Rusiyada iri məmurların intiharının və həbslərin arxasında nə durur?

Rusiyada hətta ən yüksək hakimiyyət dairələrini iflic edən bir sıra səs-küylü həbslər və müəmmalı ölümlər davam edir. Son olaraq Nəqliyyat naziri Roman Starovoytun intiharı ölkənin siyasi elitasını şoka salıb.

“The Telegraph”-da dərc edilən məqalədə belə deyilir.

Adının çəkilməsini istəməyən Rusiya Prezident administrasiyasının keçmiş rəsmisi nəşrə açıqlamasında deyib: “Bu, dəhşətli görünür - həbslər, ölümlər, qalmaqallar...”.

Yazıda xatırladılır ki, iyulun 7-də daha öncə Kursk vilayətinin qubernatoru olmuş 53 yaşlı nazir Starovoyt külli miqdarda mənimsəmə ittihamı ilə istintaq altında olarkən intihar edib. Məlumatlara görə, onun keçmiş müavini Aleksey Smirnov artıq Starovoytun əleyhinə ifadə veribmiş.

Nəşrə danışan məmur deyib ki, “ən yüksək səviyyədə qorxu vakkumu yaranıb”: "Əslində qəribə olan odur ki, prezident (Vladimir Putin – red.) heç bir təəssüf ifadə etməyib(Starovoytun ölümü nəzərdə tutulur-red.). Hətta baş nazir də susur. Bu, bir işarədir".

Yazıda qeyd olunur ki, məhkəmələr müdafiə nazirinin müavinlərinə də onillik həbs cəzaları verərkən, iri məmurların pəncərədən yıxılması da yeni siyasi metaforaya çevrilib. Belə ki, son olaraq “Transneft”in vitse-prezidenti Andrey Badalov müəmmalı şəkildə eyvandan yıxılıb, milyarder Konstantin Strukov isə şəxsi təyyarəsində ölkəni tərk etmək istəyərkən zorla geri qaytarılıb.

Karnegi Mərkəzinin eksperti və Rusiya Federasiyası Mərkəzi Bankının keçmiş müşaviri Aleksandra Prokopenko nəşrə deyib: “Qaydalar dəyişib. İndi səni kimin dəstəkləməsinin əhəmiyyəti yoxdur. Sağ qalan ən güclü olan deyil, ən ehtiyatlı olandır".

Qəzet yazır ki, indi Kremldə paranoik əhval-ruhiyyə artır: “Hazırkı məmurlardan biri deyir: “Təhlükəli mövzulardan uzaq durmağa çalışıram... Hamımız öz kiçik dünyalarımıza qapanmışıq"”.

Qeyd edək ki, iyulun 7-də ölümü ilə bağlı xəbər yayılan Starovoyt tapança ilə özünə atəş açaraq intihar edib. Bundan bir neçə saat əvvəl onun Putinin əmri ilə istefaya getməsi məlum olub. Media onun öldüyü gün iş yerində iclas keçirdiyini, lakin qəfildən evə getdiyini yazıb.

Starovoytdan bir neçə gün əvvəl “Transneft”-in top meneceri Andrey Badalov ölüb. Mətbuatın yazdığına görə, o, Moskvada hündürmərtəbəli binanın pəncərəsindən yıxılıb. Badalovun yaxınları onda heç bir depressiya əlaməti görmədiklərini, onun heç vaxt intihar barədə danışmadığını bildiriblər.

Badalov son zamanlar intihar, təsadüf, qəza və s. nəticəsində ölən tək rus top-menecer deyil. Belələrinin sayı artıq onlarladır. Xüsusilə, son zamanlar “Lukoyl”un rəhbərliyindən bir neçə nəfər müəmmalı şəkildə həyatla vidalaşıb.

Press-fakt