Putin-Paşinyan görüşündə diqqətçəkən MƏQAMLAR
Ötən gün Ermənistanın Baş naziri Nikol Paşinyan və Rusiya Prezidenti Vladimir Putin arasında görüş olub. Moskvada keçirilən görüşdə bir sıra məsələlər, eləcə də Azərbaycan, Rusiya və Ermənistan liderləri arasında imzalanmış üçtərəfli bəyanatın müddəalarının icrası müzakirə olunub.
"Onlar Azərbaycan, Ermənistan və Rusiya liderlərinin müntəzəm görüşləri çərçivəsində konstruktiv işin davam etdirilməsinin və üç liderin noyabrın 10-da imzaladığı razılaşmaların ardıcıl şəkildə həyata keçirilməsinin tərəfdarı olduqlarını bildiriblər”, - dövlət başçılarının görüşündən sonra verilən bəyanatda qeyd olunub.
Paşinyanın Moskva səfərini nəticəsi nə oldu? Putinlə görüşdə Ermənistan tərəfi hansı hədəfləri ortaya qoymuşdu?
Bu barədə Modern.az-a danışan politoloq İlqar Vəlizadə bildirib ki, Paşinyan-Putin görüşü regionda gedən proseslər üçün mühüm əhəmiyyət daşıyır. Onun sözlərinə görə, Paşinyan onsuz da müstəqil hərəkət etmir və etmək niyyətində deyil:
“Biz aydın görürük ki, hər hansı ciddi siyasi addım ərəfəsində Ermənistan iqtidarı öz ənənəsindən əl çəkmir, çünki bu ənənələr 10 illərlə formalaşıb. Yəni ənənə ondan ibarətdir ki, bütün hallarda Ermənistanın son qərarı Moskvada qəbul olunur. Bu səfər ondan xəbər verir ki, bəli, son nəticə etibarı ilə Moskvada Ermənistanın mövqeyi müəyyənləşdirilir. Biz dəfələrlə deyirdik ki, Qarabağ münaqişəsinin açarı Moskvadadır. İndi münaqişə yoxdur, ancaq Moskva yenə də öz funksiyasını əlində saxlamaqdadır”.
Politoloq bildirib ki, dünənki görüşdə diqqətçəkən məqam üçtərəfli bəyanatın müzakirəsi oldu: “Bəyanatda müəyyən müddəalar öz əskini tapıb. Narahatedici faktor ondan ibarətdir ki, yenə Dağlıq Qarabağ və Minsk qrupu ifadələri var. Nəinki var, onlar həmçinin müəyyən siyasi çalarlara bürünüb. Məsələn, Minsk qrupunun həmsədrliyi çərçivəsində danışıqların aparılması labüd bilinir. Eyni zamanda maraqlısı ondan ibarətdir ki, Rusiya özü etiraf edir ki, Minsk qrupundakı Qərb həmkarları ilə danışıqlar aparması mümkün deyil. Çünki onlar bundan imtina edirlər. Belə vəziyətdə Minsk qrupunun dirçəldilməsi nə qədər məqsədəuyğundur? Digər narahatedici məqam "Dağlıq Qarabağ əhalisinin təhlükəsizliyi" ifadəsinin işlənməsidir. Qarabağ əhalisinin təhlükəsizliyi məsələsinin düşünürəm ki, Ermənistanla əlaqəsi yoxdur. Rusiya sülhməramlıları oradadır və öz müvəqqəti missiyalarını yerinə yetirirlər. Amma bu məsələ Azərbaycan tərəfi ilə həll olunmalıdır. Çünki bura Azərbaycan ərazisidir. Əhalinin yaşadığı ərazi Azərbaycana məxsusdur. Rusiya təhlükəsizliklə bağlı məsələləri Azərbaycanla müəyyənləşdirilməlidir”.
“Belə ifadələrin olması bir qədər narahatlıq doğurur. Amma digər tərəfdən müsbət hal ondan ibarətdir ki, münaqişə termini istifadə olunmayıb. Hətta bu ikitərəfli danışıqlarda da münaqişə termini istifadə edilməyib. Artıq Ermənistan tərəfi başa düşür ki, həll olunmayan məsələlər var, ancaq münaqişə yoxdur. Digər tərəfdən iqtisadi əlaqələrlə bağlı ortada müsbət məqamlar var. Əlavə olaraq Moskva tərəfindən Türkiyə-Ermənistan dialoqunun dəstəklənməsi də müsbət haldır”,- deyə İ. Vəlizadə prosesləri şərh edib.