Ermənistan xarici işlər naziri Ararat Mirzoyan deyib ki, İrəvan və Bakı uzunmüddətli sülhün bərqərar olması üçün bir-birilərinin konstitusiyalarında əhəmiyyətli maneələr görürlər.

“Problemləri biz də deyirik, onlar da. Biz əminik ki, həm bizim, həm də onların konstitusiyaları hüquqi baxımdan problem ola bilməz”, – A.Mirzoyan bildirib.

Konstitusiyamızda elə bir maddə varmı ki, Ermənistanı “narahat” etsin?

Globall.az    bildirir ki, bu barədə Globalinfo.az-a danışan Siyasi və Hüquqi Araşdırmalar Mərkəzinin (SHAM) sədri, politoloq Xəyal Bəşirov deyib ki, Ermənistan konstitusiyasında Azərbaycana və bir neçə dövlətə qarşı ərazi iddiaları var:

“Sülh müqaviləsinin imzalanmasına mane olan əsas məqamlardan biri də budur. Məsələ ilə bağlı Prezident İlham Əliyev də ortaya mövqe qoyub. Digər Azərbaycan rəsmiləri buna bənzər fikirlər səsləndiriblər. Ermənistan Baş naziri Nikol Paşinyan da bizimlə eyni fikirdədir. Yəni Ermənistan konstitusiyasının preambula hissəsində 1991-ci ildə qəbul edilmiş Müstəqillik bəyannaməsinə istinad edilir. Həmin bəyannamədə Azərbaycan və Türkiyəyə qarşı ərazi iddiaları var. Qarabağ ərazisi Ermənistanın şərq vilayətləri kimi qələmə verilir. Bu, yolverilməzdir. Ermənistan qanunvericiliyi konstitusiyaya əsaslanır. Demək, onların bütün qanunvericiliyi hüquqa və qanuna ziddir”.

Xəyal Bəşirov

Politoloqun sözlərinə görə, Ermənistan Azərbaycanın rəsmi İrəvana qarşı atdığı konkret addımları əsassız şəkildə təqlid edir:

“Görünür, Ermənistan sülh sazişinin imzalanması müddətini uzatmaq istiqamətindəki fəaliyyətinə haqq qazandırmağa çalışır. Əgər həqiqətən də narahatedici məqamlar varsa, Ermənistan açıq şəkildə göstərməlidir. Hansı maddədə, qanunda Ermənistana ərazi iddiası, sülh sazişinin imzalanmasına mane olan məqamlar var? Heç birində yoxdur! Konstitusiyamız beynəlxalq standartlara cavab verən, dövlətçilik maraqlarını özündə əks etdirən qanun toplusudur. Ermənistanın konstitusiyası isə “unikal”dır: dünyanın heç bir ölkəsinin qanunvericiliyində başqa ölkələrə belə açıq şəkildə ərazi iddiası əks edilməyib”.

X.Bəşirov qeyd edib ki, Ermənistanda revanşist qüvvələrin yenidən baş qaldırmayacağını demək çətindir:

“Bəzi məqamlarda Nikol Paşinyan hakimiyyətinin zəifliyi, bəzən də özünün həmin qüvvələrə şərait yaratması və s. günlərin birində Ermənistanda onların güclənməsinə gətirib çıxartmayacağı anlamına gəlmir”.