Azərbaycan-Amerika Birləşmiş Ştatları parlamentlərarası əlaqələr üzrə işçi qrupunun rəhbəri, Milli Məclisin Beynəlxalq münasibətlər və parlamentlərarası əlaqələr komitəsinin sədri, deputat Səməd Seyidov Teleqraf-ın suallarını cavablandırıb.

Onunla müsahibəni təqdim edirik:

- Səməd müəllim, ABŞ Prezidenti Donald Tramp Prezident İlham Əliyevin Xankəndidə keçirilən “Qlobal Şuşa Media Forumu – 2025”dəki çıxışını özünün rəsmi "Truth Social" hesabında paylaşıb. Bu, Ağ Ev tərəfindən Azərbaycana verilən növbəti dəstək kimi qiymətləndirilir. Vaşinqton-Bakı münasibətlərinin regionda cərəyan edən proseslərə təsiri haqqında yanaşmalar necədir?

- Bu, yüksək qiymətə layiq olan bir yanaşmadır. İlk dəfədir ki, ABŞ Prezidenti Azərbaycan Prezidentindən sitat gətirir. Özü də bu sitat bir-iki söz deyil, Prezident İlham Əliyevin iki dəqiqəyə yaxın olan çıxışını Prezident Donald Tramp özünün sosial media hesabında yayımlayır və açıq dəstək ifadə edir. Bu, adi bir hadisə deyil. Sözsüz ki, burada toxunulması vacib olan məqamlar çoxdur. Çünki biz vaxtilə deyirdik ki, Menendez (amerikalı ermənipərəst senator Bob Menendez) rüşvətxordur. Ancaq o vaxt bizə inanan yox idi. Fikirləşirdilər ki, sadəcə ittihamlar irəli sürürük və s. Amma Menendez erməni lobbisi tərəfindən Azərbaycana qarşı istifadə edilmək üçün satın alınmış şəxs idi. Hətta deyəndə ki, konqresmen Adam Şiff rüşvətxordur, buna da inanmırdılar. Zaman isə hər şeyi sübuta yetirdi. İndi bu adamlardan biri həbsdədir, digərini isə Tramp birbaşa maliyyə maxinasiyalarında ittiham edir. Bütün bunlar onu göstərir ki, Azərbaycan tərəfindən deyilən faktlar həmişə həqiqətə söykənib. Sadəcə, Azərbaycan həmin vaxt o səviyyədə deyildi ki, onun dediklərinə beynəlxalq müstəvidə diqqət və münasibət bildirsinlər. İndi yəni, Azərbaycan yüksəldikdən sonra onun sözü eşidilməyə başlayıb. Məlum olub ki, dediklərimizin hamısı həqiqətmiş. Nəticədə, ABŞ Prezidenti Donald Tramp Azərbaycan Prezidenti İlham Əliyevdən sitat gətirdi. Bu isə məhz uğurlu siyasətin nəticədir. Sözsüz ki, bu yüksək səviyyəli yanaşmalar Azərbaycan-ABŞ münasibətlərinə təsir edəcək.

- ABŞ-nin Azərbaycanla Ermənistan arasında sülh prosesinə olan müsbət yanaşmaları nədən xəbər verir? Prosesin yekunlaşmasında Ağ Evdən verilən müsbət mesajlar nə dərəcədə təsirli ola bilər?

- Tramp bir neçə dəfə bəyan etdi ki, Azərbaycanla Ermənistan sülhə çox yaxındır. Bu da reallığı əks etdirir. Ona görə də Ermənistan Ağ Evdən verilən siqnallara ciddi yanaşmalıdır. Bunlar sülh mesajlarıdır. Azərbaycan tərəfi artıq öz sözünü deyib, layihələrini işləyib hazırlayıb. Bu baxımdan indi erməni tərəfi aktivlik nümayiş etdirməlidir. Bu xüsusda Zəngəzur dəhlizi ilə bağlı irəli sürülən məsələ heç də təəcüblə qarşılanmamalıdır. Çünki bu gün Ermənistanda Zvartnost hava limanı heç də ermənilər tərəfindən idarə olunmur. Amma faktiki olaraq, bu aeroport Ermənistanın paytaxtında yerləşir.

- Ağ Evdən Zəngəzur dəhlizi ilə bağlı verilən mesajlara münasibət necədir? Yəni, dəhlizin icarə əsasında açılması məntiqi nə dərəcədə real görünür?

- Zəngəzur dəhlizi elə bir idarə üsulu ilə həllini tapmalıdır ki, Azərbaycan vətəndaşları və ölkəmizdən gedən yüklər sərbəst, problemsiz, maneəsiz şəkildə Naxçıvana yəni, Azərbaycana çata bilsin. Bu məhz Azərbaycandan-Azərbaycana prinsipinə əsaslanmalıdır.