Azərbaycan ərazi bütövlüyünü bərpa edəndən sonra da postmünaqişə dövründə də xalqın milli maraqlarına uyğun olaraq Prezident İlham Əliyev məqsədyönlü siyasət yürüdərək, meydanında əldə etdiyimiz tarixi qələbəni diplomatik müstəvidə də davam etdirməyin öhdəsindən yüksək səviyyədə gəlir.

Bunu dünən (aprelin 28-də) Şuşada işinə başlayan və bu gün Bakıda davam edən "Cənubi Qafqaz: İnkişaf və Əməkdaşlıq" adlı Beynəlxalq Forumu bir daha əyanə şəkildə nümayiş etdirir. Əvvəlcədən məlum idi ki, müharibədən sonra Azərbaycan regionda yaratdığı yeni reallığı dünya ictimaiyyətinə, beynəlxalq təşkilatlara qəbul etdirmək üçün ən azı 44 günlük müharibə qədər informasiya savaşında da vəziyyətdən mümkün qədər çox xeyrinə yararlanmalıdır. 

Şuşada işinə başlayan və bu gün Bakıda davam edən beynəlxalq konfransın da əsl qayəsi bundan ibarətdir. Hələ bunun ideyası ötən il aprelin 13-də Prezident İlham Əliyevin iştirakı ilə ADA Universitetində keçirilən "Cənubi Qafqaza yeni baxış: münaqişədən sonra inkişaf və əməkdaşlıq" adlı beynəlxalq konfransda yaranmışdı.



Artıq biz görürük ki, rəsmi Bakı bu istiqamətdə çox önəmli həmlələr edir və hazırki geosiyasi reallığın fonunda bölgədə sülhdən yana olduğunu dünyanın dörd bir yanından Qarabağa səfər edən konfrans iştirakçılarına nümayiş etdirir. Azərbaycan artıq müharibədən qısa zaman keçməsinə baxmayaraq belə bir konfransın Şuşada keçirilməsini təmin etməklə dünyaya bir sıra çağırışlar etmiş olur, mesajlar verir. Rəsmi Bakı bu addımı ilk növbədə xarici diölomatlara, beyin mərkəzlərinə 30 illik işğal nəticəsində azad edilən ərazilərdəki vəhşilik nümunələrini təqdim etməklə Ermənistanın əsl simasını nümayiş etdirmək imkanı əldə etməklə yanaşı, Şuşanı BMT və digər nüfuzlu təşkilatların tədbirlərinin əsas ünvanına, bölgənin diplomatik paytaxtına çevrilməsi istiqamətində də çox əhəmiyyətli bir addım atmış olur. Bu fürsət eyni zamanda rəsmi Bakıya imkan verir ki, əzəli Azərbaycan şəhəri olan Şuşanın saxta məlumatlar əsasında uzun illər erməni şəhəri kimi tanıtdırılması çirkin kampaniyalarının sadəcə bir hissəsi imiş. 

Beynəlxalq ekspertlərin növbəti konfransının Laçında keçiriləcəyi ilə bağlı qərar da bir daha deməyə əsas verir ki, Azərbaycan informasiya savaşında da böyük üstünlüklə hədəflərinə hər gün bir az da yaxınlaşır. Bu qərar həm də ondan xəbər verir ki, Laçın dəhlizinə alternativ yolun çəkilişi də qısa zamanda başa çatacaq və hazırda rus sülhməramlılarının blok-postlar qurduğu, Xankəndi ilə Ermənistanı birləşdirən yeganə yol artıq qısa zamanda Azərbaycana təhvil veriləcək. Bu isə Ermənistanın kapitulyasiya aktında qeyd edildiyi kimi, Laçın şəhərinin də tamamilə Azərbaycanın nəzarətinə keçməsi ilə nəticələnəcək.



Bakı müharibədən ilyarım keçməsinə baxmayaraq bir çoxları üçün mümkünsüz görünən belə bir qısa zaman kəsiyində bu cür tədbirləri Qarabağda təşkil etməklə eyni zamanda müharibə vaxtı Azərbaycana qarşı haqsız mövqe tutan dövlətləri, dövlət başçılarını, beynəlxalq təşkilatları işğalı, işğalçını dəstəklədiklərini əyani göstərməklə onları fakt qarşısında qoyaraq, ermənipərəst mövqelərinə görə həmin dairələri qınamaq imkanı da əldə edir. Təbii ki, dövlət başçısı bunu yerli KİV-lərə müsahibələrində, bəyanatlarında da bəyan etdiyinin dəfələrlə şahidi olmuşuq.

Necə ki, bunu bu gün "Cənubi Qafqaz: İnkişaf və əməkdaşlıq" mövzusunda beynəlxalq konfransda çıxışı zamanı Prezident İlham Əliyev "Təəssüf ki, biz minaların təmizlənməsi prosesində hər hansı bir beynəlxalq təşkilatdan dəstək görməmişik", "Azad edilmiş ərazilərdə bütün işlər dövlət büdcəsi vəsaitləri hesabına görülür və bu ədalətli deyil" deməklə bir daha lazımı təşkilatlara öz narazılıq mesajını göndərmiş oldu. Təbii ki, bu cür qınaqların məhz daha əlverişli bir mühit hesab edilən bu cür beynəlxalq əhəmiyyəti yüksək olan konfranslarda səsləndirilməsi rəsmi Bakının təzyiqlərinin işə yarıması nöqteyi nəzərdən də olduqca önəmlidir. Bunu təsdiq edəcək növbəti fakt: Prezident bildirib ki, "Biz minnətdarıq ki, Avropa İttifaqı (Aİ) Ermənistana və Azərbaycana təqdim olunan maliyyə paketlərinin böyük uyğunsuzluğu ilə bağlı narahatlığımızı diqqətə aldı".



Yaxşı xatırlayırıq ki, Aİ Ermənistana 2 milyard yardım paketi ayıracağı təqdirdə, Bakıya veriləcək bu məbləğin yalnız 100 milyonun üzərində olduğunu elan etməsi Azərbaycan dövləti tərəfindən ciddi narazılıqla qarşılanmışdı və dövlət başçısı haqlı olaraq bir çox çıxışlarında Avropa İttifaqının bu qərarını ədalətsiz qərar adlandırmışdı. Çünki İlham Əliyev bunu əsaslandıraraq, 30 il işğala məruz qalan, şəhərləri, kəndləri, tarixi, mədəni, dini abidələri vandalizmin qurbanı olan, minaların qurbanı olan tərəfin məhz Azərbaycan olduğunu bildirirdi. Göründüyü kimi Aİ Azərbaycan liderinin bu haqlı iradından yayına bilmədi. 

Azərbaycan bununla eyni zamanda xarici investorlara Qarabağın işğaldan azad edilən ərazilərinə bərpa-quruculuq işlərində fəal iştirakı üçün bir qapı açır. Bu mühüm platforma xarici ekspertlərə post-münaqişə dövründə Cənubi Qafqaz ölkələri arasında əlaqələrin inkişafı, kommunikasiyaların açılması imkanlarının nəzərdən keçirilməsi, bölgənin tərəqqisinin, təhlükəsizliyinin və rifahının təməli kimi Azərbaycanın formalaşdırdığı Ermənistanla münasibətlərin normallaşdırılması üçün sülh gündəliyinin müzakirəsi üçün əlverişli imkan yaradır.



Azərbaycan sülh üçün bu imkanlardan bütün region dövlətlərinin yararlanmasında maraqlıdır, eyni zamanda Ermənistanın da. Necə ki, bunu bu gün Prezident İlham Əliyev "Cənubi Qafqaz: İnkişaf və əməkdaşlıq" mövzusunda beynəlxalq konfransda bir daha bəyan etdi: "Ermənistanla da yaxşı münasibətlər qurmağa ümid edirik". Bəli, Bakı nəinki Cənubi Qafqazda, bütün dünyada sülhün tərəfdarıdır. Bunu hətta hazırda da davam edən Rusiya-Ukrayna müharibəsinin bitməsi üçün Türkiyə ilə birgə atdığı addımlar da təsdiq edir. Lakin bu, o demək deyil ki, Azərbaycan ona qarşı növbəti işğal faktoru ilə qarşı-qarşıya qalacağı təqdirdə əlini yanına sallayıb, baxacaq. Bu gün Azərbaycan diplomatik müstəvidə pressinqini gücləbndirdiyi kimi, hərbi qüdrətini də artırır. Bu isə bizi gözləyə biləcək təhdidlərin, növbəti revanş istəklərinin qarşısını almaq məqsədilə edilir. Çünki Bakı anlayır ki, nə qədər iqtisadiyyatı, xarici və daxili diplomatiyası, eləcə də Ordusu güclü olarsa, o zaman hər kəs o dövlətlə hesablaşmaq məcburiyyətində qalacaq. 

Təhməz Əsədov