“Gördüm ki, PA-nın şöbə müdiri aləmi qatır bir-birinə...” -
“Həmin iki hakim işdən kənarlaşdırıldı”
Mahmud Hacıyev arxasında iri ranqlı məmurun durduğu şirkətlə məhkəmə çəkişməsini necə udduğunu açıqladı
“10 ildən çox “Titan D” Məhdud Məsuliyyətli Cəmiyyətində işləmişəm. Bu, özəl mühafizə və kommersiya şirkətidir və MMC-yə Cəmil Çaparlı adlı şəxs rəhbərlik edir. Prezident Administrasiyasında protokol şöbəsinin müdiri Elçin Bağırov onun qaynıdır. Dövlət məmurlarının özəl kommersiya şirkətlərində fəaliyyəti qanunla qadağan olunmasına baxmayaraq, cənab Elçin Bağırov “Titan D” şirkətinin fəaliyyətində yaxından iştirak edirdi. 2018-ci ilin avqustunda MMC-nn rəhbərliyi məni çağırıb bildirdi ki, işinizdən azad olunursunuz. 12 il bu MMC-də işləmişdim, xahiş etdim ki, bir-iki ay möhlət versinlər. Ancaq vermədilər, dedilər işdən çıxmalısınız. Əslində, tapşırıqla yerimə keçmiş komissarlıq işçisini işə qəbul etmək planı var idi. İşdən çıxarılmağımla bağlı əmri əldə edib məhkəməyə müraciət etdim və əsl həngamə bundan sonra başladı...”.
Bu fikirləri keçmiş polis rəisi, polkovnik Mahmud Hacıyev üzləşdiyi qanunsuzluq, məhkəməyə etdiyi müraciət və dövlət məmurunun basqılarına məruz qalması barədə danışarkən söyləyib.
Keçmiş polis zabiti bildirib ki, əmri aldıqdan sonra qanunsuz olaraq işdən azad edildiyi üçün Səbail rayon Məhkəməsində iddia qaldırıb: “Səbail Məhkəməsindən başlayan proses 2 il çəkdi və Ali Məhkəməyə qədər gedib çıxdı. Səbail Məhkəməsində hakim Mədinə Bağırova “Titan D” MMC-nin xeyrinə qərar qəbul etdi. Əslində, bu xanım əvvəllər apellyasiya instansiyasında çalışıb, lakin onu yol verdiyi qüsurlara görə rayon məhkəməsinə keçiriblər.
Mən özüm hüquqşünas olmasaydım, bəlkə də bu hakim xanımın çıxardığı qərara normal baxardım. Əmək Məcəlləsinin 45-ci maddəsinin 5-ci bəndində konkret yazılır ki, hər hansı bir işçi 5 ildən yuxarı fasiləsiz olaraq bir təşkilatda işləyirsə, həmin işçi ilə təşkilat arasında bağlanan müvəqqəti əmək müqaviləsi fasiləsiz əmək müqaviləsinə çevrilir. Məni işdən azad edəndə isə əsaslandırma belə idi ki, mənimlə bağlanan müvəqqəti əmək müqaviləsinin vaxtı bitib. Halbuki, mən 12 il müddətində bu şirkətdə işlədiyimdən əmək müqaviləsi fasiləsizlik statusu almışdı. Odur ki, mənim işdən çıxarılmağım qanunsuz və əsassız idi. Səbal Məhkəməsində hakim Mədinə Bağırovanın çıxardığı qərarda yazdığı bəzi cümlələrlə hakim özü-özünü təkzib etmişdi. Hakim Əmək Məcəlləsindəki birmənalı göstərişi “Titan D” MMC-nin rəhbərliyinin öhdəsinə buraxmışdı”.
Müsahibimiz deyir ki, bundan sonra Apellyasiya Məhkəməsinə şikayət verib: “Apellyasiya Məhkəməsində işə hakimNamiq Cəfərov baxıb və Səbail Məhkəməsinin qərarını ləğv edərək işə bərpa olunmağım haqqında qərar çıxarıb. Bundan sonra qarşı tərəf Ali Məhkəməyə şikayət etdi. Bir sözlə, bu məhkəmə prosesi iki il müddətində uzandı”.
Mahmud Hacıyev əlavə edib ki, 2019-cu ilin dekbrında iş Ali Məhkəməyə çıxarılıb və işə hakim Əhməd Əhmədov baxıb. Dekabrın 17-də Ali Məhkəmənin Mülki Kollegiyası 23 aylıq əmək haqqı ödənilməsi şərti ilə Mahmud Hacıyevin işə bərpa olunması haqda qərar çıxarıb.
Qeyd edək ki, Mülki Prosessual Məcəlləyə əsasən Ali Məhkəmənin çıxardığı qərar həmin gündən hüquqi qüvvəyə minir. Ancaq qəribədir ki, Ali Məhkəmənin 2019-cu ilin dekabrında çıxardığı qərar 2020-ci ilin may ayına qədər icra olunmayıb.
Mahmud Hacıyevə hesab edir ki, Ali Məhkəmənin Mülki Kollegiyasının qərarının 5 ay müddətində icra edilməməsi, Səbail Məhkəməsinin işin faktiki hallarını nəzərə almadan qərəzli qərar çıxarması, Ali Məhkəmənin bir dəfə işi yenidən apellyasiya instansiyasına qaytarması təsadüfi olmayıb: “Mənim kifayət qədər təcrübəm var, uzun illər hüquq- mühafizə orqanlarında işləmişəm. Təəssüflər olsun ki, bu işlərə Prezident Administrasiyasının Protokol şöbəsinin müdri Elçin Bağırov müdaxilə edib. Bu, “Titan D” MMC-nin rəhbərinin bacaracağı iş deyildi. Məhz Elçin Bağırovun səyi nəticəsində bu iş 2 il müddətində məhkəmələrdə sürndürülüb. Təsəvvür edin ki, Ali Məhkəmənin çıxardığı qərar 5 ay müddətində icra edilmədi. Ola bilsin ki, bu, ilk belə hadisə idi.
Elçin Bağırov bu işə müdaxilə edirdi. O zaman Ali Məhkəmədə İnzibati İqtisad Kollegiyasının sədri, Səfa Mirzəyevin qardaşı Hikmət Mirzəyev buna mane olurdu. Elçin Bağrov onun vasitəsilə hakimlərə təsir edirdi. Məsələn, Ali Məhkəmə bu işi apellyasiya instansiyasına qaytaran zaman hakim Vəfaddin İbayevə təsir edilmişdi. Apellyasiya Məhkəməsində iş Şeyda Məhərrəmova deyilən hakimin əlinə düşdü. Bu xanım da işi təkrar Ali Məhkəməyə qaytardı. Bu dəfə iş Ali Məhkəmədə hakim Əhmədov Əhmədovun əlinə düşdü və uzun araşırmadan sonra müsbət qərar verildi. Amma bu qərar da 5 ay icra edilmədi. Nəhayətdə 5 aydan sonra məlum oldu ki, qarşı tərəf Konstitusiya Məhkəməsinə müraciət edib. Normalda Ali Məhkəmənin qərarı icra edilməli, bununla paralel narazı qalan tərəf Konstitusiya Məhkəməsinə müraciət etməli idi.
Elçin Bağırov
Beləcə, qarşı tərəf 2020-ci ilin may ayında Konstitusiya Məhkəməsinə müraciət etdi. Mən də gördüm ki, Elçin Bağırov aləmi qatır bir-birinə və o, Konstitusiya Məhkəməsinə də təsir edə bilər. Bu səbəbdən 2020-ci ilin iyun ayında Azərbaycan Prezidenti İlham Əliyevə, Birinci Vitse-Prezident Mehriban Əliyevaya və prezidentin hüquq-mühafizə orqanları ilə iş üzrə şöbəsinin müdri Fuad Ələsgərova müraciətlər etdim. Sonda aydın oldu ki, müraciətlərimin işin qanuni həllinə müsbət mənada təsiri olub.
Nəhayət, 2020-ci ilin iyul ayında Konstitusiya Məhkəməsi qanunazidd addım atmadı. Mən öncədən Konstitusiya Məhkəməsinin sədrinə də müraciət edərək, xahiş etmişdim ki, 2 il müddətində davam edən məhkəmə prosesinə ədalətlə yanaşılsın. Sözsüz ki, mənim prezidentə və birinci vitse-prezidentə də müraciətlərim nəzərə alındı və Konstitusiya Məhkəməsi işə xitam verdi. İşin icrasına xitam verməklə yanaşı, mənim 23 aylıq əmək haqqımın ödənilməsi haqda qərarı ədalətli hesab etdi. İyulun sonlarında “Titan D” MMC mənim 23 aylıq əmək haqqımı ödəməli oldu”.
Hüquqşünas deyir ki, bu məsələni qabartmaqda məqsədi Şeyda Məhərrəmova, Mədinə Bağırova, Vəfaddin İbayev kimi hakimlərin qanunsuz qərarlar çıxarmasını, habelə Ali Məhkəmədə Hikmət Mirzəyevin hakimlərə təsirini qeyd etməkdir:
“Şükürlər olsun ki, belə hakimlərlə yanaşı Azərbaycan məhkəmə sistemində Əhməd Əhmədov, Ələsgər Əliyev və Namiq Cəfərov kimi hakimlər də var. Son iki ay ərzində Ali Məhkəmədə çox ciddi islahatlar, təmizləmə prosesi getdi. Həmin təmizləmə prosesində mənim işimə mane olan iki hakim işdən kənarlaşdırıldı. İddia etmirəm ki, bu şəxslər məhz mənim işimə görə işdən uzaqlaşdırılıb. Bu, həm Allahın, həm də Prezident Administrasiyasının işidir. Görünür, məndən əvvəl də onlar haqqında şikayətlər olub, qanunsuz qərarlar çıxarıblar”.
Sonda Mahmud Hacıyev Prezident İlham Əliyevə və Birinci Vitse-Prezident Mehriban Əliyevaya dərin təşəkkürünü bildirərək qeyd etdi ki, məhz onlara müraciətdən sonra bu iş nəzarətə götürülüb və ədalətli həllini tapıb.
Tahir