YAP Yasamal rayon təşkilatında Azərbaycan Yazıçılar Birliyi və Azərbaycan Jurnalistlər birliyinin üzvü olan Raziyə Rzayevanın müəllifi olduğu 44 günlük Vətən müharibəsi şəhidi Dadaşzadə Kənan Elman oğlunun əziz xatirəsinə həsr olunmuş “Kənan-Həsrətli Dünyam” adlı kitabın təqdimat mərasimi keçirilib

Globall.az  -ın məlumatına görə, mərasimdə  YAP Yasamal rayon təşkilatının sədri Bəxtiyar Nəbiyev, Azərbaycan Respublikası Milli Məclisinin deputatı, YAP Təftiş Komissiyasının üzvü Aydın Hüseynov, Azərbaycan Respublikası Milli Məclisinin deputatı Aydın Mirzəzadə, Azərbaycan Yazıçılar Birliyi və Azərbaycan Jurnalistlər birliyinin üzvü Raziyə Rzayeva, Yasamal Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi Tural Əsgərov, YAP Yasamal rayon təşkilatının əməkdaşları, ərazi partiya təşkilatlarının sədr, sədr müavinləri, şəhid ailələri, qazilər, partiya fəalları, ictimaiyyət nümayəndələri və ali təhsil müəssisələrinin tələbələri iştirak edib.

Əvvəlcə Yasamal rayonu ərazisində Şəhidlərin Xatirə Kompleksi ziyarət edilib, ölkəmizin ərazi bütövlüyü, suverenliyi uğrunda canlarını fəda etmiş şəhidlərimizin əziz xatirəsi dərin hörmət və ehtiramla anılıb.

Sonra YAP Yasamal rayon təşkilatının inzibati binasında Ümummilli Lider Heydər Əliyevin büstü önünə gül dəstələri düzülüb, əziz xatirəsi dərin ehtiramla yad edilib.

Mərasimdə  Azərbaycan Respublikasının Dövlət Himni səsləndirilib, Ulu Öndər Heydər Əliyevin və Azərbaycan Respublikasının suverenliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Sonra 44 günlük Vətən müharibəsi şəhidi Dadaşzadə Kənan Elman oğlunun əziz xatirəsinə həsr olunmuş videoçarx nümayiş olunub.

Mərasim iştirakçılarını salamlayaraq giriş nitqi ilə çıxış edən  YAP Yasamal rayon təşkilatının sədri Bəxtiyar Nəbiyev qeyd edib ki, Azərbaycan Ordusu 44 günlük Zəfər yürüşü və əldə olunan Qələbələr ilə ölkəmizin ərazi bütövlüyünü təmin edərək, tarixi ədaləti bərpa edə bildi. Silahlı Qüvvələrimiz işğal edilmiş əraziləri düşməndən təmizlənməsi uğrunda rəşadətlə mübarizə apardı, böyük tarixi nailiyyətlərə imza atdı. Vətən müharibəsi Ali Baş Komandan İlham Əliyevin qəti və dönməz iradəsi, Müzəffər Ordumuzun qəhrəmanlığı nəticəsində zəfərlə başa çatdı. Bundan əlavə 2023-cü ilin 19-20 sentyabr tarixlərindəki lokal xarakterli anti terror tədbirləri və həmin ilin 15 oktyabr tarixində isə Xankəndi, Xocalı, Xocavənd, Ağdərə şəhərlərində, Əsgəran qəsəbəsində üçrəngli bayrağımızın dalğalandırılması tarixi Zəfərlərimizin zirvəsi oldu. Torpaq – uğrunda ölən varsa Vətəndir. Acı da olsa gerçək budur ki, heç bir qələbə qansız tarixə yazılmır. Bu yolda Dadaşzadə Kənan Elman oğlunun timsalında canından və qanından keçən cəmi şəhidlərimizin ruhu qarşında baş əyir, şəhidlərimizin ailələrinə səbr diləyirəm. Nəzərə çatdırıldı ki, şəhid ailələri və qazilərin sosial müdafiəsini gücləndirmək və onlara dövlət qayğısını artırılması daim Prezident cənab İlham Əliyevin və Birinci vitse-prezident Mehriban xanım Əliyevanın daim diqqətindədir.

“Kənan-Həsrətli Dünyam” adlı kitabın müəllifi olan Raziyə Rzayeva çıxış edərək 44 günlük Vətən müharibəsində qəhrəman hərbiçilərimizin rəşadətindən və şəhidi Dadaşzadə Kənan Elman oğlunun əziz xatirəsinə həsr olunmuş “Kənan-Həsrətli Dünyam” adlı kitabın ərsəyə gəlməsindən bəhs edib.

Çıxış edən Azərbaycan Respublikası Milli Məclisinin deputatı, YAP Təftiş Komissiyasının üzvü Aydın Hüseynov qeyd edib ki, İkinci Qarabağ müharibəsi bizim şanlı tariximizdir. Bu Qələbə tarixdə əbədi qalacaq. Azərbaycan Silahlı Qüvvələri Müzəffər Ali Baş Komandan cənab İlham Əliyevin rəhbərliyi ilə 44 gün ərzində düşmən ordusunu məhv edərək öz ərazi bütövlüyünü bərpa etdi. Biz düşməni torpaqlarımızdan qovduq və ədaləti, beynəlxalq hüququ bərpa etdik. Biz milli ləyaqətimizi bərpa etdik. Bu gün Azərbaycan xalqı mərd oğullarımızın şücayəti sayəsində müzəffər xalq kimi yaşayır. Bu gün Prezident cənab İlham Əliyevin və Birinci vitse-prezident Mehriban xanım Əliyevanın rəhbərliyi ilə şəhid ailələri, qazilər və əhalinin digər həssas qruplarına aid insanlara diqqət və qayğının göstərilməsi, onların rifah halının yaxşılaşdırılması dövlətimizin yürütdüyü siyasətin prioritet istiqamətlərindən biri olmasını bir daha göstərir.

Azərbaycan Respublikası Milli Məclisinin deputatı Aydın Mirzəzadə çıxış edərək bildirib ki, Ermənistanın hərbi təcavüzü nəticəsində 30 ilə yaxın işğal altında qalmış əzəli tarixi torpaqlarımız ulu öndər Heydər Əliyevin layilqli siyasi davamçısı Prezident, Müzəffər Ali Baş Komandan cənab İlham Əliyevin rəhbərliyi ilə Rəşadətli Azərbaycan Ordusunun rəşadəti ilə  əldə olunan tarixi Qələbələr tariximizə qızıl hərflərlə yazıldı.Bu Qələbənin qazanılmasında şanlı və qəhrəman Azərbaycan əsgər və zabitlərinin əvəzsiz rolu danılmazdır. Ona görə də bütün Azərbaycan xalqı Vətənin xilaskarı olan bu insanları və Vətən uğrunda həlak olmuş bütün şəhidlərimizi həmişə minnətdarlıq hissi ilə xatırlayacaq. Eyni zamanda, qalib dövlət olaraq Azərbaycanın qarşısında yeni hədəflər dayanır. Ölkəmiz bu hədəflərə çatmaq üçün Prezident İlham Əliyevin rəhbərliyi ilə inamlı addımlar atır və bundan sonra da atacaq.

Çıxış edən şəhid Dadaşzadə Kənan Elman oğlunun döyüş yoldaşı, qazi Ramin Şirinov şəhid Dadaşzadə Kənan Elman oğlu ilə olan xoş xatirələrini bölüşüb. Qeyd olunub ki, 44 günlük Vətən müharibəsindəki döyüşlərdə şəhidlərimizin qəhrəmanlığı, qazilərimizin, xalqımızın, dövlətimizin, şanlı ordumuzun şücaəti gənclərimiz üçün əsl vətənpərvərlik nümunəsi kimi tarixə qızıl hərflərlə yazıldı. Ali Baş Komandan cənab İlham Əliyevin əmrinə hər an müntəzir dayanan hərbçilərimiz düşməni doğma torpaqlarımızdan qovdu. Bu gün ölkəmizdə Prezident cənab İlham Əliyevin rəhbərliyi ilə həyata keçirilən sosial siyasətin əsas istiqamətlərindən birini də şəhid ailələri və qazilərə göstərilən dövlət qayğısı təşkil edir. Çıxışının sonunda qazi Ramin Şirinov göstərilə diqqət və qayğıya görə Prezident cənab İlham Əliyevin və Birinci vitse-prezident Mehriban xanım Əliyeva  öz dərin minnətdarlığını ifadə edib.

Sonda çıxış edən 44 günlük Vətən müharibəsi şəhidi Dadaşzadə Kənan Elman oğlunun anası Şəkurə Feyziyeva bildirib ki, Azərbaycan dövləti hər zaman öz vətəndaşının rifah halını yaxşılaşdırmaq üçün xüsusi tədbirlər görüb. Bu, təkcə bir sahəyə aid deyil, ümumilikdə, vətəndaşların həyat səviyyəsinin yaxşılaşdırılması dövlətin diqqət mərkəzindədir. Qarabağ müharibəsi şəhid ailələri, qazilər və müharibə iştirakçılarına Prezident cənab İlham Əliyev və Birinci vitse-prezident Mehriban xanım Əliyeva tərəfindən göstərilən diqqət və qayğı xüsusi olaraq təqdirəlayiqdir. Şəhid anası Şəkurə Feyziyeva tərəfindən Prezident cənab İlham Əliyevin və Birinci vitse-prezident Mehriban xanım Əliyevanın gördükləri işlərə və şəhidlərimizin adlarının əbədiləşdirilməsində göstərdikləri diqqətə və qayğıya görə minnətdarlıq ifadə olunub.
Mərasimə 44 günlük Vətən müharibəsi şəhidi Kənan Dadaşzadənin bitirdiyi 52 nömrəli tam orta məktəbin hazırladığı “Vətən Sevgisi” adlı bədii hissə ilə yekun vurulub.
Təqdimat mərasimində “Kənan-Həsrətli Dünyam” adlı kitab iştirakçılara təqdim olunub.

Sonda xatirə şəkli çəkdirilib.

Qeyd edək ki, 44 günlük Vətən müharibəsi şəhidi Dadaşzadə Kənan Elman oğlu Prezident cənab İlham Əliyevin müvafiq sərəncamlarına əsasən şəhadətindən sonra “Vətən uğrunda”, “Laçının azad olunmasına görə” və “Suqovuşanın azad olunmasına görə” medalları ilə təltif edilib.

Allah bütün şəhidlərimizə rəhmət eləsin!