“Bu silahlar müharibənin gedişatını dəyişə bilər”

ABŞ Prezidenti Donald Tramp bu yaxınlarda Ukraynaya yeni hücum silahlarının verilməsi barədə əmr verib. Həmin silahlar Ukraynada hərbi əməliyyatların gedişatını dəyişə bilər. Bunu ABŞ-dəki nüfuzlu siyasi xadimlərdən biri, Ronald Reyqan Respublikaçılar Klubunun prezidenti Boris Pinkus deyib.

O qeyd edib ki, söhbət xüsusən də Rusiyanın dərinliklərinə, oradakı əsas hədəflərə zərbələr endirə bilən yeni qanadlı raketlərdən gedir. 

Pinkus vurğulayıb ki, ABŞ Konqresi uzun müddətdir Ukraynaya belə silahların verilməsini tələb edir: "Bu raketlərin unikallığı ondan ibarətdir ki, onlar 300 metrdən aşağı məsafədə uçur və bu, çox vacibdir, çünki radarlar onları görmür. Onların uçuş məsafəsi isə 450-500 kilometrdir ki, bu da əlbəttə, kifayət edən qədər məsafədir".

Pinkus həmçinin bildirib ki, bu cür hava-yer raketləri həm MiQ, həm də F-16 qırıcılarında istifadə oluna bilər və Amerika lideri artıq Pentaqona ABŞ-nin iki müdafiə korporasiyası ilə Ukrayna üçün belə raketlərin istehsalı ilə bağlı müqavilələr bağlamağı tapşırıb.

Qeyd edək ki, Ukrayna artıq uzun müdətdir Qərbdən məhz Rusiyanın dərinliyini vura bilən silahlar istəyir. Lakin ABŞ başda olmaqla, Qərb ölkələri nüvə eskalasiyası təhlükəsini bəhanə gətirərək, Ukraynaya bu cür silahlar verməkdən boyun qaçırıb. Əvəzində, Ukraynanın özündə bu cür silahların istehsalının təşkili ilə bağlı addımlar atılıb. Nəticədə Ukrayna tərəfi özünün uzaq mənzilli raketlərini istehsal etdiyi barədə məlumatlar yayıb. Hətta ballistik raketlərin istehsalına başlandığı barədə xəbərlər var. Lakin öz ərazisində müharibə apara-apara qısa müddətdə bu cür böyük həcmli və mürəkkəb istehsalları təşkil etmək olduqca çətindir. Buna görə də ara-sıra Ukraynanın Rusiyaya qarşı özünün azsaylı raketlərindən istifadə etdiyi barədə məlumatlar və faktlar qeydə alınsa da, bu zərbələr kütləvi xarakter almayıb. Son olaraq, bu cür zərbənin Soçidəki obyektlərə endirildiyi məlum olmuşdu. Rusiya isə əvəzində az qala hər gün onlarla qanadlı və ballistik raketlə Ukraynanın dərinliklərini vurur.

İndi isə belə görünür ki, Qərb, nəhayət, bu məsələdə qismən də olsa paritet yaratmaq üçün Ukraynaya Rusiyanın dərinliklərini vura biləcək raketlər vermək qərarına gəlib. Görünür, xüsusilə də Putinin heç bir güzəştə getməməsi və Trampı həm öz seçiciləri, həm də bütünlükdə dünya önündə çətin vəziyyətdə qoyması, nəticədə ABŞ Prezidentinin Rusiya qarşısında zəif, bacarıqsız biri kimi görsənməsi hazırkı ABŞ liderini daha qətiyyətli addımlar atmağa məcbur edir. O isə hamıdan yaxşı bilir ki, təkcə yarımçıq işləyən iqtisadi sanksiya və təzyiqlərlə Rusiya işğalını dayandırmaq çətin və bəlkə də mümkünsüz olacaq. 

Ona görə də Rusiya ilə onun yeganə başa düşdüyü dil – güc dili ilə danışmaqdan başqa bir seçim yoxdur. Bunun üçün isə birbaşa döyüş meydanında Rusiya işğalçı maşınının dişlərini qıra bilən addımlara və silahlara ehtiyac var...

C.Məmmədli