Rusiya siyasətində Azərbaycan auditoriyası üçün o qədər də tanınmayan və maraqlı olmayan xeyli “siyasətçi” statusu daşıyan individlər var. Belələrini bizim media və cəmiyyət geniş mənada daha çox Azərbaycanın əleyhinə səsləndirdikləri fikirlərdən, iftira və böhtanlardan, təhqir və təhdidlərdən sonra tanımağa başlayır. Ümumilikdə isə bu camiyədə bir-iki nəfəri çıxmaq şərtilə, lehimizə danışanlar zatən yoxdur...

Anti-azərbaycan isterikasının önündə yer tapmağa və bununla həm də Rusiyadakı şovinist, millətçi elektorat qarşısında xal qazanmağa çalışan “siyasətçilər”dən biri də son zamanlar özünü Azərbaycana və Azərbaycan diasporuna qarşı Kremlin elan etdiyi “səlib yürüşü”nün ön cərgələrinə soxuşduran Sergey Mironovdur.

Özünün ədalət, vicdan, qeyrət anlayışı ruslar demişkən “plintusdan da aşağı olan” bu naftalin qoxulu “siyasətçi” ədalətin çoxdan “qırmızı kitab”a düşdüyü, həqiqətin isə çirkabla, ətrafdakı xalqlara qarşı nifrətlə ört-basdır edildiyi Rusiya siyasətində “Ədalətli Rusiya – Həqiqət naminə” partiyasının sədri və Dumadakı eyni adlı fraksiyanın başçısıdır.

Vaxtilə hərbi xidmətini Azərbaycanda keçirmiş 1953-cü il təvəllüdlü və “zastoy” təfəkkürlü bu şəxsin Azərbaycana və azərbaycanlılara qarşı nifrətinin arxasında nələrin durduğunu anlamaq çətindir. Ola bilsin, Azərbaycandakı əsgərliyi dövründən hansısa psixoloji, bəlkə də fiziki travmaları qalıb... Lakin onun hazırkı anti-Azərbaycan isterikasının həmin travmalar deyil, sifariş əsaslı olduğu heç bir şübhə doğurmur.

Mironov son dövrlərdə ilk olaraq Yekaterinburqda azərbaycanlılara qarşı edilən vəhşiliklərdən sonra “boy göstərməyə” başladı. Əvvəlcə sosial şəbəkədə “fəxrlə” yazdı ki, Uraldakı Azərbaycan diasporunun rəhbəri Şahin Şıxlinskinin oğlu məhz onun rəsmi müraciəti əsasında saxlanılıb. Daha sonra bildirdi ki, onun müraciətinin əsas mövzusu bütün Azərbaycan diasporunun yoxlanılmasıdır.

Bu sıraya Moskvanın ən böyük “Sadovod” və “Food City” bazarlarının (azərbaycan əsilli milyarder Qod Nisanova məxsusdur) yoxlanılması da daxildir. Mironov deyib ki, hazırda yoxlamaların nəticələrini gözləyir.

Bundan bir neçə gün sonra isə o, Şuşadakı Media Forumunda iştirak etdiyinə və Azərbaycan Prezidentinin ünvanına xoş sözlər söylədiyinə görə, TASS-ın baş direktorunun keçmiş birinci müavini, əslən Bakıdan olan Mixail Qusmanın Rusiyanın dövlət mükafatlarından məhrum edilməsi təşəbbüsü ilə çıxış etdi. Onun sözlərinə görə, həta bunun üçün Rusiya Federasiyası Konstitusiyasının 89-cu maddəsinə dəyişiklik etmək lazımdır: “Rusiya Prezidentinə təkcə dövlət mükafatlarını təqdim etmək deyil, həm də onlardan məhrum etmək hüququnun verilməsinə ehtiyac var”.

Bir sözlə, bu şəxsin Azərbaycana və azərbaycanlılara qarşı açıq nifrətini, düşmənçiliyini, təxribatçı fəaliyyətini görməmək mümkün deyil. Bəs bunun özü kimdir, Rusiyada nə ilə və necə tanınır?

Bu boz və istedadsız adamın karyerasının əsas həlledici məqamı və “uğuru” onun vaxtilə “banditski Petrburq”da Vladimir Putinlə tanış olmasıdır. İndiki Rusiya başçısının Peterburqdan özü ilə Moskvaya gətirdiyi çoxsaylı tanışlarından biri olan Mironov 2000-ci il prezident seçkiləri zamanı Vladimir Putinin Sankt-Peterburqdakı seçki qərargahının rəhbərinin müavini olub.

2004 və 2012-ci illərdə isə “qondarma” namizəd kimi, rəqabət görüntüsü yaratmaq üçün prezident seçkisində iştirak edib və hər dəfə də ən sonuncu yerə layiq görülüb. Buna baxmayaraq, Putin onu xeyli irəli çəkib və hətta 2001-2011-ci illərdə Mironov məhz Putinin təqdimatı ilə Rusiya Federasiya Şurasının sədri də “seçilib”.

Lakin sonradan Mironovun ulduzu yavaş-yavaş sönməyə başlayıb. Hazırda Dumada “vaxt öldürən” Mironovu rusiyalılar daha çox “çılğın özəl həyatı olan qoca kaftar” kimi tanıyırlar.

Belə ki, yaşı 73-ü haqlayan bu “ağsaqqal” artıq 5 dəfə evli olub. Bu evliliyin dördüncüsü daha maraqlıdır. Belə ki, Mironov özündən 31 yaş(!) kiçik jurnalist Olqa Radievskaya ilə rəsmən nikah qurub. Hətta həmin xanımın (guya) ondan uşaq doğduğu da deyilir... Ancaq biz bu cür dedi-qoduların arxasınca getmədən bir faktı nəzərə çatdırmaq istərdik ki, Mironov beynəlxalq qurumlar tərəfindən uşaq oğurluğu maddəsilə ittiham olunan ilk Rusiya siyasətçisi sayılır.

Belə ki, Mironov yeni, 5-ci arvadı ilə birgə 2022-ci ildə işğal olunmuş Xersondan 10 aylıq ukraynalı qız uşağını qanunsuz olaraq Rusiyaya aparıb və adını dəyişib. Xersondan oğurlanan uşaqlarla bağlı araşdırma aparan jurnalistlər bu faktı rəsmən qeydə alıblar. Mironov özü bu faktı həyasızcasına inkar edib və araşdırmanı “saxta” adlandırıb. 

Həmin vaxt 70 yaşlı deputatın və onun 55 yaşlı arvadının bu hərəkəti daha əvvəl Vladimir Putin və uşaq ombudsmanı Mariya Lvova-Belovanın həbsinə order verən Beynəlxalq Cinayət Məhkəməsi tərəfindən müharibə cinayəti kimi qiymətləndirilib. İstintaq müəyyən edib ki, 2022-ci il avqustun sonunda Mironovla hələ rəsmi nikahda olmayan İnna Varlamova işğal altındakı Xerson vilayətindəki uşaq evinə baş çəkib. Onlar Xersondan Moskvaya iki uşağı - 10 aylıq Marqarita Prokopenko və iki yaşlı İlya Vaşçenkonu qanunsuz olaraq çıxararaq aparıblar...

Bundan əlavə, Mironovun adı korrupsiya əməllərində də dəfələrlə hallandırılıb. Onun Moskvanın ən prestijli ərazilərində çoxsaylı mülklərinin olduğu bildirilir. Onun təkcə 4-cü arvadına bağışladığı mənzilin qiyməti təxminən 350 milyon rubl, yəni, 4 milyon dollardan bahadır. Bu barədə bir müddət əvvəl “The Insider” nəşri məlumat yaymışdı.

Məlumatda qeyd edilirdi ki, təkcə bu məbləğ Mironovun illik rəsmi gəlirlərindən 70 dəfə çoxdur. Bundan əlavə, nəşr yazır ki, “ədalət və həqiqət aşiqi” Mironov özündən 31 yaş kiçik 4-cü arvadına elit “Porsche Panamera” və “BMW”-nin son modeli də daxil olmaqla, bir neçə bahalı avtomobil də bağışlayıb.

Bir sözlə, korrupsiya, uşaq oğurluğu, yalan, saxtakarlıq, məddahlıq, simasızlıq və digər “keyfiyyətləri” ilə xirtdəyə qədər çirkab içində olan birisi Azərbaycana və azərbaycanlılara dil uzadır. Azərbaycanın üzərinə məhz beləsinin və bunun kimilərin qısqırdılması bir yandan məyusedicidirsə, digər yandan da başadüşüləndir. Çünki şər, böhtan, düşmənçilik və digər alçaq işlər hər zaman alçaq könüllülərə tapşırılır...

Ümumiyyətlə, SSRİ dövrünü xatırlayan nəslin qarşısına Mironov soyadı çıxanda, ilk ağla gələn olduqca istedadlı və tanınmış aktyor, milyonların sevimlisi olmuş Andrey Mironov olur. Təəssüf ki, həmin Mironov bu ədalətsiz dünyada cəmi 46 il yaşadı, xəstəlikdən zamansız dünyasını dəyişdi və indi bu soyad Sergey Mironov kimi simasız “ədalət carçısı” ilə asossasiya olunur...

Cəlal Məmmədli