Dünən Moskvada Rusiya Kənd Təsərrüfatı Nəzarət Xidmətinin (Rosselxoznadzor) rəhbəri Sergey Dankvert ilə Ermənistanın Qida Təhlükəsizliyi İnspeksiyasının rəhbəri Tiqran Petrosyan arasında görüş keçirilib.

Erməni mediası xəbər verir ki, tərəflər arasında keçirilən danışıqlar zamanı iki ölkənin aidiyyəti qurumları arasında əməkdaşlıq, o cümlədən Ermənistandan Rusiyaya güllərin ixracında fitosanitar tələblərə riayət olunması məsələləri müzakirə olunub.

Görüşdə Avrasiya İqtisadi Komissiyasının (AİK) sənaye və aqrosənaye kompleksi üzrə naziri Goar Barseqyan da iştirak edib.

"Rosselxoznadzor"-un açıqladığı rəsmi məlumatlara görə, 2025-ci ilin 23 iyuluna qədər Ermənistandan Rusiyaya 103,4 min ton meyvə-tərəvəz məhsulu idxal edilib. Bu göstərici ötən ilin eyni dövrü ilə müqayisədə 50 faiz çoxdur (2024-cü ildə – 69,6 min ton).

Gül məhsullarının tədarükündə də ciddi artım müşahidə olunur. Cari ilin əvvəlindən Rusiyaya Ermənistandan 71,1 milyon ədəd kəsilmiş gül tədarük olunub ki, bu da ötən ilin eyni dövrü ilə müqayisədə 47 faiz çoxdur (2024-cü ildə – 48,5 milyon ədəd). Ötən il ümumilikdə 84,4 milyon ədəd gül göndərilmişdi.

Hazırda 14 erməni istehsalçıya Ermənistanın səlahiyyətli qurumunun zəmanəti ilə Rusiya bazarına gül məhsulu ixrac etməyə icazə verilib. Tərəflər arasında istixanaların birgə auditi davam edir. Rosselxoznadzor bəzi müəssisələri özü yoxlayacaq, digərlərinə isə Ermənistan tərəfi zəmanət verəcək.

Tiqran Petrosyan bəyan edib ki, Ermənistan üçün Rusiya bazarı prioritet istiqamətdir və Aİİ (Avrasiya İqtisadi İttifaqı) çərçivəsində bütün fitosanitar tələblərə əməl ediləcəyinə təminat verir.

Sergey Dankvert isə fitosanitar nəzarətdə informasiyaların inteqrasiyası və izlənilə bilənliyin təmin olunmasının vacibliyini vurğulayıb. Onun sözlərinə görə, intensiv ticarət şəraitində bu, əsas məsələlərdən biridir.

Sonda tərəflər Ermənistan-Rusiya münasibətlərinin yüksək səviyyəsini qeyd edib və əməkdaşlığı daha da inkişaf etdirmək niyyətlərini təsdiqləyiblər.

Xatırladaq ki, Rusiya ötən ay Ermənistandan bəzi kənd təsərrüfatı məhsullarına, o cümlədən gül idxalına məhdudiyyət qoymuşdu. Baş nazir Nikol Paşinyanın adıçəkilən ölkəyə işgüzar səfərindən sonra problemlər yoluna qpyulub. Xatırladaq ki, Baş nazir səfərdən əvvəl ABŞ-nin Zəngəzur dəhlizinin 100 illik icarəyə verilməsinə dair təklifini rədd edib.

Rasim Əliyev