Elvira Zeynalova: “Buna əsas səbəb, həmin şagirdin dövlət sərhəddini keçməsi və hal-hazırda Azərbaycandan kənarda olmasıdır”

Yəqin ki, tam əksəriyyət o haqda məlumata malikdir ki, Gəncə-Daşkəsən Regional Təhsil İdarəsinin tabeliyində fəaliyyət göstərən bəzi təhsil müəssisələrində, ələlxüsus İsmət Qayıbov adına 1№-li tam orta məktəbdə yaşanan biabırçılıqların, hər cür anarxiyanın varlığı və s. uzun müddətdir ki, geniş ictimaiyyətin daha çox müzakirə etdiyi mövzulardan birinə çevrilib. Baxmayaraq ki, bugünə kimi respublikamızda təhsil sahəsinin daha da inkişaf etdirilməsi məqsədilə əsaslı islahat proqramları həyata keçirilmiş, bir çox yeniliklər də əldə olunmuşdur. Bu yöndə atılan addımların varlığına  baxmayaraq, hələ də İsmət Qayıbov adına 1№-li tam orta məktəbdə yaşanan problemlərin həddi-hüdudu bilinmir. Qeyd edək ki, bu təhsil ocağında tənzimləmə, idarəetmə və nəzarət funksiyalarının dəqiq müəyyən edilməməsi səbəbindən, adı çəkilən bu məktəbdə anarxiya, xaos bu gün də hökm sürməkdə davam edir. Bir sözlə, hal-hazırda bu təhsil müəssisəsində direktor vəzifəsini icra edən Nüşabə Məmmədovanı təhsilin inkişafı, yaxud da bu sahəyə aid problemlərin həlli deyil, daha çox inhisarçılıq, talançılıq və s. düşündürməkdədir. Hətta, o, bu yöndə atdığı addımları, sanki özü üçün şərəf də bilir. Belə bir səbəbdəndir ki, artıq 1№-li tam orta məktəbdə yaşanan intriqalar, baş verən qarşıdurmalar və s. “pik nöqtə”yə çatıb. Məsələn, Zeynalova Elvira Oruc qızı redaksiyamıza ünvanladığı ərizəsində bildirir ki, “Mən artıq 19 ildir ki, Gəncə şəhərindəki İsmət Qayıbov adına 1№-li tam orta məktəbin rus bölməsində ingilis dili müəlliməsi işləyirəm. Həmin vaxtdan bugünə  kimi daim çalışmışam ki, doğma  vətənimə, xalqıma, onun övladlarına layiqincə xidmət göstərim. Faktdır ki, Azərbaycan Respublikasının Prezidenti İlham Əliyev cənabları və Heydər Əliyev Fondunun Prezidenti Mehriban xanım Əliyeva hər zaman təhsil işçilərinə dəstək olublar. Yəni, indiyə kimi büdcə vəsaitləri hesabına şəhərlərdə, rayonlarda, kəndlərdə və s. bir çox məktəblər əsaslı təmir olunub, bir çoxları isə yenidən inşa olunub. Məktəblərə dövlət vəsaitləri hesabına yeni avadanlıqlar verilsə də, amma İ. Qayıbov adına 1№-li tam orta məktəbdə hər şey pulla həll olunur. Məsələn, məktəbin elektrik xətlərində hansısa problem əmələ gələrsə, yaxud da partaları harasa daşımaq lazım gələrsə və s. kimi işlərin görülməsi üçün, mütləq pul verməli olursan. Baxmayaraq ki, məktəbdə təmir işlərini həyata keçirmək məqsədilə işçi olsa da və həmin şəxs müəllimlərlə bərabər dövlətdən əmək haqqı alsa da, yenə də rəhbərlik müəllimləri pul verməyə məcbur edir. O halda sual olunur ki, nəyə görə həmin şəxs dövlətdən maaş alır? Qeyd edim ki,  valideynlər istədikləri vaxt həm məktəbin binasına, həm də icazə olmadan belə dərsə daxil ola bilirlər, övladlarını bir qrupdan digər qrupa keçirməyi bacarırlar. Əslində, valideyinlər övladlarını bir qrupdan digər qrupa, yaxud da bir sinifdən digər sinifə keçirərkən onlardan yazılı formada ərizə alınmalı və ərizələr, şikayətlər məktəbin direktoru tərəfindən hərtərəfli araşdırmalı və daha sonra məsələ öz həllini tapmalıdır. Şagirdlər dərsi bilmədikləri halda biz gündəliyə “2” qiyməti yazırıq. Çünki, qanun bunu tələb edir. Bizim məktəbdə isə, tam əksinə olaylar baş verir.  Yəni, bizim şagirdlərə “2” qiyməti yazmağa ixtiyar verilmir. Təqribən on gün bundan öncə rus bölməsində təhsil alan 6D sinif şagirdlərdən birinə “2” qiyməti yazdım. Çünki, həmin şagird dərsə hazır deyildi. Çox keçmədi ki, şagirdin valideyni məktəbə gəldi və direktor vəzifəsini müvəqqəti icra edən Nüşabə Məmmədova zəng vuraraq məni direktor otağına çağırdı. Elə ki, direktorun otağına daxil oldum, o halda valideyn çığıraraq mənə bildirdi ki, “Nəyə görə mənim övladıma “2” qiyməti yazmışam?”. Hətta o, yazdığım qiymətə görə valideynimi təhqir etdi, əl qaldıraraq məni vurmağa da cəhd göstərdi. Bütün bunlar Nüşabə Məmmədovanın gözləri önündə baş verdi. Bir qədər vaxt keçdikdən sonra valideyni 6D sinifinə dərsə dəvət etdim ki, onun özü övladının dərsə verdiyi cavabı dinləsin. Valideyn övladının dərsə verdiyi cavabı dinlədikdən sonra məndən üzr istədi və hətta o, övladının dərs keçdiyim qrupda qalmasına qərar da verdi. Düşünürəm ki, bunu mən yox, məhz Nüşabə  Məmmədova etməli idi. Amma o, həmin vaxt susmağa üstünlük verdi və valideynə dərsi dinləməyi belə təklif etmədi. Həmin gündən indiyə kimi Nüşabə Məmmədova məni iş otağına çağırır və mənə “Səndən şikayətlər gəlir və hər gün sənə görə buradan bir valideyn yola salıram” deyir. Amma, dərs keçdiyim siniflərin rəhbərlərinə, mənə görə kim direktorun yanına gəlib deyə sual etdikdə, onlar “Heç bir şikayət yoxdur, əgər şikayət olsaydı biz də bilərdik” deyə cavab verirlər. O halda sual olunur ki, görəsən Nüşabə Məmmədovanın yalan danışmasına səbəb nədir?  Çünki, şikayət ərizə şəklində olur və təqdim olunan  ərizəyə valideynin özü də imza atır. Qeyd edim ki, indiyə kimi mənimlə bağlı heç bir şikayət olmayıb. Hal-hazırda rus bölməsində 5E sinifin rəhbəriyəm və şagirdlərlə, valideynlərlə hansısa problemim yoxdur. Direktor əvəzi Nüşabə Məmmədova isə mənə “Valideynlər səni istəmirlər, ona görə də onlar qol çəkib mənə ərizə ilə müraciət ediblər” deyir. Bu xanım rəhbərin dediklərini eşidib dərhal onun yanında valideyn komitəsini yığdım, o halda komitə sədri “Belə şey ola bilməz” cavabını verdi. İndi istərdim ki, Nüşabə Məmmədova dediklərini mənə sübuta yetirsin və hansı kağıza qol çəkildiyini mənə göstərsin.  

    Qeyd edim ki, günlərin birində direktor əvəzi vəzifəni icra edən Nüşabə xanım mənə iş otağında əmr şəklində “Sən Teymur Əliyevin ev dərsindən imtina etmələsən” dedi və qarşımda belə bir tələb də qoydu. Bildirirəm ki, 01 noyabr 2022-ci il tarixdən rus bölməsinin 8Ç sinifində, hansı ki, evdə təhsil alan Teymur Əliyevin dərsi dayandırılıb. Buna əsas səbəb, həmin şagirdin dövlət sərhəddini keçməsi və hal-hazırda Azərbaycandan kənarda olmasıdır. Belə olan halda sual yaranır ki, Nüşabə Məmmədovanın marağı nədir ki, o, məndən bu dərsi keçməkdən imtina etməyimi tələb edir və həmin dərsi Mina Salmanovaya vermək qərarına gəlir? Görəsən hansı qanun ixtiyar verir ki, sərhəddi keçən şagirdə kənd təsərrüfatı üzrə mütəxəssis ingilis-dili dərsi keçsin? Bunun özü ciddi qanun pozuntusu olduğundan, mən Nüşabə Məmmədovanın belə bir tələbini birmənalı şəkildə rədd etdim. O halda ortaya daha bir sual çıxır ki, nəyə görə direktor əvəzi vəzifəni daşıyan bu xanım, məhz Mina Salmanovanın dərs saatlarının az olması səbəbindən də narahatlıq keçirir? Görəsən Mina müəllimə hansı açıq dərslərin müəllifidir?. Sual olunur ki, nəyə görə bu müəllimə hər zaman təlimdən qaçır? Yəqin ki, lazımi biliyə sahib olan müəllimə heç bir təlimdən qaçmaz. Dəfələrlə 9E sinifində riyaziyyat fənnini tədris edən Xalidə Uğurovnaya bildirmişəm ki, dərsdən 5-10 dəqiqə tez çıxma, şagirdlər boş qalırlar, səs-küy salırlar, zəng vurulduqda çıx, çünki şagirdlər dərsdən yayınırlar. Axı, Gəncə-Daşkəsən Regional Təhsil İdarəsi də bunu tələb edir. Buna baxmayaraq, Xalidə müəllimə “Mən hazırlığımı məktəbə qurban vermərəm. Ərizə yazıb gedərəm, amma hazırlığımı dayandırmaram” deyərək, sinif otağımın qapısını çırpıb getdi. Bir qədər vaxt keçdikdən sonra isə Nüşabə Məmmədova mənə “Sən Xalidədən nə istəyirsən, onun həyat yoldaşı sənin üstünə gəlmişdi, mən qoymadım. Xalidəni az qalmışdı ki, insult vursun. O, “bületen”ə çıxıb sənə görə məktəbi tərk edir” dedi. Bu hadisə 12 dekabr 2022-ci il tarixdə baş verib. Əvvəla, Xalidə müəllimə “buleten”ə necə çıxıb ki, onu insult də vurub? Axı, məlumat var ki, o, 13 dekabr günü dərsə getməyib, guya ki, xəstədir. Ancaq, o, həmin gün evində hazırlıq edib. Mən bunu sübut da edə bilərəm. Sual oluna bilər ki, insult olan müəllimə 14 dekabr günü məktəbə necə gəlib? Bəs o, “buleten”də idi? Başqa bir sual da yaranır ki, görəsən onun həyat yoldaşı mənim üstümə niyə gəlmişdi? Bu sualı Xalidə müəlliməyə verdikdə o, “mən söz götürmürəm” deyə cavab verdi və yenə də icazəsiz dərsi qoyub getdi. Hətta, o, mənə onu da bildirdiki “Nəslim sənin üstünə ayağa qalxıb. Təhsil idarəsindən də deyirlər ki, orda sənin xətrinə kim dəyir?” Heç cür anlaya bilmirəm ki, Xalidə müəllimə kimdən artıqdır, yaxud da bu tədris ocağı döyüş meydanıdır? Bu müəllimə hər dəfə çığırır, küsür, dərsdən 10 dəqiqə tez çıxıb harasa gedir? Adını da qoyur ki, xəstəyəm, amma səhər saatlarında hazırlıq etməklə məşğul olur. Nə qədər ki, bəzi müəllimələr səhər saatlarında hazırlıq etməklə məşğul olacaqlar, o zaman da məktəblərdə 9-cu,10-cu və 11-ci sinif şagirdləri olmayacaqlar. Elm və Təhsil Nazirliyi bununla bağlı ölçü götürməlidir. Bizim məktəbdə heç kim sinif rəhbəri olmaq istəmir, ona görə də bəzi müəllimlər iki sinifə rəhbərlik etməli olurlar. Əslində belə olmaz, eyni zamanda siniflər nəzarətsiz də qala bilməzlər. Məktəbdə vəzifəli şəxslər sinif rəhbərliyi işini apara bilməzlər, ancaq bu bizim məktəbdə mümkün olur. Məsələn, rus bölməsindəki 9D sinfinin rəhbəri direktor müavini Səbinə İmamverdiyevadır. Əgər lazım gələrsə bunu faktlarla da sübut edərəm. Mən əvvəl rus bölməsinin 9E sinifini beşinci sinifdən aparırdım, bu ilin sentyabr ayında isə mənə rus bölməsinin 5E sinifi verildi. 9E sinifinin valideyn və şagirdləri mənim onları başqa müəllimə təhvil verməyimi istəmədilər və bu sinif Xalidə Uğurovnaya verildi. Bu gün də sinifin hərbi işlərini mən aparıram, şagirdləri təşkil edirəm, 9E sinifinin valideynləri mənə zəng vurub Nüşabə Məmmədovadan şikayət edirlər. Çünki, 9D sinifi və digər 9-cu sinif şagirdləri dərsə gəlmirlər. 9E sinfinin valideynləri belə haldan çox narazıdırlar. Onlar tələb edirlər ki, qanun hamı üçün olsun və digər siniflərin şagirdləri də dərsə gəlsinlər. Mən istənilən halda valideynlərin səsyazılarını, şikayəltərini təqdim edə bilərəm.

    Ümumiyyətlə, İ. Qayıbov adına 1№-li tam orta məktəbdə direktor əvəzəzi vəzifəni daşıyan Nüşabə Məmmədova və rus bölməsinin direktor müavini yerində olmayan şəxslərdirlər. Qeyd edim ki, bütün bunları 07 dekabr günü zəng edib Gəncə-Daşkəsən Regional Təhsil İdarəsinə çatdırmışam. Həmin gün bu idarənin qəbul şöbəsindən Könül xanım mənə cavab verdi və o, “Sabah məktəbə nümayəndə gedəcək” desə də, bir kimsə  gəlmədi. 13 dekabrda təkrar Könül xanımla əlaqə saxladım, o, bu dəfə cavab verdi ki, “Sizin nömrənizi vermişəm, sizinlə əlaqə saxlıyacaqlar” desə də, yenə də heç bir bir nəticə olmadı. Artıq iki həftədir ki, Gəncə-Daşkəsən Regional Təhsil İdarəsi baş verənlərə göz yummaqda davam edir. Niyə, nə səbəbə, hələ ki, bunu başa düşə bilmirəm. Axı, ulu öndər Heydər Əliyev demişdir ki, “Təhsil millətin gələcəyidir. Mən dünyada müəllimdən yüksək ad tanımıram”. Görəsən budurmi, Gəncə-Daşkəsən Regional Təhsil İdarəsi rəhbərliyinin Ulu Öndərin söylədiyi kəlama qoyduğu hörmət?! Yazıda adı çəkilən hər kəsin mövqeyini dinləyə bilərik.

Mövzu diqqətimizdədir.