Hələ ötən tədris ilinin sona çatması ilə Bakıdakı şəhər məktəblərindən "Qaçqın məktəbləri"nə kütləvi şagird axını qeydə alınır. Bunu xüsusilə 9-11-ci siniflərdəki şagird sayının azalmasından da müşahidə etmək olar. Valideynlər övladlarının hazırlıqlara rahat gedə bilməsi üçün onların adlarını "qaçqın məktəbi"nə yazdırırlar. Bu minvalla şagird ayağını məktəb binasına qoymadan, dərslərdə iştirak etmədən attestat alır. Təbii ki, müəyyən "şirinlik" müqabilində. "Şirinlik"in məbləğ məktəbə və tapılan tanışa görə dəyişir. Hələ bir neçə il əvvəl 500 manat başa gələn sövdələşmənin qiyməti də, qlobal bahalaşma fonunda 1000-1500 manata qədər artırılıb. Məqsəd uşaqların repetitor yanına daha rahat getməsini təmin etməkdir. Birbaşa olmasa da, dolayısı ilə proses orta məktəblərin şagirdlərə təhsil vermədiyini sübut edir.

Məsələ ilə bağlı Modern.az-a açıqlama verən Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov deyilənləri təkzib edib. 

C.Valehov deyib ki, tələbələrin yerdəyişmə prosesi nazirlik tərəfindən izlənilir. 

“Əgər məcburi köçkün məktəblərinə kütləvi şagird axını olsaydı, bundan xəbərdar olardıq”, - deyə nazilik rəmisi bildirib. 

Milli Məclisin Elm və təhsil komitəsinin üzvü Etibar Əliyev isə rəsmilərin əksinə, reallığı təsdiqləyib. Deputat deyib ki, “qaçqın məktəbləri"nə olan kütləvi şagird axınından məlumatlıdır: "Bu haqda bizə də məlumat verilir. Valideynlər zəif həlqə axtarırlar ki, övladları məktəbə getməsin. Məktəb təhsili valideynləri qane etmir, övladlarının sərbəst hazırlaşması üçün repetitora müraciət edirlər. Uşaqların məktəbə getməməsi üçün də “qaçqın məktəbləri"nə üz tuturlar. “Qaçqın məktəbləri"nin direktoruna, müəllimlərinə üz tutub bu kimi hallara yol verməməyə çağırıram. Dərsdən yayınmaq məktəbə baş ucalığı gətirmir. Məktəb təhsilinin keyfiyyəti çox aşağıdır, amma repetitorluq, hazırlıq kursları təbliğ olunur. 10-15 il bundan öncə təhlil olunmalı idi ki, biz məktəbi hara aparırıq? Proqozlaşdırmalıydıq ki, repetitorluq xidməti bu qədər genişlənirsə, məktəblərin durumu necə olacaq". 

E.Əliyev bildirib ki, “Qaçqın məktəbi"nə üz tutanların sayı çox olduğundan sıxlıq da yetər qədərdir: “Məktəblər nəzarətdən kənarda qalıb. Çünki direktorlar tədrisin keyfiyyətinə, şagirdlərin qəbuluna diqqət yetirmirlər. Nəticədə də bu kütləvi axına görə sıxlıq yaranıb. Bu gün isə bir çox məktəblərin təbliğatı gedir. Xüsusi özəl məktəblərin, varlılar üçün olan məktəblərin açıq şəkildə təbliğatı aparılır, bu doğru addım deyil. Bunun özü bir sıra neqativ hallara gətirib çıxarır. Bütün cəmiyyət deyir ki, uşaqların məktəbə qəbulunda rüşvət mühüm faktor kimi ortaya çıxır. Məktəblərin eyniləşdirilməsi üçün Elm və Təhsil Nazirliyi çalışmalıdır”. 

Deputat ümumiyyətlə repetitorluğun təhsilin bəlasına çevirildiyini vurğulayıb: "İbtidai sinifdə təhsil alan uşaqları da repetitor yanına göndərirlər. Bu ibtdai təhsil nə qədər çətin proqramlar əsasında qurulur ki, burda repetitorlara ehtiyac qalsın. İbtidai təhsil təhsilin birinci, ən sadə formasıdır. Düzdür proqram çətindir, amma bu təhsilin sadə pilləsidir.  Valideynlərə təlqin edirlər ki, yox, bunu məktəbdə çatdırmaq olmur, mütləq övladınızı hazırlığa göndərməlisin. Bütün bunlara son qoyulmalıdır".