“Soçi görüşündən sonra da Ermənistan təxribatlara əl ata bilər. Çünki Ermənistanın son 30 ildəki davranışı bunu iddia etməyə əsas verir”.

Bunu Publika.az-a açıqlamasında hərbi ekspert Ədalət Verdiyev deyib.

Ekspertin fikrincə, bu gün hələ də Azərbaycan ərazilərini, o cümlədən Qazaxın 7, Naxçıvanın 1 kəndini işğal altında saxlayan ölkənin Azərbaycanı günahlandırması tamamilə məntiqə ziddir:

“Təbii ki, biz Ermənistan tərəfindən həm təxribat xarakterli bəyanatları, həm də mümkün hərbi təxribatları hər zaman gözləməliyik. Eləcə də Silahlı Qüvvələrimizi düşmənin bu təxribatlarına qarşı daim hazır vəziyyətdə saxlamalıyıq. Ermənistan tərəfinin, diplomatik müstəvidə ikitərəfli və çoxtərəfli görüşlərdə razılaşmalar əldə olunduğu halda, belə görüşlərdən dərhal sonra irimiqyaslı təxribatlara əl atdığını da diqqətdən qaçırmamalıyıq”.