Azərbaycan 44 günlük müharibə ilə təkcə 30 illik işğala son qoymadı, 2020-ci ildən bu yana geridə qalan 3 il ərzində Azərbaycanın bütövlüyün təmin etməklə yanaşı Cənubi Qafqazın da geosiyasi xəritəsində çox önəmli dəyişiklər olacaq tarixi zəfərlərə imza atmağı bacardı.

Globall.az  Trend-ə istinadən bildirir ki,  İkinci Qarabağ müharibəsindəki qələbəmizi o gündən bu günə hər ötən gün istər diplomatik masada, istərsə də hərb meydanında taclandıran rəsmi Bakı və Azərbaycan Ordusu həmin tarixi zəfərinə daha birini əlavə etdi.

İki gün əvvəl - 19 sentyabrda Üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması, eləcə də Azərbaycan Respublikasının konstitusiya quruluşunun bərpa edilməsi məqsədilə 19-20 sentyabr tarixlərində bölgədə lokal xarakterli antiterror tədbirləri həyata keçirən Ordumuz bir günün tamamına dəqiqələr qalmış Ermənistan silahlı qüvvələrinin Qarabağdakı qeyri-qanuni hərbi birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də, döyüş vasitələri, hərbi təyinatlı obyektləri yüksək dəqiqlikli silahların tətbiqi ilə sıradan çıxarmağı bacardı.

Azərbaycan Ordusunun dəqiqliklə icra etdiyi lokal antiterror tədbirləri qarşısında ağ bayraq qaldırmağa məcbur olan Ermənistan silahlı qüvvələrinin ərazilərimizdəki silahlı birləşmələri bununla da Azərbaycanın Qarabağ ərazisində rus sülhməramlı kontingentinin müvəqqəti nəzarət zonasında möhkəmlənməyə çalışan, beynəlxalq ermənipərəst qüvvələrin dəstəyi ilə Azərbaycan ərazisində özünə legitimlik qazanmaq istəyən separatçıların sonunun çatdığı dəqiqləşmiş oldu.

Hər şey Prezident İlham Əliyevin bəyan etdiyi şərtlər əsasında davam etməli idi belə də oldu. Separatçılar məcbur edildi, təslim olmaqdan çıxış yollarının qalmadığını anlayıb, Bakının təklifindən qeyri addımın Azərbaycanın Qarabağ istisadi rayonunda Ermənistan silahlı qüvvələrinə məxsus silahlı birləşmələrin son nəfərinə kimi gəbərdiləcəyini başa düşdü. Azərbaycan Silahlı Qüvvələri 44 günlük Vətən müharibəsində olduğu kimi mülki əhali və infrastruktur obyektləri hədəfə almadan, yalnız legitim hərbi hədəflər sıradan çıxarmaqla qondarma rejim qalıqlarını Bakının şərtləri ilə razılaşmağa məcbur qoydu. Separatçılar silahın yerə qoyulduğu və tərksilah olunduğu halda antiterror tədbirləri dayandırılacağını bəyan edən dövlətimizin başçısı bu dəfə də sözünə sadiq qaldı.

Bu gün Yevlaxda Azərbaycanın Qarabağ itqisadi rayonunun erməni sakinlərinin nümayəndələri ilə Azərbaycan mərkəzi hakimiyyətinin nümayəndələri arasında baş tutan görüş Kürün sahilində separatçılığı dəfni günü kimi tarixdə qalacaq. Çünki görüşün keçirildiyi məkanda tək Azərbaycan bayrağı var idi. Bu da o deməkdir ki, təmsil etdikləri xalqın nümayəndələri olan bu şəxslər Azərbaycan bayrağı altında, Azərbaycan qanunları çərçivəsində, rəsmi Bakının diqtə etdiyi şərtlərlə razdırlar. Bütün bu gedişat isə tez bir zamanda Xankəndi və onun ətraf yaşayış məntəqələrində (Rusiya sülhməramlılarının 3 ildir müvəqqəti nəzarət zonasında yerləşən rayon və kəndlər) artıq yalnız Azərbaycan vətəndaşlarının yaşayacağı anlamına gəlir, üçrəngli şanlı bayrağımız 30 ildən sonra nəhayət o yerlərdə də dalğalanacaq.

Azərbaycan xalqı 44 günlük müharibədə öz dövlətinə və ordusuna hər cür dəstəyi ilə yadda qaldığı kimi 23 saat 43 dəqiqə çəkən lokal antiterror tədbirinin gedişatı və finalında da öz dəstəyini gizlətmədi, bunu müxtəlif formada 3 il əvvəl olduğu kimi yenidən nümayiş etdirdi. Azərbaycanın sosial şəbəkə seqmenti Xankəndi və ətrafında da suverenliyimizin bərqərar olması münasibəti ilə müxtəlif paylaşımları ilə diqqət çəkiblər. Sevinclərini müxtəlif postlarla çatdırmaq istəyən sosial şəbəkə istifadəçilərimizin böyük əksəriyyəti Prezident İlham Əliyevin uğurlu siyasəti, düşmənə aman verməməsi və Ordumuzun qəhrəmanlığına xüsusilə yer ayırıblar.

Lokal antiterror tədbirləri ilə bağlı xalqın sosial şəbəkədəki reaksiyalarından bir daha əmin oluruq ki, Azərbaycan Xalqı 3 il əvvəl Ordusunun və Dövlətinin ətrafında necə sıx, bir yumruq kimi birləşmişdisə, bu gün ondan da güclü, ondan da inamlı şəkildə istənilən əmri icra etmək üçün zamanından və məkanından asılı olmayaraq hər biri Vətənin müsəlləh əsgərinə çevrilə bilər.