“Rusiyanın Qara dəniz vasitəsilə Ukrayna limanlarına gedən bütün gəmiləri hərbi yükdaşıyıcılar kimi qəbul etmək qərarı Ukraynanı taxıl ixracı ilə bağlı əsas resurslardan məhrum edir, buna görə də Brüssel Kiyevə hərbi dəstəyi artıracaq”.

Bu sözləri Avropa İttifaqının Xarici siyasət və təhlükəsizlik işləri üzrə ali nümayəndəsi Jozep Borrel Aİ xarici işlər nazirləri ilə görüşü zamanı deyib.

“Hər hansı gəmi və ya hərbi gəminin Rusiyanın hərbi fəaliyyətinin hədəfi kimi təyin edilməsi qərarı Ukraynanın öz taxılını dəniz yolu ilə ixrac etmək imkanının qarşısını almaq üçün atılmış addımdır. Bu, ilk növbədə Ukraynanın özü üçün müəyyən nəticələrə gətirib çıxaracaq və onun resurslardan məhrum olması kimi fəsadlara səbəb olacaq”, - deyə Borrel qeyd edib.

“Bundan yalnız bir çıxış yolu var - Ukraynaya hərbi yardımı artırmaq. Əgər onlar bombalanırsa, Rusiya dronlardan istifadə edirsə, biz Ukraynanı hava hücumundan müdafiə sistemləri ilə təmin etməliyik”, - deyə Jozep Borrel vurğulayıb.

Aİ diplomatiyasının rəhbəri Kiyevə silah tədarükünü artırmaq üçün Avropa Sülh Fondunun resurslarını əhəmiyyətli dərəcədə genişləndirməyə söz verib.