Günel Ağazadə: “Azərbaycanda bir çox sahə inkişaf edib, amma əmlak sahəsi bazarda formalaşmayıb”
Beynəlxalq Əmlak və İnvestisiya Zirvə toplantısının təşkilatçısı, “Between Estates” şirkətinin rəhbəri, “Amazon” şirkətinin 15 ölkə üzrə layihə meneceri Günel Ağazadə müsahibə verib.
Globall.az müsahibəni olduğu kimi təqdim edir:
– Bildiyimiz kimi bu il 1 iyun tarixində ölkəmizdə Beynəlxalq Əmlak və İnvestisiya Zirvəsi keçiriləcək. Maraqlıdır Əmlak və İnvestisiya sahəsində zirvə görüşü təşkil etmək ideyası necə yaranıb?
– Mən Günel Ağazadə olaraq deyə bilərəm ki yaşadığım hər bir hadisə mənim üçün bir fürsət doğurur. Necə desək, beyində lampa yanır. Gələk yaranma məsələsinə, özümün müşahidələrim və bazar araşdırmalarım nəticəsində əmlak sektorunda boşluğun olması bu zirvə görüşünü təşkil etməyimə səbəb oldu. Son zamanlar Azərbaycanda təhsil, səhiyyə, menecment, marketinq və s. sahələr sözün əsl mənasında inkişaf edib və ikona halına gəlibdir, amma əmlak sahəsi hələ bazarda ikonlaşmayıb. Qısası hələ də rieltor və ya əmlak kəlməsini istifadə edəndə makler düşünürük. Bu zənciri qırmağın ən gözəl yolu isə insanları maarifləndirməkdir deyə düşünürəm.
– Tədbir “Gələcəyə Doğru Yatırım” konsept mesajı ilə təşkil olunur. Gələcəyə doğru yatırım etmək üçün nələr etməliyik? Sizcə, zirvə bu mesajı tam ötürə biləcəkmi?
– Gələcəyə doğru yatırım mesajının anlamı, insanların əmlak sektoruna olunacaq investisiya imkanları geri dönüşləri, əmlak dedikdə yalnız yaşam alanı olaraq deyil də, yatırım məqsədli baxış bucağını yaratmaq və ən əsası yalnız Azərbaycan bazarını deyil, beynəlxalq bazarı da tanımaqdır. Qaldı ki, zirvənin bu mesajı ötürüb-ötürməməsinə düşünürəm ki, buna gələn iştirakçılar qərar verəcəklər. Onu deyə bilərəm ki, təhsildə, idarəetmədə xarici bazara maraq salıb faydalanmaq istəyənlər varsa, niyə də əmlak sektorunda xaricdən faydalanmayaq?
– 1 iyunda təşkil olunacaq Beynəlxalq Əmlak və İnvestisiya Zirvəsində sahibkarlar, investorlar, dövlət rəsmiləri bir araya gələcəklər. Keçiriləcək zirvədə bizi nələr gözləyir?
– Bu sualınız iki kəlmə ilə cavablandırmaq istəyirəm; Birincisi maariflənmək, ikincisi xarici və yerli əlaqələr. Məncə bu kifayətdir. Ən azından Azərbaycandan Braziliya, Amerika, İsveç, Almaniya, Polşa gəzintisi edərək bazarı bildikdən sonra hər insanlarımızda hansısa fikirlər formalaşacaq. Maariflənmək ən böyük qatqıdır deyə düşünürəm.
– Beynəlxalq Əmlak və İnvestisiya Zirvəsinə maraq necədir, qane edirmi? Təşkilati işlər hansı mərhələdədir?
– Konsept mesajının haqqını veririk deyə bilərik, çünki planladığımız və gedişata əsasən zirvəni hər il davamlı etməyi düşünürük. Arxa fonda komanda daxili işləri bitirib, hədəf kütləmizlə işləyirik. Gözlədiyimiz kimi, bunun kütlə tərəfindən maraqla qarşılanacağını düşünürük.
– Bir az da spikerlərdən danışaq. Günel xanım, ümumi neçə spiker nəzərdə tutulub? Spikerlər hansı amillərə əsasən seçilir?
– Gəldik məsələnin əsas hissəsinə, necə deyərlər təməlinə. Tədbir formatında bir az konseptdən çıxaraq maraq oyadacağıq. Standartları dəyişmək məni motivasiya edir. Düşünürəm ki gələn iştirakçıların daimi beynində “indi görəsən nə olacaq?” sualı yaranacaq. Spiker olaraq isə 11 nəfərin çıxışı nəzərdə tutulub. Tədbir formatı ilkin olaraq tək çıxışlar, sonra isə panel və ən son xarici spikerlərin onlayn çıxışları ilə nəzərdə tutulub. Spikerlərin hər biri öz sahəsində sözünü deyən yerli və xarici bazarı bilən və ən əsası auditoriyanın marağını cəlb edən şəxslərdir. Mən inanıram ki tədbirdə kimsə telefonla oynamayacaq, ya da getmək üçün can atmayacaq.
– Zirvə yerli şirkətlərə, eləcə də iştirak edən şəxslərə nə kimi fayda verəcək? Sponsor və ya tərəfdaş kimi iştirak etmək istəyən şirkətlər hansı ünvana müraciət etməlidirlər?
– İlkin olaraq bunu deyə bilərəm ki, hər birimiz bir evdə qalırıq deyə evlərimizi kəşf etmək, dəyər biçmək, fərqli bilgilər əldə edib analiz etmək hər kəs tərəfindən maraqlı olar. Faydanın ən böyük qismi isə Avropa, Amerika və Braziliya bazarını Azərbaycandan tədbirdə iştirakla öyrənəcəklər, xarici əlaqələr quracaq və xarici bazar da eyni zamanda Azərbaycanı kəşf edib tanıyacaq. Bu belə bizim üçün uğur imzası sayılır, çünki mənim etmək istədiyimin fərqi yalnız Azərbaycan xaricə getməsin, xaric də Azərbaycana gəlsin. Adından da göründüyü kimi “Between” olaraq ölkələr arasında körpü rolunu oynamağı hədəfləyirik. Sponsorluq və tərəfdaşlıqda maraqlı olanlar sosial hesablarımızdan müraciət edə və ya saytımız üzərindən bizimlə əlaqə saxlaya bilərlər.
– Adından da göründüyü kimi, beynəlxalq səviyyədə təşkil olunan zirvəyə xarici şirkətlərin marağı necədir?
– Azərbaycan bazarında təbliğat işləri görərək öz şirkətini tanıtmaq və yeni potensial müştərilər qazanmaq burada onların maraq dairəsidir.
– Tədbirdə iştirak etmək istəyən şəxslər bileti necə əldə edə bilərlər?
– Bunun üçün “propertyandinvestment” sosial hesablarına yaza və ya https://propertyandinvestment.az/ saytından birbaşa biletləri əldə edə bilərlər.
