Sual oluna bilər ki, niyə musiqi təhsili olan bir kimsəni prokurorluq orqanlarında, Fövqəladə Hallar nazirliyində, yaxud da Səhiyyə nazirliyində və digər sahələrdə rəhbər vəzifələrə təyin etmirlər?

    Əsası 1935-1936-cı illərdə Üzeyir Hacıbəyovun təşəbbüsü ilə qoyulan Fikrət Əmirov adına Gəncə Dövlət Filarmoniyası, Gəncə şəhəri, Nizami rayonu, Cavad xan və Həsən bəy Zərdabi küçələrinin kəsişməsində, hansı ki, əvvəllər Bakı Kinoteatrının yerləşdiyi ərazidə  fəaliyyət göstərən konsert kompleksidir. Bu Filarmoniyaya məxsus yeni binanın təməli 21 yanvar 2012-ci ildə ölkə rəhbəri İlham Əliyev cənablarının Gəncə şəhərinə səfəri zamanı qoyulur və 17 fevral 2016-cı il tarixdə isə, bu şəhərə növbəti dəfə səfər edən möhtərəm Prezident, həmin vaxt filarmoniya binasında həyata keçirilən işlərin gedişi ilə tanış olur. 10 noyabr 2016-cı il tarixdə Prezidenti İlham Əliyevin imzaladığı sərəncam əsasında Gəncə Dövlət Filarmoniyasında tikinti işlərinin davam etdirilməsi məqsədilə, 2016-cı il dövlət büdcəsində nəzərdə tutulmuş Azərbaycan Prezidentinin ehtiyat fondundan Gəncə Şəhər İcra Hakimiyyətinə 5 milyon manat məbləğində vəsait ayırılır və 10 noyabr 2017-ci il tarixdə ölkə rəhbərinin  iştirakı ilə filarmoniyanın yeni binasının açılış mərasimi keçirilir. Bütün bunlar onu göstərir ki, Gəncə Dövlət Filarmoniyası əhəmiyyəti baxımından hər kəsin diqqətini cəlb edən və parlaq şərəfli tarixə malik olan konsert kompleksidir.

     Qeyd edək ki, bu Filarmoniyaya ayrı-ayrı vaxtlarda ölkə və dünya miqyasında tanınmış sənət adamları rəhbərlik etmişlər və onlar həm sahib olduqları nüfuzları, həm də yaradıcıllıq qabiliyyətləri və digər göstəriciləri ilə Gəncə Dövlət Filarmoniyasının adının uca tutulmasına səbəb olmuşlar. Bu sırada Azərbaycan Respublikasının xalq artisti adına layiq görülmüş Şahnaz Haşımovanı, daha sonra azərbaycanlı tenor, Azərbaycan Respublikasının  xalq artisti Samir Cəfərovu və digərlərini misal çəkə bilərik. Onu da bildirək ki, 11 avqust 2022-ci il tarixə qədər bu Filarmoniyaya əməkdar artist fəxri adını daşıyan Elçin Elciyev rəhbərlik etmişdir. Görəsən, bu gün nələr baş verir ki, Gəncə Dövlət Filarmoniyasının adı ətrafında dolaşan söz-söhbətlər geniş ictimaiyyətin müzakirə mövzusuna çevrilir. Bəli, bu cür müzakirələrin aparılmasının kifayət qədər əsasları var. Çünki, bu ilin avqust ayının 11-də Azərbaycan Respublikasının Mədəniyyət naziri cənab Anar Kərimovun müvafiq əmri ilə, heç bir musiqi təhsili olmayan, özünün dediyinə görə ADAU-da iqtisadiyyat fakultəsində təhsil alan, əldə etdiyi ali təhsilə görə kənd təsərrüfatı sahəsi üzrə mütəxəssis olan Rəşad Rauf oğlu Yusifov Gəncə Dövlət Filarmoniyasına direktor  təyin olunur. Redaksiyamıza daxil olan məlumatlara görə, Rəşad Yusifovla bağlı verilən təqdimat tədbirində qohumu Gəncə Regional Mədəniyyət İdarəsinin rəisi Vasif Cənnətov da iştirak edir. Elə ki, Gəncə Dövlət Filarmoniyasına rəhbərlik edən bu şəxsin həyat  və fəaliyyəti ilə bağlı bir qədər araşdırma aparıb lazımi məlumatları əldə edirsən, o halda bəlli olur ki, Rəşad Yusifov Gəncədə tütün məhsullarının topdan satışı işləri  ilə məşğul olur və şəhərin mərkəzi ərazilərindən birində çayxana da işlədir. O halda ortaya belə bir sual çıxır ki, görəsən nə oldu, nə baş verdi ki, cənab Nazir siqaret alverçisini belə bir strateji əhəmiyyət kəsb edən konsert kompleksinə direktor təyin etdi? Deməli, belə bir təyinatın verilməsində əmmalar da çoxdur, müəmmalar da . Sadəcə olaraq bunların araşdırılmasına bir qədər vaxt da lazımdır.

   Onu da bildirək ki, Gəncə Dövlət Filarmoniyasına Rəşad Yusifovun direktor təyinatı tam əksəriyyətdə olduğu kimi, bizlərdə də şok-büsat yaşatdı. Belə bir səbəbdən də, 16 sentyabr 2022-ci il tarixdə xəbər portalımızda “Siqaret alverçisi Gəncə Dövlət Filarmoniyasına rəhbərlik edir - ŞOK FAKTLAR” başlıqlı yazı yayımladıq və geniş ictimaiyyəti baş verənlərlə bağlı məlumatlandırmağı özümüzə borc bildik. Eyni zamanda, kənd təsərrüfatı üzrə mütəxəssis olan Rəşad Yusifovla bağlı belə bir təyinatın verilməsini zəruri edən hallara aydınlıq gətirilməsi üçün, ölkə başçısına məktub yollayıb, cavabımızı isə Azərbaycan Respublikasının Mədəniyyət naziri cənab Anar Kərimovdan  aldıq. Məsələnin təəccüb və təəssüf doğuran tərəfi odur ki, ünvanladığımız məktuba 27 oktyabr 2022-ci il tarixdə, 01/04-3261/2022 saylı məktubla cavab verən Nazirliyin incəsənət və qeyri-maddi mədəni irs şöbəsinin müdiri Fərəh xanım Acalova bildirir ki, “Mədəniyyət Nazirliyi tabe müəssisələrin rəhbər şəxslərinin seçimi zamanı idarəetmə sistemində təcrübəsi olan şəxslərə üstünlük verir. Çünki, hər bir müəssisənin ümumi fəaliyyətinin tənzimlənməsi üçün, məhz təcrübəli idarəçinin olması labüddür”. Əvvəla adı gedən Rəşad Yusifov dediyinə görə əvvəllər hər hansı dövlət işində çalışmayıb. Bəs onda Fərəh Acalova hansı idarəçiliyi nəzərdə tutur? Bu şəxs ancaq özəl sektorda özünü sınayıb, yəni çayçı işlədib, tütün məmulatlarının topdan satışını , filarmoniyanın fəaliyyətinə nə kimi təsiri və ya təcrübəsi yarayar? Yəni Fərəh xanım kimi aldatmaq fikrindədir?

O halda sual oluna bilər ki, nəyə görə musiqi təhsili olan bir kimsəni prokurorluq orqanlarında, Fövqəladə Hallar nazirliyində, yaxud da Səhiyyə nazirliyində və digər sahələrdə rəhbər vəzifələrə təyin etmirlər? Axı, hər il dövlət büdcəsindən ölkəmizin musiqi sahəsində xidməti olan müəssisələrə külli miqdarda vəsaitlər ayrılır ki, xalqımıza məxsus mədəniyyətimizi inkişaf etdirək, musiqimizi yaşadaq və digər məqsədlərimizə qovuşa bilək. Deməli, Fərəh xanım Acalovanın verdiyi cavabdan belə qənaətə gəlmək olar ki, Gəncə Dövlət Filarmoniyasına qeyri-ixtisas sahibi olan şəxsi rəhbər təyin etmək, heç də qanun pozuntusu deyil. O halda ortaya başqa bir sual da çıxır ki,  büdcədən musiqi təhsili verən müəssisələrin fəaliyyət göstərmələrinə, peşəkar mütəxəssislərin hazırlanmasına və digər məqsədlər üçün  ayrılan vəsaitlər boş-boşuna xərclənir? Axı, Gəncə Dövlət Filarmoniyası heç də sıradan bir konsert kompleksi deyil ki, istənilən şəxs, o cümlədən aqrar sahə üzrə mütəxəssis olan, musiqi sahəsindən anlayışı olmayan bir kimsə, burada idarəetməni düzgün həyata keçirə bilsin? Bununla da bu Filarmoniya üzərinə düşən missiyanı uğurla həyata keçirsin.

  Əslində Nazir tərəfindən verilmiş belə bir təyinat Gəncə Dövlət Filarmoniyasının məhv olmasına, olub-qalan nüfuzunun heçə endirilməsinə, tanınmış Azərbaycan bəstəkarı, musiqi xadimi Fikrət Əmirovun adını daşıyan bu konsert kompleksinin sıradan çıxarılmasına hesablanmış addımdır. 

P.S Yeri gəlmişkən bir daha diqqətinizə çatdırım ki, Rəşad Yusifov Vasif Cənnətovun qohumudur. Vasif Cənnətov isə Mədəniyyət nazirliyində 2021-ci ilin sentyabrından mədəniyyət nazirinin birinci müavini vəzifəsində çalışan , bu ilin noyabr  ayında isə DTX-nın Mədəniyyət Nazirliyində keçirilən əməliyyat zamanı istintaqa cəlb olunan Elnur Əliyevin yaxın qohumudur. Deyəsən bu fakt DTX-nın diqqətindən yayınıb.

P.S.S Hazırda Gəncə şəhərinin təhsil, mədəniyyət sektorunun rəisləri ADAU-nun məzunlarıdır, yəni kənd təsərrüfatı mütəxissləri özlərini bir başa idarəçilikdə sınayır.Gerisi neçə olar? Hətta digər ixtisaslarda belə idarəçilikdə ADAU kadrlarına tez-tez rast gəlinir. Yeri gəlmişkən qeyd edim ki, DİM-də aşağı bal toplayanların əksərən ali məktəbdə təhsil almaları , əsasən də ikinci şans qazanan abuturientlər ADAU-da təhsil alma şansı qazanır. Şans bu məzunların həyatı boyu üzünə deyəsən həmişə gülür, daha sonra isə bu kadrlar bu gün rəhbər vəzifədədirlər. Belə getsə ADAU ADA -ya çataçatdadır. 

Mövzuya qayıdacağıq.

Mehriban Əzizqızı