Qərb Ukraynaya hərbi yardım göstərməyə başladı. Hətta əvvəllər bundan qəti şəkildə imtina edən Almaniya da artıq silah tədarük edir. “Böyük Yeddilik” (G7) ölkələri Ukraynaya əlavə silahların tədarükü ilə bağlı razılığa gəliblər. Müxtəlif Avropa dövlətləri hətta təyyarələr də göndərəcəyini vəd edir.

Ümumilikdə Qərbin yardımı olsa da, amma bu, uzun illər Ukraynada gözlənilən və danışılan yardım deyil. Heç kim öz silahlı qüvvələrini göndərmədi, yenidən bəyanatlar verildi ki, Ukraynanın Aİ və NATO-ya qəbulu məsələsi gündəm deyil.
Hətta Rusiyaya qarşı tətbiq edilən sanksiyalar da artıq yumşaldılmağa başlayıb. Belə ki, ABŞ enerji resurslarının tədarükü ilə bağlı bəzi transaksiyaları anti-Rusiya sanksiyalarından çıxarmağa hazırlaşır.

Hazırda Ukraynada nə baş verir və Kiyevin müttəfiqi olan Qərb niyə maksimum dəstək göstərmədi?
Globall.az xəbər verir ki, Ukraynalı polittexnoloq, Situasiyanın Modelləşdirilməsi Agentliyinin direktor müavini Aleksey Qolobutski Oxu.az-ın suallarını cavablandırarkən qeyd edib ki, hazırda ölkədə mövqe döyüşləri gedir, müqavimət var:

- İnsanlar növbəyə durur, ərazi müdafiə strukturlarına yazılır və ordumuzun yanında döyüşməyə hazırdır.
Müttəfiqlərə gəlincə, heç kim bizim əvəzimizə döyüşəcəyini vəd etməyib. Biz böyük, qırx milyonluq ölkəyik. Ölkəmizi özümüz qorumalıyıq. Amma silahla, pulla, Rusiya Federasiyasına qarşı sanksiyalarla bizə ciddi kömək edilir.

- Bə hər kəsi heyrətləndirən genişmiqyaslı müdaxiləni necə qiymətləndirirsiniz və proqnozlar necədir? Bir versiyaya görə, Ukrayna “Minsk-3”ə (ölkənin federallaşdırılmasını nəzərdə tutan yeni Minsk razılaşmalarına) məcbur edilir, digər versiyaya görə, onlar Ukraynanı qonşu ölkələr - Polşa, Rusiya və başqaları arasında bölməyə çalışırlar.

- Aydın məsələdir ki, bu müharibə hamını təəccübləndirdi. Belə bir ehtimalı heç vaxt istisna etməsəm də, bunun daha çox şərqdə baş verəcəyini, tanınmamış “LDNR” Donetsk və Luqansk vilayətlərinin sərhədlərinə çatmağa cəhd edə biləcəyini düşünürdüm. Orada isə döyüşə hazır qoşunlarımız var.

Proqnozlara gəlincə hər şey ordumuzun dayanıqlığından, dözümlülüyündən asılıdır. Mən belə başa düşürəm ki, Rusiya prezidenti hər şeyi demək olar ki, ilk gündə və minimal itkilərlə həll etmək istəyirdi. Rusiya təbliğatı yalnız öz ölkəsi üçün işləyir, baxmayaraq ki, bir çox ruslar, artıq onlara deyilənlərə inanmırlar.

İndi Ukrayna üçün neytral statusun zəruriliyindən danışılır. Bəli, bu, heç olmasa baş verənləri dayandırmaq üçün danışıqlar prosesinə girmək cəhdi idi.

Ukraynanın bölünməsi ilə bağlı versiya isə cəfəngiyyatdır. Polşa Avropa dövlətidir, polyaklar Avropa xalqıdır. Onların buna (Ukraynanın bir hissəsinə qoşulması – red.) ehtiyacı yoxdur. Rusiyadan başqa, müasir dünyada heç kim belə kateqoriyalarda düşünmür. Polşanın keçmiş ərazilərini geri aldığını təsəvvür etsək belə, infrastruktura on milyardlarla dollar sərmayə qoymalı olacaq. Mən hələ beynəlxalq hüququn pozulmasını demirəm.

Ona görə bir daha deyirəm, heç bir bölgüdən söhbət gedə bilməz. Ancaq Ukraynanın Rusiya tərəfindən tam və ya qismən işğalı cəhdindən danışmaq olar. Rusiya təbii ki, zəngin ölkədir, amma o qədər də deyil. İşğal - nəhəng bir ölkənin işğal olunmuş torpaqlarının saxlanmasıdır. Bunu təsəvvür etmək çətindir.

Prinsipcə, tələblərin təxmini siyahısını bilirik. Ukraynanın neytral statusu, Krımdan imtina və “LDNR”nin tanınması. Kobud desək, Ukraynada “idarə olunan suverenlik” rejimini tətbiq etmək istəyirlər. Amma Ukrayna rəhbərliyi bütün bu şərtlərlə razılaşarsa, bizdə inqilab olacaq, ukraynayönlü, vətənpərvər qüvvələr hakimiyyətə gələcək.

Problem ondadır ki, Vladimir Putinin heç bir aydın proqramı yoxdur. Emosional taktiki hərəkətlər vəziyyəti dalana doğru itələyir.

- Amma Ukrayna artıq əvvəlki kimi olmayacaq…

- Nəinki Ukrayna, biz heç birimiz əvvəlki kimi olmayacağıq. Amma biz millət olaraq böyüyürük. Bir çox ölkələrdə müstəqillik mübarizəsi müharibələrdən keçdi. Biz isə hər zaman fəxr etmişik ki, müstəqilliyə qan tökülmədən nail olmuşuq.

Məlum oldu ki, müharibə bizi gözləyirmiş. 30 il əvvəl şans əldə etdik, dövlət yaratdıq. O, inkişaf etmədi və tarix bunu bir daha sübut etdi. Əgər sizin güclü dövlətçilik institutlarınız yoxdursa, o zaman qonşu dövlətlər sizə bəzi hesablar təqdim edə bilər. Ölkəmizdə əsl müstəqillik uğrunda mübarizə 30 il uzandı.

Söhbətimizə yekun olaraq deyim ki, Qərbin Ukraynaya yardımı ilə bağlı heç bir illüziyam yox idi. Amma çoxları belə düşünürdü. İndi ayıldıq, hər şeyi başa düşdük. Bizim vəzifəmiz isə müstəqilliyimizi qorumaqdır.