Ukraynanın bir sıra əraziləri geri qaytarmasından və hücumlarından sonra müdafiə mövqeyinə keçən Rusiyadan etiraf kimi açıqlamalar gəlib.

Ukraynadakı Rusiya qüvvələrinin yeni komandanı general Sergey Surovikin Rusiya dövlət televiziyasında danışıb.

Surovikin ölkənin cənubundakı Xerson şəhərində vəziyyətin çətin olduğunu və sakinlərin təxliyə edilməli olduğunu bildirib.

Rusiyalı general əlavə edib ki, HİMARS raketlərindən istifadə edən Ukrayna qoşunları şəhərin infrastrukturunu və yaşayış məntəqələrini vurub.

Britaniyanın “Teleqraf” qəzetinin yazdığına görə, rəsmilər dinc sakinlərə qapalı qalmaq təhlükəsi ilə üzləşə biləcəklərini deyərək, dərhal ərazini tərk etmələri barədə mesajlar göndəriblər.

Yaxın 6 gün ərzində 60 min adamın bölgəni tərk edəcəyi də xəbərdə öz əksini tapıb.

Xarici mətbuatda yayımlanan bu xəbərlərdən bir neçə dəqiqə sonra bölgədə təxliyələrin başladığı açıqlanıb.

Qeyd edək ki, Ukrayna lideri Volodimir Zelenski daha əvvəl açıqlamasında HİMARS raketlərinin müharibənin gedişində mühüm rol oynayacağını demişdi. Onun bu açıqlamalarından sonra HİMARS “qələbənin açarı” kimi xarakterizə edildi.