Müğənni Şəbnəm Tovuzlu həmkarı Şəbnəm Tapdığın onu məhkəməyə verdiyini açıqlayıb.

MTV Azərbaycanda "Tarixin bir günü” verilişində bu haqda danışan müğənni, məhkəməyə verilən tək müğəninin o olmadığını da qeyd edib.

 "Mənim adımı dünyasını dəyişən anam qoyub. Şəbnəm xanımın adi insanlarla işi yoxdur. Amma səhnə adı Şəbnəm olanları məhkəməyə verir. Mənə artıq Nərimanov rayon məhkəməsindən sənədlər gəlib. Şəbnəm Qəhramanovanı da məhkəməyə verib. Mənə zəng edir, aqressiv danışır. Burdan efir vasitəsilə deyirəm. Anam 29 yaşında dünyasını dəyişib və sizin fanatınız olub hər iki valideynim. Ona görə sizin adınızı qoyublar mənə. Dəfələrlə bunu sizə deməyimə rəğmən, siz necə bunu edə bildiniz? Qanun qarşısında boynum qıldan incədir amma məndən nə istəyirsiniz? Mənə deyirsiz adımı Şəbnur edim, Şəbtac edim. Bu nə düşüncəsizlikdir? Məhkəməyə gələcəm, vəkilim də var. Amma sizə görə əsla adımı dəyişdirməyəcəyəm!”

Məsələ ilə bağlı Azxeber.com-a açıqlama verən Şəbnəm Tapdıq isə Tovuzlunu məhkəməyə vermə səbəbinin ad ilə əlaqədar olmadığını bildirib.

"Mənim Şəbnəm Tovuzlunu məhkəməyə vermə səbəbim tam başqa mövzudur. Bu məhkəmədə ad artıq önəm daşımır. Şəbnəm Tovuzlu verilişlərdə mənimlə bağlı həqiqəti əks etdirməyən ifadələr işlədir. Gah yaşımı çox deyir, gah psixoloji poblemim var deyirlər. Bunlar mənim şərəf və ləyaqətimi alçaldan sözlərdir. Hətta yalandan dedi ki, guya mən onun anası ilə rəfiqə olmuşam, ona görə o mənim adımı ona qoyub. Bunların hamısı yalandır. Mən haradan tanıyıram onun anası kimdir? O, gərək məndən üzr istəsin və mənim haqqımda bir də heç yerdə, heç bir şey danışmasın”.

O, açıqlamasında Şəbnəm Qəhramanovanı məhkəməyə vermədiyini deyib:

"Ad məsələsi olsa, Şəbnəm Qəhramanova da var bu sənətdə, gərək onu da verərdim. O, harada məni görür, gəlir öpür, hörmət edir, deyir efirə də çıxaq biryerdə. Onunla problemim yoxdur”.

Şəbnəm Tapdıq qalmaqallara son qoymaq üçün adını dəyişdiyini ilk dəfə AZXEBER.COM-a açıqlayıb. O, sənətdə ilk olduğu üçün artıq adını İlkşəbnəm olaraq dəyişdirdiyini bildirib.