Azərbaycan xalqı, yer kürəsinin müxtəlif guşələrində yaşayan dünya azərbaycanlıları, Vətənimizin bütövlüyü uğrunda canlarından keçən şəhidlərimizin xatirəsini bu gün də dərin ehtiramla anırlar

   Hər kəs o haqda məlumata malikdir ki, 2020-ci ilin iyul ayında Azərbaycan-Ermənistan dövlət sərhədinin Tovuz rayonu istiqamətində başlayan və dörd gün ərzində davam edən erməni təxribatı, bir daha mənfur qonşumuzun hansı cılız simaya, hansı cılız hissiyata sahib olduğunu ortaya qoydu. Bəli, həmin günlərdə erməni silahlı qüvvələri Tovuzun sərhəd kəndlərində, ələlxüsus Ağdam və Əlibəyli kəndlərində, həmçinin digər yaşayış məntəqələrinə yaxın ərazilərdə müəyyən təxribatlara əl atmaqla, məhz uzun illərdən bəri qarşılarına qoyduqları məqsədlərinə nail olmaq istədilər. Amma, bu dəfə də alınmadı! Çünki, işğalçı ölkənin hər cür iyrənc addımlarına şanlı Azərbaycan ordusu lazımi səviyyədə cavab verdi və 2016-cı ilin aprel hadisələri zamanı işğalçı ordu birləşmələrinə verdikləri “ibrət dərsi”ni, məhz bir daha onlara “başa saldılar”. Unutmaq olmazdı ki, ötən illər ərzində Azərbaycanın Silahlı Qüvvələri kifayət qədər təkmilləşmişdi, döyüş ruhu birəbeş artmışdı, hər cür texniki avadanlıqlarla, silah növləri ilə təmin olunmuşdu, bir sözlə lazımi təminatları tam şəkildə ödənilmişdi. Belə bir səbəbdən də, ordumuzda ruh yüksəkliyi, döyüşkənlik əzmi ən yüksək səviyyədə idi. Faktdır ki, bütün bunların kökündə ölkə rəhbəri, Silahlı Qüvvələrin Ali Baş Komandanı möhtərəm İlham Əliyevin Azərbaycan Ordusuna göstərdiyi diqqət və qayğının varlığı başlıca rol oynadı. Yəni, onu qeyd etmək yerinə düşər ki, möhtərəm Prezidentimizin, bütövlükdə dövlətimizin ordumuza qarşı yanaşması, məhz əldə etdiyimiz uğurların əsasını qoymuş oldu.

     Faktdır ki, Azərbaycan Ordusunun 12-16 iyul günlərində əldə etdiyi parlaq qələbələr, həm erməni işğalçı ordusunu, həm də Ermənistanın hərbi-siyasi rəhbərliyini tam şəkildə çıxılmaz duruma saldı. Yəni, ötən illər ərzində riyakar mövqeyini ortaya qoyan, yerli ictimaiyyətlə bərabər, beynəlxalq ictimaiyyəti də aldatmağa çalışan işğalçı ölkənin baş naziri Nikol Paşinyan və onun siyasi komandası, həmin günlərdə yaşadıqları uğursuzluqları erməni xalqından gizlətməyə çalışsalar da, son anda onlar geniş xalq kütləsinin ciddi müqaviməti ilə üz-üzə qalmalı oldular. Çox keçmədi ki, xalq küçələrə axışıb etiraz səslərini ucaltdılar, Nikol Paşinyandan və onun komandasından baş verən ölüm faktlarının hesabatlarını tələb etdilər. Bu cür ciddi etiraz və müqavimətin qarşısında çıxılmaz duruma düşən Ermənistanın siyasi rəhbərliyi nə qədər “oyun” oynasa da, heç də düşdüyü vəziyyətdən çıxa bilmədi. Adicə dörd gün ərzində 100-dən çox canlı qüvvəsini itirən, xeyli sayda hərbi texnikası sıradan çıxan Ermənistanda olmazın qarşıdurma yaşandı. Belə bir halın varlığı onu söyləməyə əsas verdi ki, xalq riyakar ermənistan hakimiyyətini heç cür qəbul etmir və qəbul etmək istəyində də deyil. Yəni, işğalçı ölkədə etiraz aksiyaları başladı, fəallar sosial şəbəkələrdə  Nikol Paşinyan hakimiyyətini ciddi tənqid etdilər. Bir faktı da qeyd edək ki, bir çox tədbirlərdə özünü gülünc vəziyyətə salan, açıq-aşkar şəkildə savadsızlığını ortaya qoyan, ara-sıra sərsəm bəyanatlar verən Nikol Paşinyan və onun hərbi-siyasi komandası yerlərdə ironiya ilə qarşılandı və tam əksəriyyət onların yalanlarına heç cür uymadılar.

       Bütün bunlara baxmayaraq, işğalçı Ermənistanın Silahlı Qüvvələri yenə də qol qoyduqları təxribaxtlardan əl çəkmədilər və fürsət düşdükcə ölkəmizə qarşı hər cür çirkin əməllərə rəvac verdilər. Məsələn, 2020-ci ilin 27 sentyabrında baş verən hadisələr də, məhz işğalçı ölkənin törətdiyi növbəti təxribatlardan biri oldu.  Qeyd edək ki, həmin günün səhər saatlarında işğalçı ölkənin silahlı qüvvələri sərhədboyu ərazilərdə genişmiqyaslı təxribatlar törədib, cəbhə xəttində yerləşən Azərbaycan Ordusunun mövqelərini və yaşayış məntəqələrimizi iriçaplı silahlarlardan, minaatanlardan, müxtəlif çaplı artilleriya qurğularından intensiv atəşə tuturlar. Həmin vaxt Ermənistan ordusunun döyüş aktivliyinin qarşısını almaq və mülki əhalinin təhlükəsizliyini təmin etmək məqsədilə, şanlı Azərbaycan Ordusunun komandanlığı qoşunların cəbhəboyu ərazilərdə sürətli əks-hücum əməliyyatlarına başlamaları haqda qərarını verir. Baş verən qarşıdurmalar nəticəsində Ermənistanda hərbi vəziyyət və ümumi səfərbərlik, Azərbaycanda isə hərbi vəziyyət və komendant saatı, eyni zamanda 28 sentyabrda qismən səfərbərlik elan olunur. Qarşıdurmalar qısa müddət ərzində sürətlə alovlanır və İkinci Qarabağ müharibəsinə çevrilir. İlk gündən Azərbaycan Respublikasının suverenliyi və ərazi bütövlüyü uğrunda rəşadət göstərən əsgər və zabitlərimiz, arxa cəbhədə çalışan mülki insanlarımız, bütövlükdə xalqımız ölkə rəhbərinin ətrafında bir yumruq kimi birləşdi, əzm və iradə, həmrəylik nümayiş etdirməklə, məhz mənfur düşmənə qarşı sarsıdıcı zərbələrini endirdilər. Bəli, müzəffər Azərbaycan Ordusunun zəfər yürüşünə dözə bilməyən düşmən təxribatlara əl atdı və günahsız mülki insanları hədəfə almaqla müharibə cinayətləri törətməyə qərar verdi. Fakt o oldu ki, Azərbaycan Ordusu 27 sentyabrdan əks-hücum əməliyyatlarına başlayıb itirilmiş torpaqlarımızı geri qaytardı və mənfur düşmənə sarsıdıcı zərbələrini endidi. 44 gün ərzində davam edən Vətən savaşında “məğlubedilməz erməni” mifi tamamilə yox edildi. Unutmaq olmaz ki, cəbhədə Azərbaycan ordusunun müqavimətinə duruş gətirə bilməyən erməni ordu birləşmələri, 27 sentyabrdan son günlərə qədər mülki insanları ağır artilleriya qurğularından atəşə tutdular. Bu cür addımların atılması birbaşa erməni faşizmi, erməni barbarlığı demək oldu və işğalçı Ermənistan atdığı addımları ilə özünün terrorçu dövlət olduğunu, faşist ideologiyasına xidmət etdiyini ortaya qoymuş oldu. Baş verən belə bir olayların fonunda Azərbaycan haqq səsini bütün dünyaya çatdırsa da, təəssüflər olsun ki,  ATƏT-in Minsk qrupuna daxil olan həmsədr dövlətlər, BMT, Avropa Birliyi, aidiyyəti üzrə digər beynəlxalq təşkilatlar və s. sərt şəkildə Ermənistanın işğalçılıq siyasətini pisləyib konkret mövqelərini ortaya qoymadılar, bu ölkəyə lazımi səviyyədə təzyiq göstərmədilər. Bu cür münasibətlərin varlığına baxmayaraq, vaxt keçdikcə beynəlxalq birliyin Azərbaycana qarşı münasibəti dəyişməyə başladı. Çünki, onlar da həqiqəti dərk etməyə və apardığımız haqq mübarizəsini müdafiə etmək zorunda qaldılar.

     Biz 27 sentyabrda başlayan və 44 gün ərzində davam edən Vətən savaşında minlərlə şəhid verdik, həmvətənlərimiz arasında itkin düşənlər, yaralanıb sağlamlığını itirənlər və s. oldu. 1992-1993-cü illərdə ələ keçirilən və düşmən tapdağı altında qalan torpaqlarımızı qəhrəman şəhidlərimiz, əsgər və zabitlərimiz, qazilərimiz qanları-canları bahasına azad etdilər. Fakt o oldu ki, müzəffər Ordumuzun yazdığı tarix nənki bugünümüz üçün, eyni zamanda sabahımız üçün də möhkəm bünövrə oldu.

     Onu da qeyd edək ki, Azərbaycan dövləti hər zaman mübariz övladlarının şücaətini yüksək qiymətləndirir, şəhidlərin ruhuna ehtiram göstərir, onların əziz xatirəsini daim uca tutur. Belə bir səbəbdən də, Vətən müharibəsində böyük qəhrəmanlıqlar göstərən, üçrəngli Bayrağımızı işğaldan azad olunan torpaqlarımızda dalğalandıran, ölkəmizin ərazi bütövlüyü uğurunda canlarından-qanlarından keçməyi bacaran əsgər və zabitlərimizə, bütövlükdə şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 02 dekabr tarixli Sərancamı ilə, hər il sentyabrın 27-si Azərbaycan Respublikasında “Anım Günü” kimi qeyd olunması qərara alınmışdır. Faktdır ki, Azərbaycan xalqı, yer kürəsinin müxtəlif guşələrində yaşayan dünya azərbaycanlıları müqəddəs Vətənimizin bütövlüyü uğrunda canlarından keçən şəhidlərimizin xatirəsini bu gün də dərin ehtiramla anırlar. Küçə, prospekt və meydanlarda, yaşadıqları evlərin balkonlarında üçrəngli bayrağımızı dalğalandırırlar. Məscidlərdə, kilsələrdə, sinaqoqlarda canlarından keçmiş Vətən övladlarının ruhuna dualar oxunur. Bir sözlə, insanlar “Anım Günü”nü həm də zəfər və iftixar günü olaraq qeyd edirlər. Unutmayaq ki, Vətən müharibəsi xalqımızın şanlı tarixi, şəhidlər və qazilərimiz isə qürur mənbəyimizdir. Bəli, doğma Azərbaycanımızın igid, qeyrətli, vətənpərvər oğulları Zəfər naminə, ölkəmizin bütövlüyü naminə canlarından keçdilər və onların hər biri bizim üçün əsl qəhrəmanlıq, rəşadət və qorxmazlıq nümunəsidirlər. Vətən savaşında şəhidlərimizin qanı nahaq yerə tökülmədi, əslində biz ədaləti, tarixi həqiqəti bərpa etdik və bu müharibə nəticəsində parlaq Qələbə qazandıq. Bu Qələbə xalqımızın tarixinə əbədi həkk olundu. Ona görə də hər birimiz bu Zəfərin nəyin bahasına əldə olunmasını heç zaman unutmamalıyıq, heç zaman da unutmayacağıq.

     Hazırda ölkə rəhbəri elə bir müdrik, elə bir yetkin idarəçiliyini həyata keçirir ki, atılan hər bir addımda xalqımızın, dövlətimizin ümumilli maraqlarının təmin olunması öndə tutulur. Çünki, Silahlı Qüvvələrimizin Ali Baş Komandanı hər an siyasi iradə nümayiş etdirir, qətiyyətli addımlarını atır, bütün təpkilərə, təzyiqlərə sinə gəlib yenilməz dövlət başçısı olduğunu əməli addımları ilə sübuta yetirir.  Bəli, bütün bunları qeyd etməkdə məqsədimiz ondan ibarətdir ki, bu gün Vətənini sevən, xalqına bağlı olan hər bir vətən övladının üzərinə böyük yük düşür. Yəni, hər kəs bundan sonra da Qarabağ həqiqətlərini, erməni vandalizminin mahiyyətini, Ermənistanın terrorçu dövlət olmasını və s. bütün dünyaya çatdırmaq üçün əlindən gələni əsirgəməməlidir. Odur ki, hər bir Azərbaycan vətəndaşını bu yöndə mübarizəyə səsləyib, möhtərəm Prezidentin müdrik siyasətini müdafiə etməyə, dövlətimizin, ordumuzun yanında olmağa dəvət edirəm. Çünki, bizim mübarizəmiz haqq mübarizəsidir, ədalətin bərpası uğrunda apardığımız mübarizədir! Allah bütün şəhidlərimizə rəhmət eləsin, qazilərimizə cansağlığı nəsib etsin!

Qarabağ AZƏRBAYCANDIR!

Elxan ABBASOV,

Gədəbəy rayon İcra və Probasiya Şöbəsinin rəisi, 1-ci dərəcəli ədliyyə qulluqçusu