra öz dəstəyini davam etdirəcək.
 
"Türkiyə olaraq bizim Azərbaycana verdiyimiz söz budur ki, onun qəbul etdiyi hər şey bizim üçün keçərlidir" - deyən generalın sözlərinə görə, Şuşa bəyannaməsinin ratifikasiya edilməsi Zəngəzur dəhlizinin açılması prosesini sürətləndirəcək:

“Biz Ermənistana qarşı atdığımız addımları Azərbaycan ilə birgə razılaşdırmışdıq. Bizim parlementdə Şuşa Bəyannaməsinin qəbul ediləcəyindən şübhə yoxdur. Bu bəyannamə Ankara razılaşmasını dolayı yolla özündə əks etdirir. Anlaşmada qeyd olunan Gürcüstan, Türkiyə, Azərbaycan və Ermənistan sərhədlərinin müəyyən olunmasında Qarabağın Azərbaycanın tarixi ərazisi olması bir daha təsdiqlənir. Bununla yanaşı bəyannamənin təsdiqlənməsi Zəngəzur dəhlizinin açılmasını daha da sürətləndirəcək. Bundan əlavə, Naxçıvan və Azərbaycanın rayonları arasında yolların açılması prosesi sürətlənəcək. Əlbəttə, Ermənistan da bundan istifadə edəcək. Bilirik ki, Türkiyə və Ermənistan arasında hava yolları açılır. Bununla da bölgədə sülh özünü göstərəcək. Burada Azərbaycanın vəzifəsi böyükdür. Yollar açıldıqdan sonra Türk dövlətləri ilə əlaqələrimiz daha da artacaq. Ermənistanın burada qazancı olduğu üçün münaqişə yaratmayacağına ümid edirik”. 
 
General, həmçinin bildirib ki, Şuşa bəyannaməsi iki ölkə üçün böyük məna kəsb edir. Onun sözlərlərinə görə, bəyannamənin hər iki ölkənin parlamenti tərəfindən təsdiqlənməsi Türkiyə və Azərbaycan arasında münasibətləri, dostluğu və qardaşlığı daha da dərinləşdirəcək:
 
“Türkiyənin davamlı Azərbaycanın yanında olacağını bir daha təsdiq edir. İki ölkə hərbi, siyasi və demək olar ki, hər sahədə bir-birini dəstəkləyəcək. İki ölkənin bir-birini qoruması hərbi sahədə birlikdə hərəkət etməsi deməkdir. Bu səbəbdən artıq xalqlarımız rahat ola bilərlər. Digər mənada burada məqsəd heç bir şəkildə başqa ölkələrə ziyan vurmaq deyil. İki ölkəyə təhdid olarsa, bir-birlərini müdafiə etmək üçün dəstək olması lazımdır”.