Politoloq Fərhad Məmmədov Ermənistanda Beynəlxalq Respublikaçılar İnstitutunun (IRI) keçirdiyi rəy sorğusunun nəticələrini şərh edərək bildirib ki, ictimai rəy Paşinyan hökuməti üçün bir sıra xoşagəlməz meylləri ortaya qoyur.

Sorğuya əsasən, respondentlərin 49 faizi ölkənin yanlış istiqamətdə hərəkət etdiyini düşünür. Yalnız 36 faiz doğru istiqamətdə olduğunu bildirib. Ən diqqətçəkən məqam isə gənclər (18–35 yaş) arasında bu göstəricinin 49 faizlə daha yüksək olmasıdır. Bu isə Paşinyan üçün narahatedici siqnaldır.

Məmmədovun sözlərinə görə, siyasi fiqurlara etimad da olduqca zəifdir: Paşinyana dəstək 13 faiz, Ararat Mirzoyana 5 faiz, Robert Koçaryana 4 faiz, Aram Sarkisyan və Alen Simonyana isə hərəyə 2 faiz təşkil edir. Digər siyasətçilərə dəstək isə 1 faizi belə keçmir. Ən önəmlisi, respondentlərin 61 faizi ümumiyyətlə heç bir siyasətçiyə etimad göstərmir.

Politoloq bu 61 faiz etimadsız elektoratın kimliyini sorğunun digər nəticələri ilə izah edib. Belə ki, respondentlərin 60 faizi ya kimə səs verəcəyini bilmir, ya da ümumiyyətlə seçkilərdə iştirak etmək istəmir. Bu qrupun 63 faizini isə gənclər təşkil edir.

Bu nəticə göstərir ki, erməni gəncliyi mövcud siyasi sistemə etimad etmir, nə iqtidara, nə də müxalifətə maraq göstərir və seçkilərdə iştirak etmək niyyətində deyil. Bu isə həm siyasi böhrandır, həm də yeni siyasi qüvvələr üçün fürsət. Lakin bu qüvvələr nə mövcud iqtidarla, nə də keçmiş hakimiyyətlə assosiasiya olunmamalıdır.

Sorğuda ölkənin əsas problemlərinə münasibət də maraqlıdır. Respondentlərin 44 faizi sərhəd və təhlükəsizlik məsələlərini əsas problem kimi göstərib. Ardınca işsizlik və iqtisadi vəziyyət (14%), qiymət artımı (12%), pis idarəetmə (9%), təhsil və səhiyyə (6%), xarici siyasət (6%) gəlir. Bu da göstərir ki, ictimaiyyətin prioritetləri təhlükəsizlik və iqtisadi sabitlikdir.

Azərbaycanla sülh müqaviləsinə münasibətdə isə respondentlərin 47 faizi dəstəklədiyini, 40 faizi isə əleyhinə olduğunu bildirib. Maraqlı məqam yaş qruplarındakı fərqdir: yaşlıların 58 faizi sülhü dəstəklədiyi halda, gənclərdə bu göstərici 38 faizdir. Əvəzində, 48 faiz erməni gənci sülh müqaviləsinə qarşı çıxır.

“Paşinyan yaxın 6 ayda nə etməlidir?” sualına verilən cavablar da diqqətçəkəndir: 22 faiz “sülhü təmin etsin”, 17 faiz “sərhədləri və təhlükəsizliyi möhkəmləndirsin”, 14 faiz “ordunu inkişaf etdirsin”, 12 faiz isə “xarici siyasəti dəyişsin” deyib. Yəni ilk dörd prioritet birbaşa sülh və təhlükəsizliklə əlaqəlidir.

Fərhad Məmmədov qeyd edib ki, Ermənistan hakimiyyəti xüsusilə gənclərlə sülh mövzusunda ciddi işləməlidir. Çünki bu günkü gənclər sabahın siyasi qərarvericiləridir.

Sonda politoloq vurğulayıb ki, bu sorğu nəticələri Azərbaycan üçün də strateji əhəmiyyət daşıyır. Prezident İlham Əliyevin də qeyd etdiyi kimi, bu cür faktlar Ermənistan Konstitusiyasının dəyişdirilməsi və gələcəkdə ərazi iddialarından imtina üçün “dəmir-beton təminatlar”ın formalaşdırılmasında əsas ola bilər.

Rasim Əliyev