“Ermənistan müstəqil dövlətdir və İran xarici siyasətin şaxələndirilməsini Ermənistan Respublikasının təbii hüququ hesab edir. İran isə Ermənistan Respublikasının münasibətlərinin şaxələndirilməsinin tərəflərindən biri olub”.

Bunu Ermənistan İctimai Televiziyasının efirində İranın Ermənistandakı fövqəladə və səlahiyyətli səfiri Mehdi Sübhani deyib. 

O, Tehranın Ermənistanın Aİ və Qərblə yaxınlaşması ilə bağlı narahat ola biləcəyinə dair suallara cavab olaraq deyib: "Biz Ermənistanın adını çəkdiyiniz ölkələrlə əlaqələrinin inkişaf etdirilməsi imkanını İrana qarşı bir addım kimi qiymətləndirmirik. Ermənistan sadəcə olaraq, müxtəlif yollarla - öz ölkəsinin mənafeyi naminə münasibətlərini şaxələndirməyə çalışır. Ermənistan müstəqil ölkədir. Biz bunu deyə bilmərik - filan ölkə ilə əlaqələr qurun, filan ölkə ilə əlaqələr qurmayın. Biz sadəcə olaraq, Ermənistanın xarici əlaqələrinin inkişafının İranla əlaqələrinə necə kömək edəcəyini düşünürük".

O qeyd edib ki, bu yaxınlarda Ermənistanda Dünya Bankı və Avropa İttifaqı tərəfindən maliyyələşdirilən və İran şirkəti tərəfindən həyata keçirilən zibil emalı zavodunun açılış mərasimində iştirak edib: “Hazırda Meğri gömrüyündə biz layihə həyata keçiririk, onun maliyyələşdirilməsi Avropa bankları vasitəsilə həyata keçirilib. Biz gözləyirik ki, Ermənistan İranla münasibətləri inkişaf etdirmək üçün Avropa və digər ölkələrlə yaxşı münasibətlərindən istifadə edəcək. Və vurğulamalıyam ki, Ermənistan hökuməti bizi əmin edib ki, xarici əlaqələrin inkişafı İran və Ermənistan arasındakı münasibətlərə qarşı yönəlməyib. Biz erməni dostlarımıza güvənirik və Ermənistan hökuməti İranla münasibətlərini qoruyur, çünki baş verənlər iki ölkənin və iki xalqın maraqlarına əsaslanır”.

Göründüyü kimi, İran Azərbaycandan fərqli olaraq, Ermənistanın istənilən xarici dövlətlə, o cümlədən İrana qarşı düşmən mövqedə duran, ona ağır sanksiyalara məruz qoyan dövlətlərlə dostluğunu İrəvanın müstəqil seçimi olduğunu və buna hörmətlə yanaşdığını deyir. Azərbaycanınsa xarixci siyasətinə hər addım başı burnunu soxur.

Beləliklə, molla rejimi düşmən elan etdiyi İsrailə açıq hərbi-siyasi dəstək verən Avropa ölkələrilə, İsraillə birgə İranı bombalayan ABŞ ilə yaxınlaşmasına görə Ermənistandan qəti narazı deyil və bunu İrəvanın “xarici siyasətinin şaxələndirilməsi”, “müstəqil xarici siyasəti” kimi qəbul edir. Azərbaycana isə İsraillə münasibətlərinə görə irad tutur, ölkəmizi hədələyir, ünvanımıza olmayan şər-böhtanlar atır. 

Sonuncu dəfə Əli Xameneinin köməkçisi Əli Əkbər Vilayəti utanmadan Pakistanın DİN başçısına Azərbaycandan şikayət edib və Suriya lideri, eləcə də İsraillə əlaqələrinə görə həyasızcasına Azərbaycanın İslam birliyinə guya ziyan vurduğunu iddia edib. O zaman necə olur ki, İranın özünü bombalayan ABŞ və Avropa ölkələrilə sıx yaxınlaşan, öz ərazisinə müşahidəçi adı altında Qərb ölkələrinin xüsusi xidmət, kəşfiyyat orqanlarını yerləşdirən Ermənistanın hərəkətləri təqdir edilir? 

İrandakı molla rejiminin məntiqindən belə çıxır ki, Azərbaycan İslam birliyinə ziyan vurur, Qarabağdakı məscidlərimizə donuz bağlayan ermənilər isə İslam birliyini gücləndirməyə xidmət edir…

Bir sözlə, səfir Sübhaninin timsalında İrandakı din pərdəsi altında gizlənmiş çirkin rejim öz ermənipərəst siyasətindən əl çəkmir. İslamda məzhəbçilik üzərində hakimiyyətlərini saxlamağa çalışan molla rejiminin Vilayəti, Sübhani və bu qəbildən olan digər nümayəndələri isə İslama yox, daha çox Erməni Apostol Kilsəsinə xidmət edirmiş kimi görünürlər…/azpolitika